Lidan Abürüdǘni Ebüréu (le giñe subudiwabei kei Binadu Daradu), bürüwañu liña liri Bungiu kéiburi 7,000 wéiyaasu lau sínbolu יהוה. Lídanñein ebüréu gádürü létüra le ani subudiwati kei Tetragrámaton. Anuhein burí Bíbülia to ídounboun lásügürawagüdüwa létüra burí le kei “Heowá”. Anihántima iri le gíbetimabei adarirún tidan Bíbülia. Inarüni yusu hamá abürühatiña Bíbülia dimurei kéiburi Suntigabafu, le Íñugutimabei luma Aburemei lun hayanuhan luagu Bungiu. Gama lumoun, Tetragrámatonrügüñein ayusurúa lun lírime Bungiu.

Heowá guánarügü adügübei lun hayusuruni ha abürüdübarun Bíbülia liri. Aban hénpulu, adügati lun labürüdün profeta Hoeli: “Sun ha agúaruti liri Heowá hasalbaruba”, adüga ligía lun lariñagun aban abürühati sálumu: “Subudi haméi gürigia Heowá lan bíribei, buguyarügüñein íñugutima ligibuagu sun ubóu” (Joel 2:32, Traducción del Nuevo Mundo, [TNM]; Sálumu 83:18, TNM). Le linarün katei, fuati liri Bungiu tidan liliburun Sálumu kéiburi sedü-san wéiyaasu, aban líburu lánina poema luma burí uremu le meha heremuhabei lubúeingu Bungiu, águyuguagüda haméi. Kati uagu ua lubéi liri Bungiu tidan saragu Bíbülia? Ka uagu anuhein lubéi Bíbülia to ídanboun labürüdǘwa liri Bungiu kei Heowá? Ka mini lubéi iri le?

Ka uagu ua lubéi liri Bungiu tidan saragu Bíbülia? Ámuñegueinarügüti lébuna. 1) Añahein asaminarutiña memegeirun lan Suntigabafu giri lan lungua. 2) Añahein amu genegeti falagua hamá houngua luma hechun huríu lánina maha hamá híriduni liri Bungiu, háfuga ladüga hanufude hanabaguni. 3) Añahein hagía afiñetiña buídutima lan laguarún lun Bungiu lau dimurei kéiburi Aburemei o Bungiu ladüga ibidiñewa lan ídatima liña lan meha liridún liri. Gama lumoun, úati ni aban lídangiñe resun le richati. Ariha waméi ka lan uagu.

• Furumiñe, ha ariñagubaña memegeirun lan Bungiu giri lan lungua, bulíei hamuti dariwaaru lan burí binadu abürüdǘni tídangiñetu Bíbülia —anuhein  tídangiñe lubaragiñetu lidaani Kristu— to ídanboun ladarirúa liri Bungiu. Kei buga wariñaguni, Bungiu adügübei lun labürüdǘniwa liri kéiburi 7,000 wéiyaasu tidan Lererun. Furanguti busén lan wasubudiruni luma wayusuruni liri.

• Libiaman, ásügüragüdütiña Bíbülia ha agidarubalin liri Bungiu tídangiñe ladüga hafalaruni hechun huríu, bulíeiguatiña luéi aban katei súdiniti. Lau sun añahein lan meha huríu ha akopiahabaña binadu abürüdǘni ha máhatiña hagúaruni iri le, bürǘ hamuti meha tidan kopia tani Bíbülia to habürüdüboun. Dariwaaru binadu burí abürüdǘni lidan fulasu le gíribei Kunrán, yarafa lun barana Hilaali, to ídanboun bürüwañu lan liri Bungiu lidan saragu bérusu. Añahein ásügüragüdütiña Bíbülia hádangiñe ha agidarubalin liri Bungiu tídangiñe sügügüda hamuti kei ABUREMEI lau létüra wéinamuti lun harufuduni halía lan meha labürüdǘwa liri Bungiu lidan furumiñeti abürüdǘni. Ánheinti subudi habalin bürüwañu liña lan liri Bungiu saragu milu wéiyaasu tidan Bíbülia, kati uagu hasansirei o hagidarei ñéingiñe? Ka íchugubei üma houn lun hadügüni lira? Hagíagubeirügü.

