Agurabúati hachülürüba lan kéiburi duusu míñunu gürigia hádangiñe ha lúnbaña wamisurahaniña lidoun Laritaguagüle lounwen Kristu le lunbei ladügǘn weyu 23 lidan ǘrüwa-hati. Lafuranguagüdübei íchuguti yanu aban lan lubuidun idewesei lúmagiñeti Heowá houn sun gürigia lebegi asalbaruni le lafayeirubei ani gayara lan lahuudun woun súngubei (Isa 11:6-9; 35:5, 6; 65:21-23; Huan 3:16). Gama lumoun, mámarügübei íchuguti yanu arufudei lafiñen lídanme weyu espechaliti le. Gachansinbadiwa giñe sun wagía lun wadügüni ligiaméme lau wíchugun aban lubuidun achülürüni houn sun gürigia ha achülürübaña lidoun Aritaguagülei (Rom 15:7). Ariha wamá fiu lídangiñe katei le gayaraabei wadügüni.

• Lubaragiñe hañuurun agurabaha lagumeserun programa, ru humá lubuidun achülürüni dandu houn ha amisurahóuabaña kei houn íbirigu ha madamuridagunhaañabaña mapurichihan. Hayá humá hawagun lau gamadóuni.

• Teni humá houn gürigia ha hamisurahabaña luma houn ha achülürütiña ladüga heresibirun aban amisuragülei dan le tafanreinhóunbei. Ariñaga humá houn lun hañuurun huma eremuha hamaamuga huma luma lun haliihan huma tídangiñe hibibülian.

• Lárigiñe yanu, álügüda huméi gürigia anhein anihein lubéi somu álügüdahani labusenrun ladügün. Anhein mosu lubéi háfuridun tídangiñe Luban Wadamuridagun lau lóufudagun lun hebelurun lílana amu damuriguaü, álügüda huméi gürigia anhein gayara lubéi hadimurehan luma fiu weyu lárigiñe. Gayaraati hariñagun lun: “Hínsiñeti hamuga nun nasubudiruni ka lan hisaminanbei luagu adamuridaguni le. Ida luba nadüga lunya nadimurehan huma?”.”