AGAGUDÚAÑU HUMÁ!
Ladügün wuribu le Ukraniabei lun laganwoundun ilamaü ubouagu
Weyu 19 lidan seingü-hati, irumu 2022, lidan aban adamuridaguni le hadügübei lílana fánreinti tánina ONU le arihibei lau ichouruni, le ídanbei gafanran hamá 75 úfisigu ha íñuti habara, ariñawagúati “lanwoun lan le adüga láalibei sandi COVID-19 luma lasansiragun ligaburi dan, ladügüba lan wuribu le Ukraniabei lúntima laganwoundun ilamaü ubouagu”. Murusun dan lárigiñe, furiti aban ariñahani tidan garüdia The Economist luagu ladügüña lan wuribu lúntima labuinchun ubóu —le murusunrügaalibei lemegeirun lun lagadeirun sunsuinagubei— lau aban lanarime ilamaü. Ariñaga tumuti Bíbülia luagu ñeinbei lan buga ilamaü libe lira lidan wadaani, ani rutu giñe adundehani woun le gayaraabei líderaguniwa awanda.
Ariñagatu Bíbülia ñeinbei lan ilamaü
Ariñagati Hesusu lidan profesía: “Lageindaguba aban ageiraü luma aban, lawuribuhaba aban fulasu luma aban; ñeinbei ilamaü” (Matéu 24:7).
Tidan líburu tídangiñetu Bíbülia to gíriboun Arufudúni, ayanuhóuati kei hénpulu hawagu gádürü agalufehatiña gabayu. Aban hádangiñe agalufehatiña hagía, wuribu mini lubéi. Le ñǘbuinbei lárigi, ilamaü mini lubéi. Ayanuhati profesía luagu aban dan le ídanba lubéi késibei lan éigini ani íñubei lan lebegi. “Aba narihin aban gabayu wuriti; ñeinñein aban balansu lúhaburugu le wariñubei luagu. Aba naganbun lariñagun aban umalali […]: ‘Biánrügüla líburu türigu luagu lebegi aban weyu wadagimanu, sisi líburu sewada ligiaméme ebegi’” (Arufudúni 6:5, 6).
Lagunfuliruña profesía tídangiñeti Bíbülia le uguñe weyu, aban dan le unbei tagúara Bíbülia “lagumuhóun dan” (2 Timotéu 3:1). Anhein busén hubéi lanwoun ariñahani luáguti “lagumuhóun dan” luma hawagu gádürü agalufehatiña gabayu ha uágubaña tayanuha líburu Arufudúni, ariha huméi bidéu En 1914 el mundo cambió de rumbo ani aliiha huméi ariñahani “¿Qué representan los jinetes del Apocalipsis?”.
Ida liña tíderaguniwa Bíbülia?
Rutu Bíbülia adundehani buiti le íderagubaliwa agagibudagua luma burí sügǘ hénrenguti, kéiburi liñurun lebegi éigini luma likesinga. Ariha humá fiu lídangiñe lidan ariñahani “Cómo vivir con menos”.
Rutu giñe Bíbülia emenigini woun luagu laranseraguba lan sun katei. Füramasetu lachülürüba lan aban dan lun ñein lan “saragu türigu fulasurugu” ani ua ligíame ilamaü (Sálumu 72:16). Lun hadarirun lanwoun ariñahani luagu lubuidun emenigini le luma ka lan uagu gayara lubéi hafiñerun luagu, aliiha huméi ariñahani le gíribei “La esperanza real de un mañana mejor”.