IDA luba meha hasubudiruni gürigia Mesíasi? Bungiu asubudiragüdübalin houn. Gádürü san irumu lárigiñe lagumuchun tabürüdǘn líburu burí to abürüdǘboun lidan Ebüréu, aba lasaliragun aban ánheli gíriti Gabüriéli tun María, aban nibureintu to awinwanduboun Nasarétü, luburugute Galiléa. Ariñagati tun gasaaniboun lan. Íbini gañüngiru lan, adügati Bungiu lau lani sífiri sandu o erei gabafuti lun tadageinadun. Irahü le, ligíaba Urúei le füramasewabei lun larúeihan lun súnwandan. Adügati Bungiu lun lásügürün libagari Lisaani le ígiramaü le awinwandubei luma sielu turageirugun María.

Ánhatu María tagunfuliruni óunwenbu kárugu ligía lau ǘnabuguni. Gadaradunti aban sarafangei gíriti Hosé tuma, aba lamarieidun tuma lárigiñe lóunahan Bungiu aban ánheli afuranguagüdei lun le asuseredubei. Mabulieida waméi ariñaga laali lan profesía Belénba lan nasirua lan Mesíasi, mama Nasarétü (Mikeasi 5:2). Ida lubati buga lagunfulirun profesía le, anhein dise lubéi fulasu ligía 140 kilómeturu ñéingiñe?

Fiú dan lárigiñe, aba líchugun urúei rómana aban lúrudu lun houdin sun gürigia abürüdǘwa lidan fulasu le ñein lubéi hágurahoua. Genegeti Belénna lan liduheñu Hosé tuma María, ligía houdinbei ñeinhin murusun dan lubaragiñe tágurahan (Lúkasi 2:3). Tidan haban animaalugu nasirua lan Hesusu, mosuti buga harounragüdüni lidan lagei heigin animaalugu. Lidan aban áraabu yarafa, aba lasaliragun aban ánheli houn fiú hóuniri mudún aba lariñaguni houn sun liña lan lágurahoun Mesíasi o Kristu.

Ñeinbaña giñe amu gürigia ha lunbaña hariñaguni Hesusu lan Mesíasi le füramasewabei. Ariñaga laali meha profeta Isaíasi laransehabei lan aban gürigia üma lubá wadagimanu súdiniti le lunbei ladügüni Kristu (Isaíasi 40:3). Huan le Abadiseihabei wügüri ligía. Dan le larihinbalin Huan Hesusu, aba lariñagun: “Anihán mudún le lóunahabei Bungiu lun lagidaruni hafigoun gürigia”. Ourameme ligía, saragu hádangiñe lani Huan disipulugu aba hafalaruni Hesusu. Ariñagati aban hádangiñe: “Dari wamaali Kristu” (Huan 1:29, 36, 41).

Gama lumoun, mégeigili dimurei le lunbei lachoururagüdüni. Dan le labadiseirunbalin Huan Hesusu, írida lumuti Heowá Mesíasime lau lani sífiri sandu, aba lariñagun: “Anihán niráü le hínsiñebei nun, le aubei óunwenbu lan nugundan” (Matéu 3:16, 17). Chülüha Mesíasi le füramasewabei!

Ídabuga lasusereda le? Lidan irumu 29 l.l.H. dan le lagunfulirun 483 irumu le uágubei ladimureha Danieli. Anha, anihán fiú lídangiñe saragu katei le arufudubalin Hesusu lan Mesíasibei. Kábati buga uganu lapurichiha lidan libagari ubouagu?

(Lídangiñeti Matéu kapítulu 1 darí 3, Márükosu kapítulu 1, Lúkasi kapítulu 2 luma Huan kapítulu 1.)