LÁRIGIÑEBEI kristiánuhali lan Pábulu gumeseti apurichihei Larúeihan Bungiu lau ubebeni. Guentó ligíali awanda lanarime éibaahouni. Adügati apostolu le, lidise burí wéiyaasu lun lasubudiragüdüni arúeihani le lunbei lagunfuliruni lisuuni Bungiu houn gürigia lúmagiñe furumiñeti dan.

Lidan furumiñeti luéiyasun, ñǘdünti Lísütüra ani areidaguagüdati aban wügüri le méibugunti lúmagiñe liñüraü. Aba hagumeserun saragu gürigia agúaraha búngiugu lan Pábulu luma Berünawé le lupaaná. Ítagaraü yebe siñá lan herederuniña luéi hadügün sákürifisiu houn. Gama lumoun, aba hafalaruniña gürigia láganiñu Pábulu aba hachamuragun dübü luagun. Íbini hasaminarun hilaali lan, móunwenti, murusun dan lárigiñe aba lagiribudun lidoun uburugu lun líchugun gurasu houn disipulugu.

Aba hariñagun kristiánugu ha huríu mosu lan gaganbadi hamá ha mámabaña huríu lun fiú Lilurudun Moisesi. Lun laranserun sigenei, aba lanügüni Pábulu houn apostolugu hama wéiyaaña ha Herusalénbaña. Lárigiñe hakutihanu Lererun Bungiu lau lídehan sífiri sandu, aba habürühan lidoun burí damuriguaü, aba híchugun gumadi lun hadisedun hawéi guáriua, lun méigin hama hitaü ni uwi le hátagili luma lun magamaridun hamá mamarieidunga. ‘Katei le lunti meha hadügüni’, gama lumoun mama mosu hagunfuliruni Lilurudun Moisesi (Adügaü 15:28, 29).

Lidan libiaman luéiyasun, ñǘdünti Pábulu Beréa fulasu le ñein lubéi Güresia guentó. Huríu ha erederubaña ñein resibi hamuti uganu lau ugundani, akutiha hamutu Lererun Bungiu sagü weyu lun hachoururuni inarüni lan le hafurendeirubei. Mosuya lanurahan Pábulu hawéi láganiñu. Aweiyasuhati chülǘ Atenasi ñein lubéi ladimureha hagibugiñe aban sétanu gürigia ha hulilibaña aturiahan, lau inebehabu ruti aban yanu le mabulieiduwati.

Lárigiñe lǘrüwan luéiyasun lánina apurichihani, aba lidin Pábulu Herusaléun. Dan le lidin ténpulurugu, aba hóuchun fiú huríu háfaruni. Ábati hesefuruni súdara rómana Pábulu aba hanügüni lun hálügüdaguni. Kei gagaradan lan to rómana arufuda lumuti madurun lan ligibugiñe gumadimati Félisi. Siñá hamuti huríu arufuda inarüni lan ni aban lídangiñe duru le híchugubei luagun. Luéi lederegeruni Fésütü, le leweñegua Félisi háhaburugun huríu, amuriahati apostolu lun lanügǘn lumoun Urúei rómana, ábati lóunabun gumadimati: “Béibuga lun urúei” (Adügaü 25:11, 12).

Aba ládinun Pábulu tidan aban waporu lun lidin Italia, ñein ladügǘwa aguseruni, aba tadibiragun waporu ábati lásügürüni luriban dan lidan ubouhu le gíribei Málüta. Dan le lachülürünbei Roma wínwanti tidan aban muna lakilahan. Íbini lábugiñeñein lan harihin súdaragu sigiti Pábulu apurichiha lau ubebeni luagu larúeihan Bungiu houn sun ha achülürübaña bisidei.

(Lídangiñeti Adügaü 11:22–28:31.)