Lidan sun ubóu, buin liña ageiraü lau fánreinguaü ladüga polítika. Arufudati aturiahani le tadügübei Pew Research Center, lidan irumu 2022, “65 hádangiñe san gürigia derebuguhaña ha álügüdawagubaña lidan 19 ageiraü, ariñagatiña weiri lan múarani le hádanbei gürigia ladüga ámuñegueinarügü sétanu lánina polítika”.

 Le ñein lubéi hawinwanda, aganwoundeina liña san fánreinguaü hadan gürigia ladüga polítika? Ka uagu lasusereda katei le? Ida luba laranserún? Ariha huméi le tariñagubei Lererun Bungiu.

 Ariñagatu Lererun Bungiu luagu dan le ídanbei wawinwanda, le unbei tagúara “lagumuhóun dan”, ñéinbaña lan gürigia lau wuriba igaburi le adügübei lun hénrengu lan lun ñein lan úaraguni.

•   “Liábinburiba lan weyu hénrenguti lídounme lagumuhóun dan. Ladüga hóunguarügübei burí gürigia habusenra buiti, [...] siñabei hárügüdagun houngua” (2 Timotéu 3:1-3).

 Lénrenguduña houn gumadimatiña hadügüni hawadigimari buidu íbini sun áfaaguni le hadügübei saragu gürigia hibihini. Ámuñegueinarügüti harihini gürigia katei darí lun hénrengu lan houn hawadigimaridun úara lun haransehani turobuli. Ariha wamuti inarüni lan le tariñagubei Lererun Bungiu lúmagiñe binadu dan.

•   “Ubafu le luágubei gürigia lun ladügün damichi lun gürigia líledi” (Apurichihati 8:9).

 Lau sun lira, ayanuhatu Lererun Bungiu luagu aban lubuidun aransehani: luagu aban gumadimati le lunbei lagumuchun lau sun turobuli le adügübei lun hasufurirun sun gürigia.

 Ayanuhatu Lererun Bungiu luagu aban alidihati le úañahagili ubouagu, le gabafubei lun laranseruni sun katei. Hesusu alidihati ligía. Gabafuti ani busenti lun hawinwandun gürigia lidan aban luma lau darangilaü.

•   “Ñein lan saragu darangilaü luma úaraguni lidan lidaani larúeihan” (Sálumu 72:7).

•   “Seriwi haméi sun néchanigu!” (Sálumu 72:11).

 Hesusu ligía alidihati le buídutimabei, ladüga beresehabuti hau gürigia ani busenti líderaguniña, hátima sufurihañabaña marichaü.

•   “Lesefurubaña gudemetiña ha ayumuragubaña, hama giñe ha míderawagunbaña. Gudemehabuti houn ha gudemebaña, lesefurubei habagari gudemetiña. Lesefurubaña hawéi ha óuseragubaliña” (Sálumu 72:12-14).

 Ariha humá lanwoun ariñahani luáguti Larúeiha Bungiu le siélubei, le lábugiñebei lubafu Hesusu, ani ariha huméi giñe ida luba lan líderagunün arúeihani le, luma ida luba lan hidin luéigiñe lóubadina.

•   Ariha huméi bidéu Katei san Larúeihan Bungiu?

•   Ariha huméi ariñahani “Larúeihan Bungiu—Aban arúeihani sin marichaü”.