Arufudati aban akutihani le málügilibei lúmagiñe ladügǘn lidan sun ubóu, a hádangiñe lan kada gádürü gürigia, anihein lan aban le sandiguati lungua lábugua.[1]

•    “Furumiñeguarügü gürigia —meberesenga lirumudiri o halía lan leredera— gayaraati lasandiragun lungua lábugua dan le manaagun lan lungua hama amu” (Chido Mpemba, habiaman tílana Óundaruni to Arihiboun lau Átuadi lidan sun Ubóu ha arihubaña lau ligaburi hanaagun gürigia houngua).[2]

 Amu luéi le hasaminarubei saragu gürigia, mámarügüñanu wéiyaaña mutu o ha awinwandubaña hábuguarügü, asandiragua houngua hábugua, gayaraati giñe lasuseredun le houn nibureintiña ha masanditiña, maríeihaña ani buiti lidin houn lidan habagari. Dan le hadisedagun gürigia hawariuagua, manaagun hagía houngua hama amu, gayaraati ladügün katei le lun ladagarun sandi hawagu luma lun wuriba lan hasandiragun houngua.

•    “Mama aban katei le gayaraati lanügǘniwa kei ni kata lasandiragun gürigia lungua lábugua —liña Vivek Murthy, surusia le arihibei lau hátuadi gürigia Meriga— ítara liña lanarime láfarahadi manaagun lan gürigia lungua hama amu kei láfarahadi lagumulahan gürigia keinsi sígaru luagu weyu”.[4]

 Mabusenrunti Bungiu le adügübaliwa lun díseñaha wamá hawéi ha híbiri gürigia. Le labusenrubei lúmagiñe furumiñeti dan, lun wásügürün lubuidun dan hama gürigia wáledigu luma hama umadagu buítiña.

•    Bérusu tídangiñeti Lererun Bungiu: “Lariñaga Wabureme Bungiu: ‘Mabuidunti lun lábuguarügü lan wügüri’” (Agumesehani 2:18).

 Busenti Bungiu lun gamadagua wamá luma. Füramaseti layarafaduba lan woun ánhawa áfaagua wayarafadun lun (Santiagu 4:8).

•    Bérusu tídangiñeti Lererun Bungiu: “Fuleseiwatiña ha asubudirubalin luagu megei hamani lídehan Bungiu, ladüga ménrengubei houn lun hebelurun lidoun larúeihan Bungiu” (Matéu 5:3).

 Busenti Bungiu lun walawahani úara hama amu gürigia. Dan le wadügüni ítara, gúndaatimati wasandiragun woungua.

•    Bérusu tídangiñeti Lererun Bungiu: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun lumuti wafalaruni hénpulu hani ha héchubaña lun midin hamá lidan wadamuridagun, lubaragiñe lira, ru wamá gurasu houn wíbirigu” (Ebüréu 10:24, 25).

 Lun hadarirun lanwoun ariñahani luáguti ka lan uagu moun lumuti lubéi wígiraguagüdün woungua lun wasandiragun woungua wábugua, aliiha huméi ariñahani le gíribei “Soledad en la era de la comunicación”.