Ka san tariñagubei Bíbülia luagu lilouguan duna lidan sun ubóu?
Súngubei wagía mégeitiwa duna harumati lun wawinwandun. Ariñagati seküretáriu le arihibei lau Programa le tani Óundaruni hani Néchani António Guterres: “Kei weiri lubéi lemegeirúniwa duna, wagagibudaguña luma lilouguan duna”. Saragu míñunu gürigia hénrenguhaali houn hadarirun duna.
Strdel/AFP via Getty Images
Lachülürüba san dan lun ñein lan duna houn sun gürigia? O súnwandan wagagibudaguba luma lilouguan duna? Ka san tariñagubei Bíbülia?
Ka tariñagubei Bíbülia luagu duna?
Ariñagatu Bíbülia lagumuchaguba lan lilouguan duna ani ñeinbei lan saragu duna harumati.
“Láwiyuhaba saragu duna lidan fulasu mageirawati, fulasu mábeiti. Ábanbei lagunu fulasu mageirawati, labuinchuba múa mábeiti lau lísensen duna” (Isaíasi 35:6, 7).
Ka uagu gayara lubéi wafiñerun luagu füramasei le? Samina humá luagu le tariñagubei Bíbülia luagu ligaburi ladügǘn Ubóu.
Le tariñagubei Bíbülia luagu múa luma luagu lémeri duna
“[Bungiu] le adügübalin múa, aranseléi, le ederebudagüdübalin, lun haganóun gürigia” (Isaíasi 45:18).
Kei adüga lani Bungiu Ubóu lun wawinwandun lidan, adüga lumuti lidan aban igaburi lun ñein lan saragu duna.
“Iñuragüda lumuti [Bungiu] lédedehan duna, lárigiñe aba ladügüni húyame. Ésehati huya lídangiñe dúeri, aba lábürühan guran hawagun gürigia” (Hobu 36:27, 28).
Lidan murusun dimurei, ayanuhati bérusu le luagu ligaburi ladügüni Bungiu Ubóu lun magumuchagun lan duna. Iñuragüda lumuti lédedehan duna lídangiñe múa luma barana aba ladügüni húyame lidan dúeri, lagumuhóun aba lábürühan huya le adügübei lun ñein lan duna harumati houn gürigia habu houn animaalugu (Apurichihati 1:7; Amosu 5:8).
“Nóunahaba huya hun lidan dan, ábame lagindun hinadürigu hicharirugu” (Fádirigu 26:4).
Ariñagati meha Bungiu labinirubaña lan ísüraelina lidan binadu dan, aban néchani le awadigimaridubalin múa, lau aban lubuidun alubahani lau líchugun duna houn estodi. Subudi lumuti Bungiu lun ñein lan aban lubuidun alubahani mégeiwati huya lidan lidaani.
Le meha ladügübei Heowá hawagu binadu ísüraelina, ladügübei giñe lidan sun ubóu yarafa madise (Isaíasi 30:23). Lau sun lira, lidan saragu fulasu súfuritiña lílana ladüga lilouguan duna, aban lídangiñe lébuna ladüga lúan huya. Ka ámuya ariñahani wadarirubei tidan Bíbülia luagu laransehóun turobuli luáguti lilouguan duna?
Ida luba laranserún turobuli lánina lilouguan duna?
Ariñagatu Bíbülia layusurubei lan Bungiu Larúeihan lun laransehani turobuli le ubouagubei, lilouguan duna aban lídangiñe (Matéu 6:9, 10). Larúeihan Bungiu ligía aban Arúeihani le siélubei le lunbei larúeihani sun ubóu (Danieli 2:44; Arufudúni 11:15). Lanwoun lira, ladügübei Larúeihan Bungiu le hásiñarubei arúeihatiña ubouaguna adüga, lagumuchaguba lau turobuli lánina lilouguan duna.
Turobuli: Adügati lasansihan dan lun ñein lan turobuli lidan ligaburi léibaagun duna. Adügati le lun ñein lan lanarime lumabeigan o fuludu ladüga lan yebe lanarime láhuyun huya o luagu liñurun lugudi barana.
Laransehóun turobuli: Laranserubei Larúeihan Bungiu sun damichi le adügǘwaalibei lun Ubóu lun gayaraabei lan labuidurun léibugun katei ubouagu. Ariñagati Bungiu: “Arihabá! Adüga numuti sun katei iserime” (Arufudúni 21:5). Labuinchayaba múa mábeiti lau saragu duna lun gayara lan lawinwandúniwa, íbini lidan fulasu mageirawati (Isaíasi 41:17-20). Kei Urúei lidan Larúeihan Bungiu, gabafubei Hesusu luagu burí katei le asuseredubei ubouagu kei burí garabali, duna, huya o katei líbeina lira.
Dan meha ya lubéi Hesusu ubouagu, adügati lun lagalumarun aban liñawan dan. Lau lira larufudei le gayaraabei ladügüni lau ubafu le líchugubei Bungiu lun (Márükosu 4:39, 41). Kei Urúei lidan Larúeihan Bungiu, ladügüba lun úaali lanme liñawan dan. Hagundaaruba gürigia lau darangilaü luma ichouruni inarüniti manufudeuga luéi ni aban liñawan dan.
Turobuli: Adügatiña gürigia ha güridítiña tuma burí óundaruni to meberesenboun lau Ubóu lun lawiyedun duna éibaaguati, lagunu, luma duna lábugiñeti múa. Adügati katei le lun lakesidun duna.
Laransehóun turobuli: Larumadahabei Bungiu múa, duna luma barana. Ábame paraísuhali lan Ubóu. Ariñagatu Bíbülia: “Gundaalá fulasu mageirawati, múa mábeiti; buinla lau ugundani, legeleweha” (Isaíasi 35:1).
Kaba asusereda houn gürigia ha meberesentiña lau Ubóu luma hau gürigia háledigu? Ariñagati Bungiu lagünrinchagubaña lan “ha agünrinchagubalin ubóu” (Arufudúni 11:18; Ariñawagúni 2:21, 22).
Turobuli: Wuribati hayusuruni gürigia duna, ligíati lubaragiñe hamuga laganwoundun ábarüga lakesidun.
Laransehóun turobuli: Seremei Larúeihan Bungiu, ladügǘba lugundan Bungiu ya ubouagu mama hagundan gürigia ha hóunguarügübei hasaminara (Matéu 6:9, 10) Buídubei hadundehóun gürigia lábugiñe Larúeihan Bungiu. Ariñagati Isaíasi 11:9 a: “Ítara luba labuinchun sun fulasu lau lasubudirúniwa luéirigun Wabureme”. Lau lueirin subudi le luma lau lueirin ínsiñehabuni le wasandirubei luagu Bungiu luma luagu le ladügübei, wóunigirubei lubuidun Ubóu le luma sun le lídanbei.
Lun hadarirun lanwoun ariñahani luagu le lunbei ladügüni Larúeihan Bungiu, ariha huméi ariñahani “¿Qué cosas logrará el Reino de Dios?”
Heiba tidoun liliburun Isaíasi, kapítulu 35, lun harihini hungua ida luba lan ábanbei lan paraísu Ubóu.
Ariha huméi bidéu Ka un ladügei Bungiu Ubóu? lun hasubudirun amu katei luagu le labusenrubei Bungiu lun Ubóu.
a Heowá líribei Bungiu (Sálumu 83:18, Traducción del Nuevo Mundo). Ariha huméi ariñahani “Ka san Heowabei?”