LAGUNFULIRUBA meha iseri damuriguaü hani kristiánugu aban gárada súdinitu lidan lagunfulirun lisuuni Heowá. Gama lumoun, sufuritiña éibaahouni darí lun hagagibudagun luma lanarime burí peliguru lidan damuriguaü. Ida liña hadüga lun hakipurun úaraguni? Ru tumuti 21 gárada to abürüdǘboun lidan Güriegu iderebugu luma eweridihani le hemegeirubei saragu.

Pábulu abürüdübarun furumiñetu katourusu gárada, túmagiñe gárada houn Rómana darí Ebüréu. Súngubei barü tumuti hiri ha unbaña tabürüdǘwa, gürigia yebe o damuriguaü. Ariha wamá fiú lídangiñe katei le uágubei ladimureha apostolu.

Laruman ibagari luma usa. Ha agamaridutiña mamarieidunga, agabarahatiña o adüga hagía amu burí figóu wéiriti ani masakürihantiña “mebelurunbaña [...] lidoun larúeihan Bungiu” (Galasiana 5:19-21; 1 Korintuna 6:9-11). Ha lubueingu Bungiu lunti lidan hamá aban íbini ámuñegueinarügü lan hani néchani (Rómana 2:11; Éfesuna 4:1-6). Lunti areida hamá, íderagua hamañame híbirigu lidan afiñeni (2 Korintuna 9:7). Ariñagati apostolu houn lun hadaarunu hanigi lun Heowá, ariñagati giñe: “Afurieda humá lun Bungiu sun dan” (1 Tesalónikana 5:17; 2 Tesalónikana 3:1; Filipuna 4:6, 7). Lun laganbuniña Bungiu mosu hafurieidun lun lau afiñeni (Ebüréu11:6).

Ka eweridihani líchugubei Pábulu houn familia? Mosu hínsiñe tan hani wügüriña maríeitiña weiriou houn kei hínsiñegua houngua. Mosu giñe inebe lan tani würi weiriei tun tídangiñe sun tanigi. Agurabati Bungiu gaganbadi hamá isaanigu houn hagübürigu, luma lun harufudahani agübürigu lúrudu le tídanbei Bíbülia houn lau ínsiñeni. (Éfesuna 5:22–6:4; Kolosana 3:18-21).

Lisuuni Bungiu. Adundeha lumutiña ani tóunigi laña Lilurudun Moisesi ísüraelina darí lachülürün Mesíasi le füramase waalibei, ñéingiñe mámaali mosu gaganbadi hamá kristiánugu lun Lúrudu ligía (Galasiana 3:24). Tidan ligaradan Pábulu houn Ebüréu —kristiánugu ha huríu— afuranguagüdati ka lan lisuunibei Lúrudu, ítara kei ligaradan Kristu lidan lagunfulirun lisuuni Bungiu. Afuranguagüdati profesía lan saragu lídangiñe katei le lídanbei Lúrudu. Kéiburi, sákürifisiu hani  animaalugu aban sínbolu lani sákürifisiu le meha lunbei ladügüni Hesusu, le huubei lun ferudunawa lan wafigoun sunsuinagubei (Ebüréu 10:1-4). Adügati lounwen Kristu lun memegeirun waali lan Lúrudu ligía (Kolosana 2:13-17; Ebüréu 8:13).

Aransehani lidan damuriguaü. Wügüriña ha uágubaña lafiñerua lun lichugún wadagimanu houn lidan damuriguaü mosu híchugun hénpulu lánina lubuidun usa gúnfuli haméime le tariñagubei Bíbülia (1 Timotéu 3:1-10, 12, 13; Titu 1:5-9). Súdiniti giñe houdin lubueingu Bungiu lidan sun adamuridaguni lun hibihin adundehani huuti tídangiñe Lererun, ru hagíame gurasu hóuniwagua (1 Korintuna 14:26, 31; Ebüréu 10:24, 25).

Romañein Pábulu dan le labürüdünbarun tibiaman gárada lun Timotéu, ladaürǘña ñein agurabei laguserawagüdün. Fiúrügüñanu kristiánugu ganigitiña, íchigei habagari lidan peliguru lun houdin abisidahei. Keiti subudi lubalin yarafaali lan lounwen, aba labürühan: “Adüga naali le niyarati lidan éibaaguni le, éibaaguaadina chülǘ lumoun lébeha, areida naali arufudahani le lánina wafiñen harumañu” (2 Timotéu 4:7). Másiñati áfarua lan murusun dan lárigiñe. Gama lumoun, sigitu ligaradan adundehaña kristiánugu ha inarünitiña uguñe weyu.

(Lídangiñeti Rómana, 1 tuma 2 Korintuna, Galasiana, Éfesuna, Filipuna, Kolosana, 1 tuma 2 Tesalónikana, 1 tuma 2 Timotéu, Titu, Filemón luma Ebüréu.)