ǗRÜWA irumu-dimi lau Hesusu apurichiha ani subuditi lun yarafaali lan lounwen. Busentiña alidihatiña relihión ha huríu háfaruni, gama lumoun hanufudetiña hawéi gürigia, ladüga ariha hamuti kei profeta. Ábati línchahani Satanási Húdasi aban hádangiñe duusu apostolugu, lun laluguruni lumaisturun. Aba hafayeiruni alidihatiña relihión lau 30 murusun pülata.

Guñoun le lánina Luéyuri Esefuruni, damurigu liña Hesusu hama lani apostolugu lun hefeduhani. Lárigiñe lóunahani Húdasi, aba latatirun Kristu aban iseri efeduhani; Ladinerun Aburemei. Aba lárügüdün aban murusun fein, aba lafurieidun aba lásügüragüdünu houn unsu lani apostolugu. Lárigiñe aban lariñagun: “Núgubu le, le lunbei lederegerún huagu. Lúmagiñe guentó, adüga huméi le, haritaguagüleme nuagun”. Lárigiñe aba lanügün aban weru tau diwéin aba lariñagun: “Anihán nita le lunbei láwiyurun lídangiñe núgubu huagu, lun lagunfulirun iseri daradu” (Lúkasi 22:19, 20).

Lidan lagumuhóun áriebu ligía, arufudahati Hesusu saragu katei houn lani apostolugu. Ruti aban iseri lúrudu houn: lun wéiri lan hínsiñegua hámagua. Ariñagati: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:34, 35). Amuriahati hama lun meferidirun hamani haguraasun luagu katei le lunbei lasuseredun, lárigiñe aba lafurieidun hawagu tídangiñe sun lanigi. Ábati halawahani Bungiu lau uremu aba houdin lidoun fuluri-agei Hetüsemaní.

Ñein aba láhuduragun Hesusu aba ladaarunu lanigi lun Heowá. Sódini aba hachülürün fiú súdaragu, wügüriña tau árüma hama fádirigu lun hanügüni. Gadaradunhaali buga Húdasi hama lun larufuduni Hesusu houn lau aban chuti. Ábati hárügüdüni súdaragu Kristu ani aba hanurahan apostolugu.

Ariñagati Hesusu ligibugiñe liñun-agei halurudun huríu Liráü lan Bungiu ligía. Ariha hamuti alidihatiña katei le kei aban anabúni, aban duru le lunti lanügüni lidoun óunweni. Ábati hanügüni ligibugiñoun Ponsiu Pilatu, le gumadimati rómana. Según Pilatu, madurunti Hesusu ani íbini ítara adüga lumuti le habusenrubei gürigia ha agúarahabaña lun lafarún Hesusu.

Barüwati Kristu lidoun aban fulasu le gíribei Gólugota, ñein aban hádaraguni súdaragu rómana luagu aban wagabu. Sódini aba laburigadun. Rábounweyu ligía le lóunwenbei Hesusu, susereti aban hárabaganali. Bunawati Hesusu lidan aban huyu lidan dübü, laruganbei aba hachoururuni fádirigu lebelaagüle óunaha hagía óunigirei. Lerederuba san buga lidan umúahaü? Uá, chülǘmemeli oura lun lasuseredun milaguru le wéiritimabei.

(Lídangiñeti Matéu kapítulu 26 luma 27, Márükosu kapítulu 14 luma 15, Lúkasi kapítulu 22 luma 23 luma Huan kapítulu 12 darí 19.)