AGAGUDÚAÑU HUMÁ!
Holocausto: Háfaragun nasi saragu huríu hama gefentiña luagu Heowá | Ka tariñagubei Bíbülia?
Weyu 27 lidan eneru, irumu 2023, hefeduhabei saragu gürigia Luéyuri Laritaguagüle Háfaragun nasi saragu Huríu. Háfuga álügüdagua humá hungua ka lan meha uéigiñe lígira Bungiu lun lasuseredun lueirin áfarahani le, le barühalibei lóugiñe 75 irumu lúmagiñe lasuseredun.
Lun hasubudiruni le tariñagubei Bíbülia, aliiha huméi ariñahani le gíribei “Ka uagu lígira Bungiu lun háfaragun nasi saragu huríu lidan lidaani Libiaman Wuribu Wéiriti?”.
Áfarawaguatiña meha saragu míñunu huríu aban lárigi aban. Ani éibaahouatiña giñe, áfarawagua hagía amu burí gürigia lidan dan ligía. Añahein meha gefentiña luagu Heowá haganagua, ha meha éibaahoubaña ladüga hafiñen luagu le tariñagubei Bíbülia.
Lun hasubudirun lanwoun katei le, aliiha huméi ariñahani le gíribei “Qué les ocurrió a los testigos de Jehová durante el Holocausto?”.
Aban emenigini lubá ámuñegü
Dan le hasaminarun saragu gürigia luagu gayaraaya lan lasuseredun katei le, aba hasandirun anufudei. Gama lumoun, ruti darangilaü woun wasubudiruni ariñaga tan Bíbülia maweiyasunbei lan aban katei ítarati asusereda lidan dan le lunbei liabin.
“Subudi numuti naransehan hubá, aransehani lun buiti mama lun wuribati hun, lun gayaraabei lan níchuguni dan le lunbei liabin buin lau emenigini hun. Au, le Aburemei ariñagubalin” (Heremíasi 29:11). a
Lagunfulirubei Heowá füramasei le danme le lagumuchun hau sun wuribatiña ani aransehaleime sun wuribani le adügǘwaalibei ubouagu. Málühali Bungiu adüga katei kéiburi le:
Lagumuchuba hau gürigia wuribatiña ha adügatiña wuribani houn amu (Ariñawagúni 2:22).
Lareidaguagüdübaña sun ha asufurirubaña, chülüdügaameti dan lun hasandirun aban lueirin awalidaguni (Arufudúni 21:4).
Lagiribudagüdübei habagari sun ha hilaguaañabaña ya ubouagu houn (Huan 5:28, 29).
Gayaraati hafiñerun luagu emenigini buiti le tíchugubei Bíbülia. Anhein busén hubéi hasubudiruni ka lan uagu, agunbiraha wamutün lun haturiahanu Bíbülia wama mafayeihanga.
a Heowá líribei Bungiu (Sálumu 83:18, Traducción del Nuevo Mundo).