AGAGUDÚAÑU HUMÁ!
Ka uagu líbebei iyereehabúni? | Ka tariñagubei Bíbülia?
Dan le warihin o waganbahan ñunsu, arihatiwa ayanuhóua lan saragu luagu wuribu, luagu iyereehabúni luma luagu lagayuahóun hawagu gürigia ladüga lílana hamá amu rasa.
“Wéiriti laganbahóuniwa luagu iyereehabúni lidan Interneti lúmagiñetima lagumeserun wuribu Ísüraeli luma Gasa ani sun le, gürigia ha ganigitiña wuribani aburuchaguagüdübalin” (The New York Times, 15 lidan unsu-hati, irumu 2023).
“Lúmagiñe 7 lidan diisi-hati, ariha hamaali sun gürigia lanarime laganwoundun iyereehabúni, laganbahóun yanu luáguti iyereehabúni luma lagayuahóun hawagu gürigia ladügaméme iyereehabúni, ani sun le barüti idiheri” (Dennis Francis, tábuti Óundaruni hani Néchanigu, 3 lidan unsu-hati, irumu 2023).
Mama aban katei iseriti laganbahóuniwa ñunsu luáguti iyereehabúni, anarimeni luma wuribu. Le linarün katei, ayanuhatu Bíbülia hawagu wügüriña ha meha fásitiña ani ariñagatu ítara liña lan meha hererun kei gimara (Sálumu 64:3; 120:7; 140:1). Ariñagatu Bíbülia mama lan ítaraguarügüti iyereehabúni le warihini uguñe weyu.
Iyereehabúni: aban seini lánina wadaani
Ariñagatu Bíbülia anihein lan bián resun le adügübei lun ñein lan saragu iyereehabúni uguñe weyu.
1. Ariñagatu Bíbülia lachülürüba lan aban dan lun heferidiruni hiibe-agei gürigia hínsiñehabu (Matéu 24:12). Ligíati, lubaragiñe hamuga hóuseruniña amu lau ínsiñeni adügarügütiña lun ñein lan iyereehabúni (2 Timotéu 3:1-5).
2. Ariñagatu Bíbülia “lábugiñeñanu lan lubafu Mafia sun ha lánigubaña ubóu” (1 Huan 5:19; Arufudúni 12:9, 12). Sun lubeiti iyereehabúni le warihibei ubouagu uguñe weyu, lúmagiñe Mafia liabin.
Ariñagatu Bíbülia lagidarubei lan Bungiu iyereehabúni ubouagugiñe sunsuinagubei yarafa madise. Le linarün katei, lareidaguagüdübei sun igarihabu le lanügübei iyereehabúni. Füramasetu Bíbülia:
“Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (Arufudúni 21:4).