Buiti le hasagarubei lídangiñe lani Hesusu sákürifisiu
Aban wéiyaasu luagu irumu, óundaraguatiña gefentiña luagu Heowá, hama saragu míñunu gürigia ha hagunbirahabaña lidan sun ubóu, lun haritaguni lounwen Hesusu, ítara kei líchuguni gumadi houn (Lúkasi 22:19). Íderagua lumutiwa adamuridaguni le lun warufuduni gebegi lan le ladügübei Hesusu wawagu dan le líchugunbalin libagari hawagu sun gürigia. Arufuda lumuti giñe le lunbei lanügüni sákürifisiu le woun, dandu guentó keime ámuñegü (Huan 3:16).
Meberesenga anhaün ñüdün o midin lidoun Aritaguagülei irumu le, ida luba hasagarun buiti lídangiñe lani Hesusu sákürifisiu? Arufudahati Hesusu lunti lan wadügün bián katei súdiniti:
1. Furendei humá luagu Bungiu luma luagu Hesusu. Ariñagati Hesusu lun Lúguchi le siélubei lidan aban furíei: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).
2. Winwan huméi le hafurendeirubei. Ariñagati Hesusu megei wamá wawinwanduni le larufudahabei. Kéiburi dan le lagumuchunbalin yanu le líchugubei luéigiñe aban wübü, ariñagati buidu lan ladüga sun gürigia le aganbubalin ani adügaléi le lubeibei (Lúkasi 6:46-48). Ítarameme, lidan amu dan, ariñagayati: “Anhein gunfuranda humá burí katei le ani adüga humeime, gúndaabadün” (Huan 13:17).
Hínsiñeti hamuga san hun laganwoundun hisubudin luagu Bungiu luma luagu Hesusu? Hínsiñeti hamuga hun heresibirun adundehani luáguti ida luba lan hawinwanduni le hafurendeirubei? Anihán fiu katei le gayaraabei líderagunün.
Aturiahani tídangiñeti Bíbülia
Íderagua laaña aturiahani tídangiñeti Bíbülia le wíchugubei maguburahanga saragu gürigia lun hakutihani le tariñagubei Bíbülia luma lun hafalaruni le hafurendeirubei lidan habagari.
Lun hasigirun afurendeira luagu aturiahani tídangiñeti Bíbülia le wíchugubei houn gürigia, ariha huméi páhina le gíribei Adundehani lun Haturiahanu Bíbülia.
Ariha huméi bidéu le gíribei Buiti achülürüni lidoun haturiahanu Lererun Bungiu lun harihini ida liña lan híchugun gefentiña luagu Heowá aturiahani tídangiñeti Bíbülia houn gürigia.
Adamuridaguni hani gefentiña luagu Heowá
Óundaraguatiña gefentiña luagu Heowá bián wéiyaasu luagu dimaasu tidan Luban Hadamuridagun. Lidan burí adamuridaguni le, akutiha wamutu Bíbülia luma ida luba lan wafalaruni le tarufudahabei lidan wabagari.
Gayaraati hachülürün furumiñeguarügü gürigia lidoun adamuridaguni le; ani mama mosu aban humá gefenti luagu Heowá lun gayara lan hachülürün ñein. Según le gádanbalün, gayaraati houdin tidan Luban Wadamuridagun o gayaraati hebelurun lídangiñe Internet.
Ariha huméi bidéu Ka adügǘbei lidan wadamuridagun? lun hasubudiruni ida liña lan ladügǘn wadamuridagun.
Darí huméi adamuridaguni le yarafatimabei hun lidan páhina le gíribei Adamuridaguni le hadügübei gefentiña luagu Heowá lidan Internet.
Ariñahani luma burí bidéu lidan Internet
Saragu lídangiñe ariñahani luma burí bidéu le lídanbei Internet, gayaraabei líderagunün lúntima hafurendeirun luagu le larufudahabei Hesusu luma luagu lebegi sákürifisiu le ladügübei.
Kei hénpulu, lun hafurendeirun ida liña lan lanügün lounwen aban wügüri saragu buiti houn míñunu gürigia, aliiha huméi ariñahani le gíribei “Ida liña lasalbaruniwa Hesusu?” luma “Ka meha uagu lasufurira Hesusu hilá ligía?” o ariha huméi bidéu Ka uagu lounwe Hesusu?