24 lidan bián-hati, irumu 2022, lubaroun larugan, aba hebelurun lisudaranigu Rusia ageiroun Ukrania, lau sun yebe áfaagua hamá saragu alidihatiña lidan ubóu lun hararamuni wuribu. Ka gayaraabei ladügüni wuribu le lidan sun ubóu? Fiu weyu guentó, ariñagati António Guterres, seküretáriu tani Óundaruni hani Néchani, lanügüba lan wuribu le, saragu asufuriruni luma günringuaü houn gürigia, gidaléime ichouruni dandu Yuropagiñe kei lídangiñe sun ubóu “wéiriyabei wuribani le lunbei ladügüni darí lun siñá lan wafuranguagüdüni”.

•   Ariñagati Hesusu lidan aban profesía lachülürüba lan buga dan lun lageindagun “aban ageiraü luma aban, [luma lun] lawuribuhaba aban fulasu luma aban” (Matéu 24:7). Aliiha huméi ariñahani “¿Cuál es la señal de ‘los últimos días’ o de ‘los tiempos finales’?” lun harihini gúnfuli lan wuribu le aniheinbei uguñe weyu según profesía le lariñagubei Hesusu tidan Bíbülia.

•   Ayanuhatu líburu Arufudúni luagu wuribu kamá aban gürigia le wariñubei luagu “aban gabayu funati” le unbei lichugúa ubafu “lun lagidaruni darangilaü ubouagugiñe” (Arufudúni 6:4). Lun hasubudirun lanwoun, aliiha huméi ariñahani “¿Qué representan los jinetes del Apocalipsis?” lun harihini ka lan uagu úara lubéi wuribu le aniheinbei uguñe weyu luma le lariñagubei profesía.

•   Ayanuhatu liliburun Danieli luagu “lurúeite nórute” luma “lurúeite suru” ani ariñagatu ñeinbei lan gáganiguaü haganagua (Danieli 11:25-45, TNM). Ariha huméi bidéu Lagunfulirun profesía le lídanbei Danieli kapitulu 11 lun gunfuranda humani ka lan uagu lariñawagúa Rusia lan hama ha lúmagiñebaña lurúeitebei nórute. a

•   Ayanuhatu giñe líburu Arufudúni luagu “wuribu le lánina óunwenbu luéyuri Bungiu le Suntigabafu” (Arufudúni 16:14, 16). Lau sun lira, wuribu le mama aban wuribu le ídanbei hageindagua néchanigu hámagua, kei warihini uguñe weyu. Aliiha huméi ariñahani “Ka san Arümahedónbei?” lun hasubudirun amu katei luagu wuribu le.

•   Ariñagatu Lererun Bungiu lagumuchuba lan Bungiu lau “wuribu chülǘ lumoun lagumuhóun larigeirugu ubóu” (Sálumu 46:9). Aliiha huméi ariñahani “La esperanza real de un mañana mejor” lun hafurendeirun amu katei luagu lani Bungiu füramasei.

•   Arufudahati Hesusu houn lani disipulugu lun hafurieidun lun liabin Larúeihan Bungiu (Matéu 6:9, 10). Siéluñein arúeihani le ani ladügübei asansiruni le labusenrubei Bungiu ya Ubouagu, laganagua asansiruni burí le ñeinbei darangilaü lidan sun Ubóu. Ariha huméi bidéu Katei san Larúeihan Bungiu? lun hasubudiruni ka lan gayaraabei ladügüni arúeihani le huagu.

 Añahein hóugiñe 129,000 gefentiña luagu Heowá Ukrania. Ítara kei sun Gefentiña ha lídanbaña sun ubóu, áyeiha hamuti lani Hesusu hénpulu ani mádaraguntiña houngua lidoun lageindagun ageiraü. Ligía mádaragun habéi houngua lidoun katei le lánina polítika midin hagía awuribuha (Huan 18:36). Sigitiña gefentiña luagu Heowá lidan sun fulasu apurichihei “uganu buiti le luáguti larúeihan Bungiu”; Arúeihani le, ligía láranibei haturobulin gürigia ubouagu luma wuribu (Matéu 24:14). Agunbiraha wamutün lun habürühan woun luéigiñe Internet lun hafurendeirun luagu emenigini le tíchugubei Lererun Bungiu.