•   “Anihán irumu létima ídanbei hanarime lan lárouga China ani anihán lǘrüwan lidaani lárouga létima mábeibei lúmagiñe hagumeserun abürüdei ida liña lan ligaburi dan ñein” (The Guardian, 7 lidan nefu-hati, irumu 2022).

•   “Agurabúati séingübei lan irumu gabügürüguati lau lumabeinouga lidan fulasu le gíribei Óunwenbu Ganchu lóubawagu Áfürika” (Ñunsu ONU, 26 lidan widü-hati, irumu 2022).

•   “Lóugiñe lamidan Yuropa lídanñein denchaü ladüga lumabeinouga, genegeti ligía lan lumabeinouga le hanarimetimabei lidan 500 irumu ” (BBC News, 23 lidan widü-hati, irumu 2022).

 Ariñagatiña saragu sásamu lasigiruba lan lumabeinouga le o laganwounduba lan. Gayaraati san wagurabun laranseraguba lan katei ámuñegü? Ka tariñagubei Lererun Bungiu?

 Anihán le tariñagubei Lererun Bungiu lubá wadaani:

•   “Ñeinbei [. . .] ilamaü lidan ámuñegueinarügü fulasu” (Lúkasi 21:11).

 Liibe-agei dan, barüti lumabeinouga ilamaü. Ánheinti ilamaü, barüti asufuriruni luma óunweni. Gúnfuli lumuti katei burí le profesía le tídanbei Lererun Bungiu (Arufudúni 6:6, 8).

 Arufuda tumuti Lererun Bungiu kátima lan lébunabei. Ariñagatu:

•   “Úati yu lan lun wügüri le éibugubei ladundehani lupasun guánarügü” (Heremíasi 10:23, TNM).

 Mini lan lira, siñabei lan buidu lan lidin houn gürigia ánhaña áluga hadundehani hapasun guánarügü o hagumadiragun houngua. Liibe-agei dan, adügati luriban burí katei le hanúadirubei lun ñein lan lumabeinouga luma likesin duna.

•   Hibe-agei aturiahatiña siensia ariñagatiña katei burí lan le adüga hamaalibei gürigia, lébunabei lanarime lárouga, ani ligía adügübei lun laganwoundun lumabeinouga lidan sun ubóu.

•   Adügati mébeha lan láluahoun irisini luma halurudun gumadimatiña lun marihin hamani gürigia wuribati le lunbei lanügüni táchuahoun tídibu wewe luma lawiyedún duna. Gayaraabei leferidirún saragu duna éibaaguati le yebe mégeiwabei.

 Lau sun lira, rutu Lererun Bungiu emenigini woun.

  Ariñagatu Lererun Bungiu lagidarubei lan lumabeinouga. Ida luba ladügüni?

1.  1. Lagünrinchagubaña Bungiu “ha agünrinchagubalin ubóu” (Arufudúni 11:18). Lagumuchuba lau aban lídangiñe lébuna lilouguan duna: gürigia wuribatiña ha mébehabei háluahan seinsu meberesenga hagadeiruni ubóu (2 Timotéu 3:1, 2).

2.  2. “Labuinchuba múa mábeiti lau lísensen duna” (Isaíasi 35:1, 6, 7). Laransehabei Bungiu sun wuribati le adüga láalibei lumabeinouga ani ábame ladügüni ubóu le lun aban lan paraísu lau saragu duna.

3.  3. “Góunigi bumuti múa lau báhuyagüdün luagun; aba babuiduragüdüni lun ábunaguni” (Sálumu 65:9). Lau labinihan Bungiu, buin luba ubóu lau éigini buiti luma duna harumati houn sun gürigia.