Ariñagati Hesusu houn lani disipulugu: “Lun gefén humá nuagu. . . chülǘ lumoun lidise-agei fulasu ubouagu” (Adügaü 1:8). Uguñe weyu, áfaaguatiña gefentiña luagu Heowá lun hagunfuliruni dasi le lau saragu ubebeni. Íbini ítara, machülǘgidiwa apurichiha lidan sun fulasu ubouagu, kei hénpulu lidan burí ageiraü wéinamuti le ñein lubéi haganawa saragu gürigia. Lau sun lira, lidan fiu ageiraü míbetiña Gefentiña ñein (Matéu 9:37, 38). Ka wadügübei lun wachülürün hamoun saragu gürigia?

 Lun wagunfuliruni gumadi le líchugubei Hesusu, óunahati Departamentu lánina Eseriwiduni lábugiñe ladundehan Musu úaraguati hani gefentiña luagu Heowá, misíonerugu lidoun fulasu le ñein lubéi mégeiwa hamá. Uguñe weyu, añahein 3,090 misionérugu lidan sun ubóu. a Hiibe agei ñüdün haña tidan amuñegueinarü leskuela, aban tídangiñe, Leskuela houn apurichihatiña Larúeihan Bungiu. Aransetiña misionérugu ha lun hígirunu haban lun gayara lan háguyun eseriwida lidoun amu ageiraü. Seremei lun saragu subudi tídangiñe Bíbülia le hámabei, ídehatiña lun lapurichihóun uganu buiti ani rútiña aban lubuidun hénpulu houn iseri disipulugu.

 Tidan kada sukursáli, anihein Fánreinti hánina apurichihatiña ha lídanbaña departamentu lánina eseriwiduni, nadagimeintiña úara luma Sétanu le Arihibei tau sukursáli lun híderaguniña misionérugu lau le hemegeirubei. Daritiña muna houn, teníwan ligía lun hátuadi, ibihatiña giñe murusun seinsu lun hibihini le hemegeirubei. Lidan irumu lánina eseriwiduni 2020, gátatiña gefentiña luagu Heowá kéiburi $27 míñunu (dolari) lun híderawagun misionérugu. Seremei ídemuei le heresibirubei, gayarati híchuguni misionérugu sun hadaani luma here lidan apurichihani, ru hagía dǘgüdaguaü lidan damuriguaü le ñein habéi.

 Ida liña hídehan misionérugu lidan apurichihani lidan fulasu le ñein habéi? Afuranguagüdati Frank Madsen, le eseriwidubei lidan Sétanu le Arihibei tau sukursáli to Malawiboun: “Lau ganigi luma iyaraani le hawagubei, íderagua hamutiña misionérugu lílana damuriguaü lun hagumeserun apurichiha lidan fulasu le díseti, kéiburi fulasu le ñein lubéi layanuhóun ámuñegueinarügü iñeñein luma burí fulasu le ñein lubéi hénrengu lan lun hebelurun apurichihatiña. Ani áfaaguatiña lun hafurendeiruni échuni luma iñeñei le ayanuhóubei lidan fulasu, lun gayara lan híchugun aban lubuidun hénpulu houn amu. Lau sun lira, ínchaha hamutiña giñe nibureintiña lun heseriwidun lidan dan dayarüti. Lunti weteingiruni Heowá hawagun misionérugu”.

 Ariñagati aban íbiri le eseriwidubei lidan Sétanu le arihibei tau sukursáli lidan burí amu ageiraü: “Rútiña misionérugu aban lubuidun hénpulu luagu úaraguatiña lan gefentiña luagu Heowá lidan sun ubóu. Íbini gürigia ha mámabaña gefentiña rútiña fe mafanreinragun lumutiwa lan wechun, adügati le wafurendeirubei tídangiñe Bíbülia lun ítara wamá kei íbirigu ha lídanbaña sun ubóu”.

 Ida liña híderaguniña misionérugu íbirigu? Teinki lumutiña Paulo, le awinwandubei ubouhu Timor-Leste, misionérugu ha eseriwidubaña lidan damuriguaü le ñein lubéi. Ariñagati: “Wéiriti lárouga lidan fulasu le ñein lubéi wawinwanda. Íbini lídangiñetiña lan fulasu diligati hayabin misionérugu, madügati lárouga lun lararamun hapurichihan. Súnwandan ñein hamá lidan adamuridaguni lubá apurichihani le lánina binaafin. Ani besafu dan giributiña adüga bisida amidirugu, dan le weiri lan lárouga, sigitiña giñe apurichiha rábounweyu. Íderagua hamutiña misionérugu saragu gürigia afurendeirei inarüni, au aban hádangiñe. Yusu hamuti habagari lun heseriwidun lau ubebeni, ani ínchaha hamutiña lílana damuriguaü lun heseriwidun lau ubebeni lun Heowá”.

 Ariñagatu Ketti, aban prekursora to adügüboun 70 oura luagu hati, to awinwanduboun Malawi ida liña lan híderaguniña tiduheñu aban feru maríeitiña ha eseriwidubaña kei misionérugu: “Dan le hachülürün eseriwida lidan damuriguaü le ñein nubéi, nuguya rügüñein meha gefentu hádangiñe niduheñu. Íderagua hamutina meha saragu ani buiti meha hanaagun houngua hamá niduheñu. Furendeitiña nisaanigu hámagiñe adüga lan leseriwidúniwa lun Heowá lun gunda wamá le tímatimaati. Seremei ídemuei le híchugubei woun, heseriwiduña ǘrüwagubei nisaanigu würiña keisi prekursorugu ha adügübaña 70 oura luagu hati ani gumeseeli nani weiriei adamuridagua”.

 Halíagiñe san libihuwa seinsu lun hóunigiruniwa misionérugu? Dan le wíchugun budagia lun wadagimanu lánina apurichihani lidan sun ubóu, gayaraati ladügǘn luéigiñe donate.pr418.com. Seremei luagu budagia le híchugubei.