AGAGUDÚAÑU HUMÁ!
Ligaburi harihini kristiánugu wuribu | Ka san tariñagubei Lererun Bungiu?
Arufuda laali wuribu le Ukraniabei ínchaha hamaniña tábutigu ligilisi gürigia lun hawuribuhan. Ariha huméi ida liña lan houdin luéigiñe lóubadina wuribu:
“Busentiwa wíchugun uéiriguni luma lun wíchugun seremei houn sun ha awuribuhabaña luéigiñe lufulesein Ukrania le hageira […]. Subudi huméi awanhein lan huma lun wíderagunün ani furíeitiwa huagu” (metropolitano Epifanio I lídangiñe Kyiv, The Jerusalem Post, 16 lidan ǘrüwa-hati, irumu 2022).
“Dimaasu le ásügürübei, arisarati tábuti ligilisi ortodóksa Rusa hama súdaragu Rusiana le ídanbei línchahaña lun hageindagun luéigiñe hageira lidan aban igaburi le súdararügüñanu Rusiana adügei. Lanwoun lira, aniheingua Moskú hau lisudaranigu Ukrania” (Reuters, 3 lidan gádürü-hati, irumu 2022).
Lunti san houdin kristiánugu awuribuha? Ka tariñagubei Lererun Bungiu?
Le tariñagubei Bíbülia
Afuranguagüdatu Bíbülia ha lan afalarubalin Kristu mídintiña awuribuha.
“Areidabóun befeinte; ladüga sun ha áfarahatiña tau eféin, tauba giñe eféin hafarúa” (Matéu 26:52).
Anhein ánhara aban gürigia lun ñein lan wuribu o lageindagun lidan, larufuduña san gaganbadi lun le lariñagubei Heusu?
“Níchigaali iseri gumadi le hun: Lun hínsiñegua humá húmagua. Ítara kei hínsiñe nun, lunti giñe hínsiñegua humá húmagua. Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:34, 35).
Anhein ánhara aban gürigia lun ñein lan wuribu larufuduñein san ínsiñeni le asubudiragüdübaliña kristiánugu ítara kei lariñaguni Hesusu?
Anhein busén hubéi lanwoun ariñahani, aliiha huméi “El cristianismo y la guerra: ¿son compatibles?”.
Ligaburi harihini kristiánugu ha uguñebaña weyu wuribu
Le san lúgubu lunti lan mádaragun hama kristiánugu houngua lidoun wuribu uguñe weyu? Anha. Arufudahatu Bíbülia wawinwanduba lan buga lidan aban dan —le subudiwabei kei “lagumuhóun dan”— ñéinbaña lan buga gürigia ha lídangiñetiña sun néchani ha lúnbaña mibihin hamá “arufudahani lun wuribu” ítara kei larufudahani Hesusu (Isaíasi 2:2, 4).
Anhein busén hubéi hasubudirun lanwoun, aliiha huméi ariñahani le tídanbei garüdia La Atalaya “¿Qué piensa Dios de las guerras?”.
Málühali Heowá, a le “Lubungiute darangilaü”, esefuraña gürigia ha asufurirubaña ladüga wuribu (Filipuna 4:9; Sálumu 72:14).
Lun hasubudiruni ida luba lan ladügüni, ariha huméi bidéu Katei san Larúeihan Bungiu?
a Heowá líribei Bungiu (Sálumu 83:18).