AGAGUDÚAÑU HUMÁ!
Laduurawagun balu leskuelarugu | Ka tariñagubei Bíbülia?
Weyu 24 lidan seingü-hati, irumu 2022, susereti aban lanarime lamiselu lidan liraüraü uburugu Uvalde, (Texas, Meriga). Según le tariñagubei periodiku The New York Times, “áfarati aban wügüri 19 irahüñü hama bián máistara tau libisilédun tidan leskuela Robb”.
Híruti gabügürügua lan lasuseredun katei libe burí le. Ariñagatu periodiku USA Today lídanrügü lan Meriga, “susereti 249 aduuraguni tidan burí leskuela lidan irumu le ásügürübei —sügǘ luéi amu irumu lúmagiñe irumu 1970”.
Ka uagu lasusereda sun burí katei wuribati le? Ida luba hagagibudagun luma igarigu le lanügübei sun wuribani le? Gayaraati san wafiñerun lagumuchuba lan sun anarimeni le? Ru tumuti Bíbülia óunabagülei.
Ka uagu gíbetimahali lubéi anarimeni ubouagu eibu lásügürün dan?
Watu Bíbülia lun dan le ídanbei wawinwanda “lagumuhóun dan”, aban dan le ídanbei “mínsiñehabubaña” lan gürigia, “hanarimebaña”, hanarimebei luriban hóuserun ani magudemehabu hagíame. Ani “haribadatimaba” gürigia eibu lásügürün dan (2 Timotéu 3:1-5, 13). Anhein busén hubéi hasigirun afurendeira, aliiha huméi ariñahani “¿Predijo la Biblia cómo sería la gente en nuestros días?”.
Álügüdaguatiña saragu gürigia houngua ka lan uagu lígira Bungiu lun lasuseredun lanarime burí lamiselu le, kéiburi laduurawagun balu leskuelarugu. Lun hasubudiruni le tariñagubei Bíbülia, aliiha huméi ariñahani “¿Por qué le pasan cosas malas a la gente buena?”.
Ida luba hagagibudagun luma igarigu le lanügübei sun wuribani le?
“Sun le ariñawagúbei tidan Lererun Bungiu lúmagiñe binarü, lun larufudahóun woun labürühóua; bürüwati meha dimurei burí ligía lun wanügün gurasu […] lídangiñe, gayara láamuga wemenigidúntima luagu Bungiu” (Rómana 15:4).
Gayaraati líderagunün adundehani le tídanbei Bíbülia lun hagagibudagun luma anarimeni le lídanbei ubóu le. Anhein busén hubéi lanwoun ariñahani, aliiha humóun garüdia ¡Despertad! to gíriboun “¿Acabará algún día la violencia?”.
Anihein dan, aba burí hanufudedagun irahüñü dan le harihin o haganbun luriban burí ñunsu, anhein agübürigu hubéi ani busentün adundehani lun híderaguniña hirahüñü lun gunfuranda hamani ñunsu burí le, aliiha huméi ariñahani “El efecto de las noticias en los niños”.
Lagumuchuba san sun anarimeni?
“Lesefurubaña hawéi ha óuseragubaliña” (Sálumu 72:14).
“Hadaaguba awouhagülei tau hefeinte, adüga hagíame líbaaha sagadi lau arufun. Mageindagunhañame gürigia hámagua, marufudahóun ligíame houn lun wuribu” (Mikeasi 4:3).
Ladügübei Bungiu le hásiñarubei gürigia adüga. Lagumuchuba Larúeihan —aban arúeihani le siélubei— tau sun áruma luma lau sun anarimeni. Anhein busén hubéi hasigirun afurendeira luagu le lunbei ladügüni Larúeihan Bungiu, aliiha huméi ariñahani le gíribei “Ladügüba Larúeihan Bungiu lun ñein lan saragu darangilaü”.