IDA liña hamuga san ibagari lun hamuga úaragua hamá sun lílana aban néchani lau sun harúeite lun Heowá ani inebe ligía lilurudun houn? