AGAGUDÚAÑU HUMÁ!
Gayaraati san hóuseragun sun gürigia houngua lau úarani? | Ka tariñagubei Bíbülia?
Ariha hamuti saragu gürigia hóuseragun sun gürigia houngua lau úarani, kei aban katei le hénrenguti lun libihín.
“Lidan sun ubóu, ítara liña luriban houserún sun gürigia ladüga hakolorun, hageira o katei líbeina lira, kei aban péisini le arihúbei tidan burí óundaruni o sétanu hani gürigia luma lidan habagari gürigia sagü weyu. Anihán katei le adügübei lun fánreinguañu hamá gürigia” (António Guterres, seküretáriu tani Óundaruni hani Néchani).
Lachülürüba san dan lun hóuseragun gürigia houngua lau úarani? Ka tariñagubei Bíbülia?
Le lasaminarubei Bungiu luagu hóuseragun sun gürigia houngua lau úarani
Afuranguagüda tumuti Bíbülia ida liña lan larihiniña Bungiu gürigia ha ámuñegueinarügüti harasan.
“Lídangiñe ábanrügü wügüri ladügaña [Bungiu] sun néchanigu lun haganóun lidan sun ubóu” (Adügaü 17:26).
“Úati […] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei, lídangiñe hamá yebe furumiñeguarügü néchani” (Adügaü 10:34, 35).
Ariñagatu Bíbülia ábanmeme lan iduheñu sun gürigia ani anha lan Bungiu houn sun gürigia ha lídangiñetiña ámuñegueinarügü rasa.
Ida luba libihín hóuseragun sun gürigia houngua lau úarani?
Ladügüba Larúeihan Bungiu, le siélubei, lun ñein lan úarani hadan sun gürigia. Larufudahaba arúeihani le houn sun gürigia lun buidu lan hóuseruniña amu, hafurendeiruba gürigia agidarei luriban saminaü le hasandirubei hawagu lílana amu rasa.
Lidan sun Ubóu, “hafurendeirubei gürigia irichaü” (Isaíasi 26:9).
“Lanügüba irichaü, darangilaü luma emenigini lun súnwandan” (Isaíasi 32:17).
Uguñe weyu, hafurendeiruña saragu míñunu gürigia tídangiñe Bíbülia ida luba lan hóuseruniña amu lau inebesei.
Anhein busén hubéi lanwoun ariñahani, aliiha humóun garüdia Agaguduabá! to gíriboun “Lárani mínsiñehabuni”.
Lun hasubudiruni ida luba lan hayanuhan agübürigu hama hasaanigu luagu tema le, ariha huméi ariñahani “¿Cómo hablar con sus hijos sobre el racismo?”.