GAYARATI san úaragua hamá lubueingu Bungiu lun lábugiñe saragu óuchawaguni íbini genege lan meseriwinbei lan lun ni kata? Wínwanti aban wügüri gíriti Hobu aban sügǘ ítarati. Ariha waméi ka lan lánibei resultóu.

Dan le haganóunbei ísüraelina Ehiptu, wínwanti meha Hobu le liduhe Abüraámü lidan fulasu le subudiwabei uguñe weyu kei Arawia. Aban weyu, adimurehati Heowá buidu luagu lidan adamurini le ladügübei sielu hama sun ánheligu. Ñeinñein giñe Satanási. Hagibugiñe súngubei ariñagati Heowá ua lan úaraguati kei Hobu ubouagu, arufudati ítara wéiri lan lafiñen luagu. Gama lumoun, aba lariñagun Satanási leseriwidunbei lan Hobu lun Bungiu ladüga lan labiniruni ani tóunigilei. Ariñagati lau ichouruni ánhein lan leferidira sun lúmati lagarabaaguba lan lun Heowá.

Ígirati Bungiu lun lagidaruni Mafia sun lumegen Hobu luéi, lárigiñe aba lagidaruniña lirahüñü luma lubuidun látuadi. Kei ibidiñe lubéi lun Hobu Satanási lan lanagangiñebei sun lilamiserun, úati gúnfuranda lani ka lan uagu lígira Bungiu lun lasuseredun. Íbini ítara magarabaagunti lun Heowá.

Ñǘbuintiña ǘrüwa hagübüri lumadagu Hobu abisidahei. Lau burí limigifen hayanun le anügübei saragu páhina tidan liliburun Hobu, houchatiña lun lasaminarun labeichuñein lan Bungiu luagu figóu le ladügübei aramudaguarügü. Ariñagatiña giñe lau ichouruni meberesen lan Bungiu hau lubueingu ani mafiñen lan hawagu. Gama lumoun, máhati Hobu lun libidiounigan hau, chouru lumuti houn úaraguabei lan lun Bungiu darí lounwen.

Lau sun lira, charati Hobu lau ladiheridun saragu lun larufuduni madurun lan. Eliú, aban nibureinti le aganbubalin sun katei, adeinhati lun ladüga lebereserun saragu luagu le hasaminarubei ha híbiri luagu, sügǘ lau liri Heowá luma lagumadihan. Ani ébecha lumutiña hagübüri lumadagu Hobu.

Ererehati Heowá lun Hobu. Yusu lumuti katei buiti le ladügübei lun larufuduni lun ni kata lan wügüri dan le konpararua lan luma luéirigun Bungiu. Ǘnabuguti Hobu ani ánhati lun lererehan Heowá. Kei le “areida lubéi Bungiu ani gudemehabu ligía” areidaguagüda lumuti ani binilei lau dóbuli irisini hama diisi lisaanigu (Santiagu 5:11). Seriwiti lúaragun Hobu lun líchugun aban buiti óunabagülei lun Satanási luma lun larufudun gayara lan úaragua hamá gürigia lun Bungiu íbini lábugiñe óuchawaguni.

(Tídangiñeti liliburun Hobu.)