Lidan sedü-hati, irumu 2022, arihúaali lidan sun ubóu hanarimetimahali lan lárouga.

•   “Lidan hati le, ariñawagúati bián wéiyaasu lidan ñunsu China, ñeinbei lan aban lanarime lárouga lidan kéiburi 70 uburugu China” (25 lidan sedü-hati, irumu 2022, le ñéingiñe lubéi lichugúniwa ñunsu lidan CNN).

•   “Adügaali lanarime lárouga lun ñein lan saragu gudáü Yuropa” (17 lidan sedü-hati, irumu 2022, The Guardian).

•   “Lidan dimaasu le ásügürübei, lidan saragu fulasu Meriga, wéiritimati lueirin lárouga sügǘ lau dan le susereelibei lidan burí fulasu le ñéingiñe lubéi laboucha weyu, fiu uburugu le luágunbei suru, luma lidan fulasu le ñeinhin lubéi lálüda weyu” (24 lidan sedü-hati, irumu 2022, The New York Times).

 Mini lan san lira siñabei lan wawinwandun ámuñegü ya ubouagu? Ka tariñagubei Bíbülia luagu le?

 Anha. Gániti lanarime lárouga le aniheinbei uguñe weyu luma le tariñagunbei luagu le lunbei lasuseredun lidan wadaani. Kei hénpulu, ariñagati Hesusu warihiba lan buga “katei hanufunati [...] luma óunwenbu burí seini” (Lúkasi 21:11). Hanufudetiña saragu gürigia luagu aganwoundeina liña lan lárouga ani adügati lira lun hasaminarun hagumuchuba lan gürigia lau Ubóu.

 Uá. Ladüga adüga lumuti Bungiu Ubóu lun hawinwandun gürigia lidan súnwandan (Sálumu 115:16; Apurichihati 1:4). Mígirunbei Bungiu lun hagünrinchaguni gürigia ubóu. Lubaragiñe lira, ariñagaali lagünrinchagubaña lan “ha agünrinchagubalin ubóu” (Arufudúni 11:18).

 Ariha wamá bián profesía le arufudubalin kábaya lan ladüga Bungiu lau Ubóu:

•   “Gundaalá fulasu mageirawati, múa mábeiti; buinla lau ugundani, legeleweha” (Isaíasi 35:1). Mígirunbei Bungiu lun lítaradun Ubóu kei aban fulasu mageirawati, laranserubei sun katei wuribati le adügǘwaalibei lun Ubóu.

•   “Góunigi bumuti múa lau báhuyagüdün luagun; aba babuiduragüdüni lun ábunaguni” (Sálumu 65:9). Ladügüba Bungiu lun ábanbei lan Paraísu Ubóu.

 Lun hasigirun afurendeira ida liña lan lagunfulirun profesía luáguti ligaburi lasansiragun dan, aliiha huméi ariñahani “Qué dice la Biblia sobre el cambio climático y nuestro futuro?”.

 Lun hasigirun afurendeira luagu le tariñagubei Bíbülia labuiduruba lan ligaburi dan ámuñegü, aliiha huméi ariñahani “¿Quién salvará el planeta?”.