WABAGARI KEISI KRISTIÁNUGU
Buidutimalá wadügüni katei: Arufuda waméi houn aturiahatiña ida luba lan haranserun
KA UAGU SÚDINI LUBÉI? Ánhaña aransera aturiahatiña lubá waturiahan hama, ménrenguntimabei houn lun gunfuranda hamani luma haritaguni le warufudahabei houn. Ladügüba lira lun furesetima lan hawanserun. Íbini lárigiñe habadiseirun, mégeibaña haranserun lubá adamuridaguni luma lubá apurichihani gayara láamuga agagudúañumeme hamá (Mt 25:13). Ligíati, anhein góurate haturiahan ani gabügürügua ligía hadügüni, líderagubaña lira lun sun habagari. Lúmagiñe hagumeserun gürigia aturiaha wama, lunti wíderaguniña lun héchudun aransera lubá haturiahanu Bíbülia.
LE LUNBEI LADÜGǗNIWA:
-
Ru humá aban buiti hénpulu (Rom 2:21). Aranse humá lubá aturiahani, gabaroun humeime le lemegeirubei aturiahati (km 11/15 páh. 3). Arufuda humóun agumeiraguagüdüni to hayusuruboun lun ariha láamugei makü humani óunabagülei.
-
Ínchaha huméi lun laranserun. Danme gabügürüguaali haturiahan, afuranguagüda huméi lun lunti lan laranserun lubá haturiahan luma ani ariñaga huméi lun kaba lan buiti libiha anhein ladüga. Ru humá adundehani lun luagu le gayaraabei ladügüni lun lasagarun dan lun laranserun. Añahein íbirigu, dan le añaha lan aturiaha, ígiratiña lun hayusurunu aturiahatiña agumeiraguagüdüni to ídanboun makü hamaali lan óunabagülei lun híderaguniña arihei ida liña lan lahuudun haranserun lubá haturiahan. Ariñaga humá lun buidu lan ladüga dan le laranserun.
-
Arufuda huméi lun ida luba lan laranserun. Añahein íbirigu, yúsutiña aban lídangiñe furumiñeti wéiyaasu le ídanbei haturiaha luma gürigia lun harufudahan lun ida luba lan laranserun lubá haturiahan.