SARAGU sígulu lubaragiñe hebelurun ísüraelina Kanáun, füramaseti Heowá lun Abüraámü líchugubei lan múa ligía houn ladügawagun. Guentó lábugiñe lalidihan Hosué, ragümeme hamaali ísüraelina Fulasu Füramasewati.

Aba desidírü lan Bungiu lunti lan hagünrinchawagun kananna, ladüga lanarime furunde hamá ani wíyeti habagari. Ligía líchugunbei adundehani houn ísüraelina lun hagumuchun lau sun ageiraü.

Gama lumoun, lubaragiñe hebelurun Kanáun óunahati Hosué biama aríaahatiña fulasu. Aba hebelurun uburugun Herikó aba herederun túbiñe aban würi gíritu Raabü. Íbini subudi lan tun ísüraelina hamá, ígiratu lun haramudagun ñein ladüga aganbaaru lan luagu milaguru burí le ladügübei Heowá lun lesefuruniña lumutuniña ani guentó afiñeharu luagu. Adügatu Raabü lun füramase hamá aríaahatiña tun tesefuruba lan hau sun tufamilia danme le hebelurun uburugun.

Lárigiñe, belutiña ísüraelina Kanáun, ábati hagünrinchaguni súdaragu Herikó. Adügati Heowá lun lábürühan lubarieirun, gama lumoun séfutu Raabü hau tufamilia. Ítara liña lagumeserun sisi irumu wadagimanu, ñein lubéi libiha Hosué hama lisudaranigu saragu múa lidan Fulasu Füramasewati. Lagumuhóun, aba lafanreinhóun múa ligía hadan türibu ha Ísüraelibaña.

Lubaragiñeraü lounwen Hosué, aba lóundaruniña sun ísüraelina. Haritaguagüda lumutiña luagu le ladügübei Bungiu hawagu hagüchagu ani ariñagati houn lun úaragua hamá lun. Gama lumoun, lárigiñe lounwen Hosué hama lánigu paaná, aba hígiruni ísüraelina Heowá aba háhuduragun houn búngiugu mama inarünitiña. Lidan 300 irumu le asigirubei, mama sun dan gaganbadi hamá lun lilurudun Heowá. Danha le hadügüni derege lumutiña Heowá háhaburugun filistéana o amu háganiñu. Gama lumoun, ságüha hamuriahan ídemuei aba líridun aban alidihati lun lesefuruniña. Hóustatiña alidihatiña hagía duusu.

Líburu tídangiñetu Bíbülia to abahüdaguboun luagu hadaani alidihatiña gumesetu abahüdagua luagu Otoniéli ani tagumucha abahüdagua luagu wügüri le héretimabei lidan sun dan: Sansón. Sügǘ burí le uágubei tayanuha líburu to gíriboun Alidihatiña arufudati aban leksióun súdiniti: ánhawa gaganbadi lun Heowá, buídubei lidin woun; ánhawa maganbadi wasufurirubei resultóu.

(Lídangiñeti Hosué, Alidihatiña luma Fádirigu 18:24, 25.)