SEKSIÓUN 2
Bugawaaña lídangiñe Paraísu
Adügati aban ánheli ebedaaguti, lun maganbadi hamá Adán tuma Ewa lun Bungiu. Kei resultóu, aba liabin figóu luma óunweni
SARAGU dan lubaragiñe ladügüniña Bungiu gürigia, adüga lumutiña ánheligu, sífirigu marihúaditiña. Aban hádangiñe le subudiwabei lau lásügürün dan kei Satanási o Mafia, ebedaaguati meha lun Bungiu ani eyeeda lumutu Ewa lun téiginu tin ábanrügü tídibu wewe to ueiboun leweridiha Bungiu.
Adügati Satanási lun tadimurehan aban hewe tun Ewa lun tasaminarun dandu lan tuguya kei tani weiriei heferidiruña lan somu katei buiti ladüga Bungiu. Ariñagati giñe móunwegunbaña lan ánhaña éiga tídangiñe tin wewe tuguya; ítarati lariñaguña eyeeda laaña lan Bungiu. Buiti lefeindiruni Mafia sun katei houn, chouru lumuti houn ánhaña lan maganbadi lun Bungiu hibihuba lan aban subudi espechaliti ani gayarabei lan hadügüni le habusenrun. Ani iyeeni lira, furumiñeti lidan sun dan. Anihán burí álügüdahani le labusenrubei yeeti le ladügün: Garichati san Bungiu lun larúeihani ubóu? Richati san lilurudun? Buiti san gaganbadiwa lan lun?
Héiguatu Ewa tidoun sádara. Aba tawamadirunu furuda tuguya, lagumuhóun aba teigin tídangiñe. Lárigiñe aba tíchugun lun tani weiriei aba giñe leigin. Íbini genege lan mama lan aban katei súdiniti, aban ebedaaguni lira, aban figóu. Subudi hamuti ka lan hadügübei: hamahaduña lun lilurudun Le adügübaliña, le íchugubalin sun le hámabei houn, íbini habagari sin figóu.
‘Lachuinrubei bábulugu, bágüreime lihilin lugudi.’ (Agumesehani 3:15)
Fayeigüda lumutiña Bungiu maganbaditiña ha luagu le hadügübei. Furumiñe ariñagati lóunahabei lan Tadügawagun würi o Asalbaragülei le lunbei lagumuchun tau hewe o Satanási. Ígirati lun hawinwandun Adán tuma Ewa luagu fiú dan, ladüga gudemehabu lan houn harahüñü ha magurahóungiña. Kati emeniginibei houn? Füramaseti Heowá lagidarubei lan buga lóunagüle sun wuribati le lanügübei ebedaaguni lidan Edén. Katei san Asalbaragülei ligía ani ida luba lagunfulirun lau lisuuni Bungiu? Eibu tabürüdǘn Bíbülia afurangudeina liña óunabagülei.
Lagumuhóun, aba labuguni Bungiu Adán tuma Ewa lídangiñe Paraísu. Bóugudi, mosu meha hawadigimariduni múa lau saragu áfaaguni lun gayara lan habihini le hemegeirubei. Aba tágurahani Ewa furumiñeti tiráü, Kaín. Dan lárigiñe, aba garahüñü hamá, dandu würiña kei wügüriña, fiú hádangiñe Aweli luma Setü, le lagücha Noé.
(Lídangiñeti Agumesehani kapítulu 3 darí 5 luma Arufudúni 12:9.)