• Lǘrüwan, gürigia ha ariñagubaña moun lumuti lan layusurún liri Bungiu ladüga ibidiñewa lan ídatima liña lan meha liridún, yusu hamuti liri Hesusu. Gama lumoun, míridun hamuti hiibe-agei kristiánugu ha uguñebaña weyu liri Hesusu kei meha híriduni lánigu disipulu lidan furumiñeti sígulu. Másiñati írida hamani meha kristiánugu ha ayanuhabaña ebüréu liri Hesusu kéinaba “Yeschúa”. Ánheinti Kristu (o Mesíasi) kei “Maschíah”. Írida hamuti meha kristiánugu ha ayanuhabaña güriegu liri Hesusu kei “Iēsóus Khristós”, ánhañati ha adimurehabaña lidan burí iñeñein le ñǘbuinbei lídangiñe latín írida hamuti kéinaba “Iesus Christus”. Adügati Bungiu lun hayusuruni abürühatiña Bíbülia liri Hesusu kei lásügürawagüdün lidoun güriegu. Máfaaguntiña hakipuruni ligaburi liridún iri le kei meha liridún lidan ebüréu, lubaragiñe lira, yusu hamuti ligaburi liridún le kamanibei lidan hañeñe gürigia. Susereti aban katei ítarati lau liri Bungiu: Ariha hamaali lílana Sétanu le Arihibei lau Tásügürawagüdün Bíbülia to lánina Iseri Ubóu richá lan liridún liri Bungiu kei Heowá lau sun mámatima lan meha ítara liridúa lidan binadu ebüréu.

Ka uagu wayusurei iri Heowá? Lidan garifuna, gádürü létüra le lídanbei Tetragrámaton (יהוה) ligiaméme luma YHWH. Dan meha le habürühan gürigia dimurei lidan binadu ebüréu, Tetragrámaton laganagua, mayusutiña meha bokali kéiburi a, e, i, o, u o ü. Gama lumoun, subudi hamuti meha gürigia ida luba lan híriduni kada dimurei lugundun yusu hamuti meha dimurei burí ligía sagü weyu lidan habagari.

Kéiburi milu irumu lárigiñe lagumuchúniwa labürüdǘn Abürüdǘni Ebüréu, gíbeeña meha huríu afalaruti afiñeni mébunati libügürü wuriba lan liridún liri Bungiu, ligíati sagü lubeiha hachülürün lumoun liri Bungiu dan le haliihaña lan, ábaha hasansiruni lun hariñagun dimurei kéiburi “Aburemei”. Ligíati ibidiñe lubéi woun ida liña lan meha híriduni binadu lubúeingu Bungiu liri  (Agumesehani 13:4, TNM; Áfuriduni 3:15, TNM). Añahein akutihatiña saminatiña “Yahwé” lan meha ligaburi liridún, añahein amu ariñagatiña másiñati lan iridúa lan meha kéinaba Iae, Iaé Iaoué. Lau sun ibidiñe lan woun ida liña lan meha liridún liri Bungiu lidan binadu ebüréu, subudi wamuti írida hamani meha lubúeingu dan le hadimurehan luagu houn amu luma dan le hayanuhan luma (Áfuriduni 6:2, TNM; 1 Urúeigu 8:23, TNM; Sálumu 99:9, TNM).

Kati uagu wayusurei iri Heowá? Ladüga ligía igaburi buídutimati le wasubudirubei lun liridúniwa liri Bungiu lidan garifuna, ani barühali ligaburi liridún iri le saragu sígulu ayusurúa lidan amu burí iñeñein.

Yusu waméi iñeñein chumagü kei aban hénpulu. Liliburun Sálumu to lásügüragüdüboun Juan de Valdés kéiburi lidoun irumu 1537 furumiñetuboun Bíbülia ásügürawagüdütu lidoun chumagü to ídanboun láfuacha liri Bungiu. Bürǘ lumuti kei Iehova. Eibu asansireina lan iñeñein chumagü, aba giñe asansireina lan ligaburi labürüdǘn liri Bungiu. Kei hénpulu, bürüwati iri le kei Jehova tidan liliburun Sálumu to lásügüragüdüboun Bernardino de Rebolledo lidan irumu 1661. Lidan burí abürüdǘni le tídanbei Bíbülia to lásügüragüdüboun Scío de San Miguel lidan irumu 1791, bürüwati iri le kei Iehováh. Tidan Bíbülia Torres Amat to adügǘboun lidan irumu 1824 bürüwati iri le kei Jehovah, ánheinti tidan Bíbülia Reina-Valera to adügǘboun lidan irumu 1862, bürüwati kei Jehová. Ítarayuma liña giñe labürüdǘn liri Bungiu lidan burí amu iñeñein lúmagiñe saragu sígulu. Aban hénpulu, bürǘ lumuti William Tyndale liri Bungiu kei Iehouah dan le lásügüragüdübalin Pentatéuku lidoun inglesi lidan irumu 1530. Tuguya furumiñetuboun Bíbülia to ídantu láfuacha liri Bungiu lidan inglesi.

