AGAGUDÚAÑU HUMÁ!
Hóufudahañein aturiahatiña siensia Lidaani Luéyuri Aguseragüdüni | Ka tariñagubei Bíbülia?
Weyu 24 lidan eneru, irumu 2023, hóufudahañein aturiahatiña siensia Lidaani Luéyuri Aguseragüdüni, a lidan amu dimurei, lagumuchagun ubóu.
“Luagu-biama, lidan dimaasu le, yarafatimaahali liabin Lidaani Luéyuri Aguseragüdüni, lidan amu dimurei, lun larihín lanarime turobuli le úmati hagagibudagun gürigia, ladüga luwuribun Ukrania, anufudei luéi lasuseredun aban wuribu wéiriti lidan sun ubóu sódini luma lasansihan ligaburi dan” (Servicio internacional de noticias de la agencia AFP).
“Luagu-biama le, ariñagatiña aturiahatiña siensia luagu furesegueina liña lan léibaagun lagusate wachi lánina Luéyuri Aguseruni darí lun gádürü-wein-díisirügaali lan segundu, lidan amu dimurei, yarafatimarügaali lan lagumuchagüle ubóu” (ABC News).
“Ariñagatiña fiu aturiahatiña siensia lídangiñe ámuñegueinarügü ageiraü, úagili lan meha dencha lan habagari gürigia keisi uguñe weyu” (The Guardian)
Yarafaali san hagumuchagüle gürigia luma lun lagumuchun ubóu? Mosu san wanufudedun luéi le lunbei liabin yarafa madise? Ka tariñagubei Bíbülia?
Le lunbei lasuseredun yarafa madise
Ariñagatu Bíbülia “masansiragunti ubóu” ani “galagantehabei gürigia buítiña múa, haganóuba giñe lidan súnwandan” (Apurichihati 1:4; Sálumu 37:29). Ligíati, magünrinchagun habéi gürigia múa o ubóu, madügün hagíame lun mawinwandúniwa lan ñein.
Lau sun lira, ayanuhatu Bíbülia luagu aban agumuchagülei. Kei hénpulu, ariñagatu “ubóu, agumucheina liña” (1 Huan 2:17).
Anhein busén hubéi hasubudiruni ka lan uagu tayanuha Bíbülia dan tariñagun agumucheina liña lan ubóu, aliiha huméi ariñahani le gíribei “¿Se acerca el fin del mundo? ¿Qué es el apocalipsis?”.
Lun hasubudiruni ka lan tariñagubei Bíbülia luagu kaba lan asusereda lidan sun ubóu, aliiha huméi ariñahani le gíribei “¿Cuándo será el fin del mundo?”.
Kipu humá aban lubuidun igaburi
Íderagua tumutiwa Bíbülia lun wakipurun aban lubuidun igaburi íbini luriban burí katei le ubouagubei. Ida liña tadügüni?
Rutu Bíbülia adundehani huuti woun (2 Timotéu 3:16, 17). Kei hénpulu, anhein busén hubéi hasubudiruni ida luba lan tíderagunün Bíbülia lun hakipurun aban igaburi buiti, íbini sun wuribu burí le úmabei wagagibudagua, aliiha huméi ariñahani le gíribei “Qué puedo hacer para no preocuparme tanto”.
Rutu Bíbülia aban emenigini chóurutu woun lubá ámuñegü (Rómana 15:4). Ariñaga tumuti woun ka lan gayaraabei wagurabuni yarafa madise luma uguñe weyu, íderagua tumutiwa giñe lun chouru lan wasandiragun woungua lun wagagibudagun luma sun le lunbei lasuseredun ubouagu.
Lun gayaraabei lan hasagarun saragu buiti tídangiñe Bíbülia, agunbiraha wamutün lun hagumeserun aturiaha Bíbülia wama.
a “Yúsuati Lidaani Luéyuri Aguseragüdüni kei aban sínbolu lun hawisarúniwa sun gürigia yarafatimaahali lan lagumuchun habagari sun gürigia ladüga burí teknolohía denchati le adüga wamaalibei. Aban aritaguagülei lira lun gayara lan waranseruni sun turobuli le aniheinbei anhein busén wabéi wasigirun awinwanda ubouagu” (Bulletin of the Atomic Scientists [Boletín de Científicos Atómicos]).