SUBUDITI meha lun Heowá lachülürüba lan aban weyu lun lederegeruni Liráü le hínsiñetimabei lun libagari. Ítara liña larufuduni profesía le lídanbei Agumesehani 3:15, íbini mariñagun lani furangu. Lun gufuranda hamani gürigia lanarime igarigu le lunbei lanügüni óunweni ligía lun, adügati Bungiu lun labürüdǘn le asuseredubei dan le lamuriahanbei luma Abüraámü lun lederegeruni liráü le hínsiñebei lun lidan sákürifisiu.

Mabulieida waméi füramase haali lan Bungiu lun, hádangiñeba lan ladügawagun Isaakü liabin Asalbaragülei le füramase waalibei. Wéiriti lafiñen luagu füramasei ligía ani hemenigiti gayara lan láguyuguagüdüni Bungiu lisaani. Ligía ladügünbalin le lamuriahabei Heowá luma. Ani lídanmeme oura ligía, aba lóunahan Heowá aban ánheli lun lerederuni. Chourugüda lumuti Bungiu lani füramasei lun Abüraámü.

Lárigiñe, aba gasaanigu lan Isaakü biama: Esaú luma Hakobu. Hádangiñe biángubei Hakoburügüñein hínsiñehabu lun katei lúmagiñeti Bungiu, ligía libihinbei abinirúni. Aba lasansiruni Bungiu liri aba líchugun Ísüraeli luagu ani duusu lirahüñü lichügüdinabaña duusu türibu ísüraelina. Gama lumoun, ida liña hayabin familia ha lun aban hamá óunwenbu néchani?

Susereti le, dan le hagumeserunbei líbugañanu Hosé agimugarei darí lun haluguruni kei idamuni. Ha agañeinhabalin aba hanügüni Ehiptun, ñein lubéi ladunragua luma lénrengunga. Gama lumoun, íderagua lumuti Bungiu nibureinti le ladüga úaragua lan ani ganigiti. Luagu aban weyu aba líriduni lurúeite Ehiptu lun aban ubaraü súdiniti. Ítara liña gayara lan líderaguniña lufamilia danbei le ladügün ümi lun lóunahaniñu Hakobu lirahüñü Ehiptu agañeinha éigini ani Hosé meha arihibei lau éigini. Lárigiñe ladunragun hama líbirigu, feruduna lumutiña ladüga asakürihaaña lan ani óunaagüdati hawagu ha híbiri liduheñu. Resibi hamuti lubuidun-agei múa, aba hagibedagun ani awanse hagía ñein. Gunfuranda lumuti Hosé Heowá lan adügübei lun lasuseredun le, lun lagunfulirun lani füramasei.

Wínwanti Hakobu Ehiptu hama lufamilia darí lounwen. Lubaragiñeraü lounwen ariñagati ábanbei lan Urúei gabafuti Asalbaragülei le füramase waalibei ani hádangiñebei lan ladügawagun Hudá. Saragu irumu lárigiñe, ariñagati Hosé lidan aban profesía lasagarubaña lan Bungiu lufamilia Hakobu Ehiptugiñe.

(Lídangiñeti Agumesehani kapítulu 20 darí 50 luma Ebüréu 11:17-22.)