Ka tariñagubei Bíbülia luagu likesin éigini uguñe weyu?
“Úaalime ilamaü”. Arufuda lumuti dimurei le le habusenrubei gumadimatiña ubouagu habihin lun hagumuchun lau aban lídangiñe turobuli le aniheinbei ubouagu: hadügün lun ñein lan éigini houn sun gürigia ubouagu. a Lachülürüba san dan lun úaali lanme ilamaü ubouagu? Ka tariñagubei Bíbülia?
Ariñagatu Bíbülia ñeinbei lan likesinga uguñe weyu
Ariñagatu Bíbülia ñeinbei lan likesinga lidan wadaani, aban dan le unbei tagúara Bíbülia “lagumuhóun dan” (2 Timotéu 3:1). Mama Bungiu gadurunbei luagu likesin éigini. Lau sun lira, ariñaga laali woun lasusereduba lan (Santiagu 1:13). Ariha humá biama profesía tídangiñeti Bíbülia.
“Ñeinbei ilamaü [...] lidan saragu fulasu” (Matéu 24:7). Arufudati profesía le ñeinbei lan buga ilamaü lidan saragu fulasu ubouagu. Ariñagati aban ariñahani hámagiñeti gürigia ha arihubaña lau libihín luma lafanreinhóun éigini: “Mama hawanseruña lílana ubóu lidan háfaagun lun hagumuchun lau ilamaü, likesin éigini, luma lun ñein lan éigini buiti lun átuadi”. b Saragu míñunu gürigia lidan saragu ageiraü siñati habihini éigini le hemegeirubei. Le hírubei, hilá hamá saragu hádangiñe.
“Aba narihin aban gabayu wuriti; ñeinñein aban balansu lúhaburugu le wariñubei luagu” (Arufudúni 6:5). Lidan profesía le, dandu gabayu luma le wariñubei luagu, mini lan, ñeinbei lan ilamaü lidan lagumuhóun dan. c Balansu le lúhaburugubei le wariñubei luagu gabayu, yúsuati lun lepesahóun éigini. Lidan aniha lan agalufehati awansera, aba laganbúniwa aban umalali le ariñagubei liñuruba lan lebegi éigini, wéridiwa hagía gürigia lun hóunigiruni éigini (Arufudúni 6:6). Furanguti larufuduni katei le le asuseredubei uguñe weyu, ladüga saragu míñunu gürigia siñati hadeirun o hafayeihan luagu éigini le buiti lun átuadi.
Ida luba lagumuchún lau likesin éigini?
Ariñagaaña aturiahatiña ru lan múa saragu éigini le nófuti lun heigin sun gürigia ha ubouagubaña. Ligíati, ka adügübei lun ñein lan likesin éigini? Ani ka tariñagubei Bíbülia luagu Heowá, d le adügübaliwa, luagu ida luba lan laransehani turobuli le?
Turobuli: Siñati hagumuchun gumadimatiña lau gudemei luma lau múarani le aniheinbei lidan lafanreinhóuniwa éigini hadan gürigia ubouagu.
Laranseha: Hasansirúba gumadimatiña ubouaguna ha gafigounbaña luagu Larúeihan Bungiu (Danieli 2:44; Matéu 6:10). Uguñe weyu, hénrenguti houn gürigia gudemetiña lun hagañeihan éigini. Lasansiruba katei le lábugiñe Larúeihan Bungiu. Ariñagatu Bíbülia luagu Hesukrístu, le Lurúeite Larúeihan Bungiu: “Lesefurubaña gudemetiña ha ayumuragubaña, hama giñe ha míderawagunbaña. Ñeinlá saragu türigu fulasurugu, gibelá türigu lábulugu burí wübü!” (Sálumu 72:12, 16).
Turobuli: Adügati wuribu lun ñein lan günringuaü luma múarani lidan katei le luáguti seinsu, le adügübei lun hénrengu lan houn gürigia lun hibihini éigini le hemegeirubei.
Laranseha: “Gumuguagüdalá [Heowá] wuribu chülǘ lumoun lagumuhóun larigeirugu ubóu; halagualá burí gimara, günringualá burí eféin, gudala burí karü to lánina wuribu” (Sálumu 46:9). Lagünrinchaguboun Bungiu áruma to lánina wuribu, gumú ligíame hau ha adügübaña lun ñein lan wuribu. Lídehaba katei le lun ménrengun lan houn gürigia habihini éigini le hemegeirubei. Ariñagatu Bíbülia: “Ñeinlá saragu darangilaü luma úaraguni lidan lidaani larúeihan” (Sálumu 72:7).
Turobuli: Adügati lanarime luriban ligaburi dan, liñawan dan, gudáü o katei líbeina lira, lun lagadeirun bunaguaü luma lun hóunwegun ibiñanigu.
Laranseha: Ladügüba Bungiu lun úaali lanme liñawan dan, gudáü o katei líbeina lira, ani ladügüba lira lun larandarun múa. Ariñagatu Bíbülia: “Aba lásügürün luriban dan, aba lagalumadun lugudi barana. Adüga lumuti fulasu mageirawati lagunume, adügaléi múa mábeiti dúname. Ru lumutiña ha lamabaña ñein [...]. Bunaguatiña hachari bunagua beibei, alubaha hagía le gíbeti” (Sálumu 107:29, 35-37).
Turobuli: Adügatiña gürigia güridítiña ani ha memenihabubaña éigini le mabuidunti. Adügatiña giñe lun mibihin hamani gürigia éigini le hemegeirubei.
Laranseha: Lagumuchuba Larúeihan Bungiu hau gürigia ha móuserunbaña lau arumani, wuriba hagía (Sálumu 37:10, 11; Isaíasi 61:8). Ariñagatu Bíbülia luagu Heowá: “Ru lumuti haricha ha asufurirubaña houn, ru ligía éigini houn lamatiña” (Sálumu 146:7).
Turobuli: Sagü irumu, fériditi saragu lídangiñe éigini le alubahóubei.
Laranseha: Lábugiñe Larúeihan Bungiu, buídubei lahandilihóun éigini. Dan meha le ya lubéi Hesusu, áfaaguati meha lun mabulegun lan éigini. Kei hénpulu, luagu aban dan hóugüdati hóugiñe 5,000 gürigia. Lárigiñe, aba lariñagun houn lani disipulugu: “Abudaha huméi sun le ígiragubei, meferidirun láamuga ni kata” (Huan 6:5-13).
Kei lagumuchuba lubéi Larúeihan Bungiu lau sun le adügübei lun ñein lan ilamaü, héigiba sun gürigia éigini semeeti ani le buiti lun átuadi (Isaíasi 25:6). Lun hasubudiruni ídaba lan ladüga Larúeihan Bungiu lun lasuseredun katei le, ariha huméi ariñahani le gíribei “Ídaba san lagumadihei Larúeihan Bungiu ubóu?”.
a Le hanúadirubei tílana Óundaruni hani Néchanigu lidan irumu 2015, háfaaguba lan lun hibihini lúmounme irumu 2030.
b Aban ariñahani túmagiñeti Organización de las Naciones Unidas para la Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas tuma Organización Mundial de la Salud.
c Lun hasigirun afurendeira hawagu gádürü agalufehatiña ha uágubaña tayanuha líburu Arufudúni, aliiha huméi ariñahani le gíribei “¿Qué representan los jinetes del Apocalipsis?”.
d Heowá líribei Bungiu (Sálumu 83:18, Traducción del Nuevo Mundo). Ariha huméi ariñahani le gíribei “Ka san Heowabei?”.