AGAGUDÚAÑU HUMÁ!
Le lunbei wadügüni lun hemenigi wamá lidan irumu 2024 | Ka tariñagubei Bíbülia?
Buin luba irumu 2024 lau turobuli ani saminatiña saragu gürigia máranina lan turobuli burí ligía. Íbini ítara, gayaraati wadarirun emenigini lubá ámuñegü. Halía?
Rutu Lererun Bungiu emenigini woun
Füramasetu Bíbülia laransehabei lan Bungiu sun turobuli le adügübei lun wasaminarun ua lan emenigini. Málühali aragahei “sun háguira [gürigia]; úaalime óunweni ni ayahuni ni íruni ni igarigu” (Arufudúni 21:4).
Lun hasubudirun lanwoun, aliiha huméi ariñahani le gíribei “La esperanza real de un mañana mejor”.
Ida luba tíderagunün Bíbülia uguñe weyu?
Rutu Bíbülia emenigini lubá ámuñegü ani gayaraati líderagunün emenigini ligía lun hagagibudagun luma luriban saminaü luma lun harihini ibagari lau aban lubuidun igaburi (Rómana 15:13). Gayaraati giñe líderagunün adundehani le tídanbei asubudirei ida luba lan hagagibudagun luma burí turobuli le úmabei hadunragua uguñe weyu, kéiburi gudemei, marichaü o sandi.
Ariha huméi ida liña lan líderaguni emenigini le tídanbei Bíbülia aban wügüri adarira darangilaü luma ugundani íbini lidan lan meha lanarime gudemei laweirida. Ariha huméi bidéu Juan Pablo Zermeño: Rúhali Heowá aban ibagari gasuuniti nun.
Ariha huméi ida luba lan tíderagunün Lererun Bungiu agagibudagua luma ligaburi hasandiragun hungua lárigiñe lounwen somu hiduhe luma dan le hasandiragun hungua lau duru, lau íruni o lau liibe saminaü. Aliiha huméi ariñahani le gíribei “¿Puedo encontrar consuelo en la Biblia?”.
Ariha huméi ida liña lan meha tadarirun aban würi emenigini tidan Bíbülia lárigiñebei tasudarahan luagu saragu irumu ani ariñaga tuguya tuougua aban lan meha gürigia “hírutu ani meberesenhábutu” tuguya. Ariha huméi bidéu le gíribei Cambié las armas por la Biblia.
Hínsiñeti hamuga san hun lun aban lan irumu le buiti hun luma houn hiduheñu irumu 2024? Gayaraati tíderagunün Bíbülia. Houcha huméi ida liña lan aturiahani tídangiñeti Bíbülia le wíchugubei maguburahanga luagu, furendei humaamugei ida luba lan líchuguni Bungiu “dan le lunbei liabin buin lau emenigini hun” (Heremíasi 29:11).