LÁRIGIÑE lidaani Sansón, wínwanti aban aguseragüdüti ani profeta giñe gíriti Samueli. Wéiriti hayumahan ísüraelina ítara hamá kei ha híbiri néchanigu, aba hariñagun lun busén hamá aban urúei. Íbini magundan lan Heowá lau le hamuriahabei, ánhati lun, aba lariñagun lun Samueli lun líriduni Saulu kei urúei. Ǘnabuguti meha Saulu, ani lau lásügürün dan aba lanaagun lungua aba maganbadi lan lun Bungiu. Aba mabusenrun laali lan Heowá, aba lariñagun lun Samueli lun líridun aban nibureinti gíriti Dawidi leweñegua. Gama lumoun, lásügürüba buga saragu irumu lubá larúeihan.

Aban weyu, kei hádanñanu lan lisudaranigu Saulu líbugañanu Dawidi, aba lidin bisidaña, aba ladariruniña súdaragu adadagara lau anufudei ladüga láluahaña lan aban óunwenbu súdara filistéana gíriti Goliadi wuribu hama, adüga ligía bula hau luma lau Bungiu. Aba lagañidun Dawidi saragu darí lun lánharun lageindagun luma darí hóunwegun íbini irahügili lan Dawidi. Táurügü aban chilinchádi luma fiú dübü láfurida Dawidi ageindagua luma hígandei ligía, ǘrüwañein méturu (lóugiñe nefu ugudi) ligagubun. Dan le ladügünbei Goliadi bula lau Dawidi, aba lariñagun Dawidi lun lagañeirubei lan ladüga lidan lan liri Heowá lageindagua. Láurügü aban dübü láfarei. Lárigiñe, aba lagidarunu lefeinte luéi aba ladüürüni lichügü tau. Dan le harihinbalin súdara filistéana le asuseredubei, aba hanurahan lau lanarime anufudei.

Wéiritu lanigi Saulu lau ganigi lan Dawidi aba lubéi líchugun aban ubaraü súdiniti lun hadan lisudaranigu. Gama lumoun, sun agañeiruni le libihubei nibureinti le adügati lun lagimugaruni urúei darí lun labusenrun láfaruni. Lun lesefuruni Dawidi libagari, mosu meha lanurahan. Íbini ítara úaraguati lun Saulu sun dan, ladüga subudi lani Heowá lan íchugubalin lun larúeihan. Dan lárigiñe, aba lóunwen Saulu lidan wuribu. Ábati Dawidihali lan iseri urúei, kei füramase lani Heowá.

Busenti yebe Dawidi lábunagun aban ténpulu lun Heowá. Ani aba lariñagun Bungiu lun ábanba lan hádangiñe ladügawagun adügei wadagimanu le. Salomón le liráü adügübalin. Lau sun luwuyeri, fulesei lumuti Heowá: adügati aban daradu luma, luagu hádangiñeba lan lufamilia háfurida saragu urúeigu ani hádangiñe urúeigu ha láfurida Esefuhati o Tadügawagun würi le füramasewabei lidan Edén. Gürigia ligía, ligíaba Mesíasi, o Anúadiruali, le buga lunbei lanúadiruni Heowá lun lagumadihan lidan Larúeihan, aban arúeihani le lunbei ladurarun lun sun dan.

Le lanarime leteingiradi, aba lóundaragun Dawidi saragu lubuña ábunaguni, golu luma pülata lun tábunawagun ténpulu. Lau lídehan Bungiu, adügati giñe saragu sálumu o uremu lánina alawahani lun Heowá. Lubaragiñe lóunwen ariñagati: “Adimurehati lani Wabungiute sífiri nídangiñe; anihein lererun tuagu niñeñe” (2 Samueli 23:2).

(Lídangiñeti 1 luma 2 Samueli, 1 Krónikasi, Isaíasi 9:7, Matéu 21:9, Lúkasi 1:32 luma Huan 7:42.)