AGAGUDÚAÑU HUMÁ!
Kaba esefuraña lílana ageiraü? | Ka tariñagubei Bíbülia?
Ariñawagúati lidan aban ariñahani túmagiñetu Óundaruni hani Néchani:
Lúmagiñe 7 darí 23 lidan diisi-hati irumu 2023, hilaguatiña hóugiñe 6,400 gürigia ani hiti laña balu o bonba 15,200 lidan wuribu le asuseredubei Gasa luma Ísüraeli, lílana ageiraü hiibe-agei hádangiñe. Lanwoun lira, anurahatiña saragu milu gürigia.
Lúmounbei 24 lidan nefu-hati irumu 2023, adügati wuribu le asuseredubei Rusia luma Ukrania lun hóunwegun 9,701 lílana ageiraü ani hiti laña balu o bonba 17,748 gürigia Ukrania.
Gayaraati funa san tíchugun Bíbülia emenigini houn ha asufurirubaña ladüga wuribu?
Anihein emenigini
Ariñagatu Bíbülia lagumuchuba lan Bungiu lau “wuribu chülǘ lumoun lagumuhóun larigeirugu ubóu” (Sálumu 46:9). Lun lira, layusurubei Larúeihan le siélubei lun lagumuchun lau sun arúeihani ubouaguna (Danieli 2:44). Lanügüba Larúeihan Bungiu awalidaguni houn gürigia ya ubouagu.
Teni humá lun le lunbei ladügüni Hesukrístu, le Lurúeite Larúeihan Bungiu:
“Lesefurubaña gudemetiña ha ayumuragubaña, hama giñe ha míderawagunbaña. Gudemehabubei houn ha gudemebaña, lesefurubei habagari gudemetiña. Lesefurubaña hawéi ha óuseragubaliña” (Sálumu 72:12-14).
Layusurubei Bungiu Larúeihan lun lagumuchun lau sun asufuriruni luma íruni le lanügübei wuribu luma anarimeni.
“Laragahabei sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (Arufudúni 21:4).
Málühali Larúeihan Bungiu adüga lun labuidurun katei ubouagu. Ka uagu wariñagei le? Ladüga ariñagatu Bíbülia ñeinbei lan wuribu luma uganu luáguti wuribu uguñe weyu (Matéu 24:6). Arufudati le, luma amu burí sügǘ, wawinwanduña lan lidan lidaani lagumuchagüle harúeihan gürigia ubouagu (2 Timotéu 3:1).