Tidan aban líburu to áfuriduboun lidan inglesi lidan irumu 1911 to gíriboun Studies in the Psalms (Taturiahóun liliburun Sálumu) to labürüdüboun aban wügüri subudihabúti tun Bíbülia gíriti Joseph Bryant Rotherham, afuranguagüdati himei lani labürüdüni liri Bungiu kei Jehovah, lubaragiñe labürüdüni kei Yahweh ladüga ariha lani “ligía lan ligaburi labürüdǘn subudiwatimabei  ani ligíatima unbei hánhara gürigia ha aliihabarun Bíbülia”. Ítarayuma liña lafuranguagüdüni aban wügüri subudihabúti lun iñeñein ebüréu gíriti Alexander Kirkpatrick katei le lidan irumu 1930 dan ladimurehabei libügürü labürüdǘniwa liri Bungiu lidan inglesi kei Jehovah, ariñagati: “Gíbetiña aturiahatiña luáguti ligaburi labürüdǘn iñeñein uguñe weyu ariñagutiña mosu lan hamuga laliirúniwa iri le kei ‘Yahweh’ o ‘Yahaweh’; gama lumoun, genegeti wéiritima lan layusurún iri JEHOVAH lidan inglesi, ani mama ídatima liña lan meha liridún súdinibei, lasubudirúniwa aban lan Iri ligía súdinitimabei, mama ábanrügü luwuyeri aguarúni kéiburi Aburemei”. Ariñawagúati aban katei ítarati tidan Diccionario Manual Bíblico to adügǘboun lidan chumagü, ariñagatu: “Rédeihali ligaburi labürüdǘn iri Jehová kei sagüráuti ladüga ligía lan ligaburi labürüdǘn yúsuatimahalibei” tidan tiibe-agei Bíbülia to subudiwatimaboun.

Ka mini lubéi iri Heowá? Ñǘbuinti iri Heowá lídangiñe aban dimurei ebüréu le mínibei “liabin lun ítara luba lan”. Mini lan le, liibe-agei lan dan adüga lan lun ladügüni somu katei o aban gürigia le ariñawagúbei. Ligíati gunfuranda habalin lílana Sétanu le Arihibei lau Tásügürawagüdün Bíbülia to lánina Iseri Ubóu, “Adügati [lan] lun Lasuseredun” mini lubéi iri Heowá. Kei ámuñegueinarügü lubéi hariñagun gürigia ha subudihabúbaña luáguti katei le, siñati wéredun lau ligiaméme libügürü le mini lubéi iri le. Gama lumoun, úarati katei le luma inarüni lan Heowá lan adügübalin sun katei ani gúnfuli lani sun lisuuni. Ka uagu? Ladüga mama adügarügüti lun ñein lan sielu luma Ubóu lau sun le lídanbei íbini ánheligu hama gürigia, adügati giñe lun lagunfulirun lugundan luma lisuuni ka lan yebe ñǘbuinti.

Kagia gayaraabei wariñaguni luagu dimurei burí le bürüwañubei lidan Áfuriduni 3:14? Ariñagati Bungiu luougua ñein: “Au le” (o, según lásügürawagüdüniwa lidan abürüdǘni le tídanbei Traducción del Nuevo Mundo, “Nadügaguba Nungua kei Nabusenruni”). Góubaguati dimurei burí le luma dimurei ebüréu le ídangiñebei liabin liri Bungiu. Gama lumoun, mafuranguagüdün lumuti dimurei burí le sunsuinagubei kátima lan mini lan liri Bungiu. Ábanrügüñein fánreinti lídangiñe ligaburi Bungiu lafuranguagüda: adügagua lan lungua según le emegeirúbei lun lagunfuliruni lisuuni lidan kada kesi. Gama lumoun, mámarügüñein adügagua lan Bungiu lungua kei labusenruni según le mégeiwabei lun lagunfuliruni lisuuni mini lubéi liri. Mini lan giñe gayara lan ladügün lun hadügüni ánheligu, gürigia, animaalugu luma sun katei le adüga láalibei sun le mégeiwabei lun lagunfulirun lisuuni.