LIDAN hadaani lurúeitegu Ísüraeli luma Hudá, chülüguatiña fiú wügüriña espechalitiña: profetagu. Súngubei hagía mégeitiña meha ganigi luma afiñeni le héreti lun hadimurehani luganute Bungiu. Saragu lídangiñe hani profesía adimurehati luagu:

1. Lagünrinchawagun Herusalén. Saragu irumu lubaragiñe lasuseredun, adimurehatiña lánigu Bungiu profeta —Isaíasi luma Heremíasi— luagu lagünrinchawaguba lan Herusalén redei ligíame málouga. Ariñaga hamuti giñe lau dimurei dǘgüdati ka lan uagu lagañida Bungiu hama lílana uburugu. Íbini hariñagun lánigu hamá Heowá, arufuda hamuti mítaran lan lau burí luriban échuni lidan hani relihión, liwiye habagari luma hanarime (2 Urúeigu 21:10-15; Isaíasi 3:1-8, 16-26; Heremíasi 2:1–3:13).

2. Lagumeserunya áhuduraguni inarüniti. Lárigiñe 70 irumu adaürǘni Babilónia, hagiribuduba meha lumutuniña Bungiu hageiroun, haranseruboun ténpulu to Herusalénboun ani gumese haméime áhuduraguni inarüniti (Heremíasi 46:27; Amosu 9:13-15). Kéiburi 200 irumu lubaragiñe, ariñagati Isaíasi ábanba lan wügüri gíriti Siru agañeirei Babilónia ani lesefurubaña lan meha lumutuniña Bungiu. Ariñaga lumuti íbini ida luba lan ladügüni. (Isaíasi 44:24–45:3).

3. Lachülürün Mesíasi luma libagari. Lídanba meha aban uburugu gíriti Belén nasirua lan Mesíasi (Mikeasi 5:2). Ábanbei meha gürigia ǘnabuguti le lunbei lebelurun Herusaléun wariñu luagu aban burigü (Sakaríasi 9:9). Íbini lóuserubaña lan meha gürigia lau ínsiñeni añahein hagía mínsiñeti houn (Isaíasi 42:1-3; 53:1, 3). Le linarün katei, wuribabei meha lounwen. Mini lan san le ñein lan lagumucha libagari Mesíasi? Uá, lásaaragüdübei buga Heowá lun larufuduni lani sákürifisiu lun ferudunawa lan hafigoun gürigia (Isaíasi 53:4, 5, 9-12).

4. Larúeihan Mesíasi. Mabafutiña gürigia gafigountiña lun hagumadihan, anati Mesíasi gabafuti. Ligía lagúahouba lubéi lun Lurúeite Darangilaü (Isaíasi 9:6, 7; Heremíasi 10:23). Danme le larúeihan ubouagu, ñeinbei darangilaü ani lawinwanduba wügüri lidan darangilaü hama animaalugu (Isaíasi 11:3-7). Úaalime sandi (Isaíasi 33:24). Úaalime giñe óunweni (Isaíasi 25:8). Le linarün katei, habagaridayaba hilaaña (Danieli 12:13).

(Tídangiñeti liliburun Isaíasi, Heremíasi, Danieli, Amosu, Mikeasi luma Sakaríasi.)