Weyu wándaradi 24 lidan bián-hati, irumu 2023, lagunfulirun aban irumu lúmagiñe lagumeserun aban sügǘ híruti: wuribu le Ukraniabei. Según fiu ariñahani, hilaaña o buleseihaña kéiburi 300,000 súdaragu ukraniana hama rúsiana ani saminawati hilaaña lan kéiburi 30,000 amu gürigia. Lau sun lira, gayaraati gíbetima hamá ha óunwegubaña.

 Híruti genege lan magumuchunbei lan wuribu le guentó.

•   “Gúnfulimemeeli aban irumu lúmagiñe hábürühan súdaragu rúsiana luagun ageiraü Ukrania ani genegeti mararamunbei lan wuribu le. Genegeti giñe ua lan ni aban lídangiñe bián ageiraü le agañeiruti lidan wuribu le, ua ligía ni aban lídangiñe ánharuti lun le lamuriahabei le aban lun lararamuniwa wuribu” (NPR [radiu hountu sun gürigia ageiraü Meriga], 19 lidan bián-hati, irumu 2023).

 Ligía nidiheri habéi saragu gürigia luagu igarigu luma asufuriruni le lanügübei wuribu le luma amu burí wuribu houn gürigia lidan sun ubóu. Ka emenigini tíchugubei Bíbülia? Lachülürüba funa san weyu lun ua lan wuribu?

 Ayanuhatu Bíbülia luagu aban wuribu ani magumubei wuribu le hau gürigia, séfurügü lubaña. Arümahedón líribei wuribu le ani ariñagatu líburu tídangiñetu Bíbülia to gíriboun Arufudúni luagu ligía lan “wuribu le lánina óunwenbu luéyuri Bungiu le Suntigabafu” (Arufudúni 16:14, 16). Layusurubei Bungiu wuribu le lun lagumuchun hau sun gumadimatiña ha ubouagubaña ladüga hagía lan gadurunbaña luagu sun günringuaü le lanügübei burí wuribu. Lun hasubudiruni ida luba lan lanügün Arümahedón darangilaü, aliiha huméi ariñahani le gíribei:

•   Ka san Arümahedónbei?

•   Aban ñunsu buiti anitén lan Arümahedón