Leindi 6 lidan bián-hati, irumu 2023, aba lánhingichuni lanarime burí hárabaganali ageiraü Turükía luma Siria.

•   “Leindi le ásügürübei, dagati aban hárabaganali le hanarimeti lere le adügati lun hóunwegun hóugiñe 3,700 gürigia lidan aban fánreinti wéiriti lánina ageiraü Turükía luma luagun norueste libiti Siria. Ani lanwoun lira, adügati lanarime lidiliga, lúntima wuriba lan le hásügürüni saragu milu gürigia ha abuleseirubaña ani rédeitiña saragu hádangiñe mábanga. Adügati giñe lanarime lidiliga lúntima hénrengu lan lun háluahouniwa gürigia ha wínwangiñabaña” (Reuters, 6 lidan bián-hati, irumu 2023).

 Dan le waliihan luagu sügǘ hénrenguti kéiburi le, gáriti tun wanigi. Lidan burí sügǘ ítarati, gayaraati wáluahani lídehan Heowá, Bungiu le aranseñubei “lun líchugun gurasu woun” (2 Korintuna 1:3). Adüga lumuti le mégeiwabei lun wibihini gurasu luma dǘgüdaguaü tídangiñe Lererun, “gayara láamuga wemenigidúntima” (Rómana 15:4).

 Tidan Bíbülia, furendeitiwa ariñahani kéiburi:

•   Profesía le ayanuhabei luagu burí hárabaganali.

•   Halía gayara lan wadarirun gurasu luma emenigini.

•   Kaba ladüga Bungiu lun lagumuchun lau sun asufuriruni.

 Anhein busén hubéi hasubudiruni ka lan tariñagubei Bíbülia luagu burí tema le, aliiha huméi ariñahani le gíribei:

•   “Grandes terremotos: ¿qué fue lo que predijo la Biblia?”.

•   “¿Dónde hallar esperanza?”.

•   “Málühali Bungiu agumucha lau asufuriruni”.