ABAN san urúei sábiuti Heowá? Lun wasubudiruni, mosu wakutihani adundehani le líchugubei woun tidan Lererun. Inarüni san sábiu lan adundehani burí le? Íderagua lumutiwa san lun buídutima lan wabagari? Tidan líburu Ariñawagúni abürühati urúei Salomón saragu adundehani le huuti lidan wabagari. Ariha wamá fiú.

Umadaguaü luma Bungiu. Lun buidu lan wamadagua luma Heowá, mosu wafiñerun luagu. Ariñagati Salomón: “Afiñebá luagu Bungiu tau sun banigi, mamalá luagun lualin bichügü. Haritaguabá luagu Bungiu lidan sun le badügübei, ábame lanügünibu luéigiñe üma le surubei” (Ariñawagúni 3:5, 6). Arufudatiwa afiñe wamá luagu Bungiu lau wígirun lun ladundehani wabagari ani gaganbadi wagía lun lugumadin. Ánhawa óusera ítara, gasuunibei wabagari, wagundaaragüdüboun lanigi Bungiu ani warufudubei ye lan Mafia (Ariñawagúni 27:11).

Iduheñu hama umadagu. Uguñe weyu sügǘ lau amu dan mégei hamuti familia ladundehan Bungiu. Ariñagati Bungiu lun wügüri maríeiti: “Gundaabá lubeiti tuma búmari [...] to úmaboun bamarieida danbei nibureingidibu”, arufudati le mosu lan úaragua lan wügüri tun lúmari (Ariñawagúni 5:18-20). Lidan Ariñawagúni kapítulu 31 anihein aban lubuidun hénpulu houn würiña maríeitiñu luagu ida luba lan hagañeiruni linebese hani weiriei hama harahüñü. Houn isaanigu ariñawagúati lun gaganbadi hamá houn hagübürigu (Ariñawagúni 6:20). Arufudatu giñe líburu to, gebegi lan umadaguaü, ani ánhawa lan adiseda hawéi ha híbiri wawouguounrügübei wasaminara (Ariñawagúni 18:1). Mosu wanúadiruniña wamadagu buidu ani moun lumuti wóundarun hamá ha gayarabei heferidiraguagüdüniwa (Ariñawagúni 13:20; 17:17).

Lidan Wabagari. Anihein saragu eweridihani huuti lidan Ariñawagúni, íderagua lumutiwa lun wígiruni luriban saminaü, lun wadisedun luéi átaguni, lun buidu lan wasaminan luma lun buídutima wamá lidan wawadigimari (Ariñawagúni 6:6; 14:30; 20:1). Wéridi lumutiwa luéi resultóu le lanügübei ladüraawagun lilurudun Bungiu (Ariñawagúni 14:12). Wéridi lumutiwa giñe luéi wawiyedunu wanigi “ladüga tídangiñe liabin ibagari” (Ariñawagúni 4:23).

Adügaali adundehani le lun buídutima lan habagari saragu míñunu gürigia, guentó chouru hamaali ua lan amu katei buídutimati luéi wánharun lun lilurudun Heowá.

(Lídangiñeti Ariñawagúni.)