ABAN meha nibureinti úaraguati Danieli, aba lanügǘn kei adaürǘti Babilónioun lubaragiñe lagünrinchawagun Herusalén. Dandu ligía kei híbiri huríu ha asagarúbaña hageiragiñe resibitiña murusun líbürei lau sun hadaürǘña lan. Sun dan le Babilónia lubéi, wéiriti labiniruni Bungiu. Íderagua lumuti áfurida lau ibagari lídangiñe fusu le ñein habéi liñún ani ígirati lun larihini le lunbei lasuseredun ámuñegü. Lani Danieli profesía le burí súdinitimabei ayanuhati luagu Mesíasi luma Larúeihan.

Lidaani lachülürün Mesíasi. Ka dan lunbei hagurabahani lumutuniña Bungiu “lachülürün ábuti le anuadirúabei” o Mesíasi? Ariñawagúati lun Danieli lachülürüba lan 69 dimaasu lánina irumu lárigiñe lariñawagún lun lararamawagüdünya lubarieirun Herusalén. Kei sedüñein lubéi weyu lidan aban dimaasu, aban dimaasu lánina irumu durati sedü irumu. Ariñawagúati lun lararamawagüdünya baríeiru lidan irumu 455 lb.l.H. saragu dan lárigiñe lidaani Danieli. Ánhawa abahüda 69 “dimaasu” o 483 irumu lúmagiñe 455, chülütiwa lidoun irumu 29 l.l.H. Ka asuseredubei lidan dan ligía? Warihibeime. Arufudúati giñe lun Danieli “lagidarúba lan libagari” Mesíasi, lun lafayeihan luagu hafigoun sun gürigia (Danieli 9:24-26).

Urúeibei Mesíasi sielu. Lidan aban lanarime arufudúni, ariha lumuti Danieli Mesíasi “liabin kamá aban liráü wügüri” aba ayarafadeina lan lun lálana larúeihan Bungiu sielu. Aba líchugun Heowá “ubafu luma uéiriguni luma arúeihani lun” le lunbei ladurarun lun súnwandan. Lárigiñe, ábaya líchugun Danieli fe luagu larúeihaba lan Mesíasi úara hama amu gürigia ha unbaña laguahoua “lumutuniña Bungiu le Suntigabafu” (Danieli 7:13, 14, 27).

Lagumuchuba Larúeihan Bungiu lau sun arúeihani ubouagu. Adügati Bungiu lun lariñaguni Danieli lanichigu aban uénedü le adiheridagüdübalin Nabukodonosoru le lurúeite Babilónia. Arihati urúei le aban óunwenbu guáriua, golu lábulugu, laniguagu luma larüna lauti pülata, luragei luma liyada buronse, lúruna gürabu, lugudi gürabu luma múa. Ábati lábürühan aban dübü lídangiñe aban wübü aba léiguadun luagun lugudi guáriua aba ladügüni kalikime. Ábati lafuranguagüdüni Danieli lun urúei ka lan mini lubéi, lariñaga: mini lan lichügü lauti golu Babilónia, le lóustarun lúgubu, líbiri arúeihani gabafuti le lunbei liabin. Lidan lidaani lagumuhóun arúeihani —ugudi lauti gürabu luma múa— lagünrinchagubei Larúeihan Bungiu sun arúeihani le ubouagubei. Lárigiñe larúeihaba ligibuagu ubóu lun sun dan (Danieli, kapítulu 2).

Wínwanti Danieli saragu lun larihini lábürühan Babilónia. Kei lariñawagún lidan profesía Siru agañeirubalin uburugu. Murusun dan lárigiñe, dan le lagunfuliruña lan hageira 70 irumu lúmagiñe lerederun málouga, ligía hagiribudun huríu hageiroun. Lábugiñe hagumadihan saragu urúeigu, fádirigu hama profetagu úaraguatiña, ábanya haransehani huríu Herusalén tuma litenpulun Heowá. Kati asuseredubei dan le lásügürün 483 irumu le uágubei layanuha profesía?

(Tídangiñeti liliburun Danieli.)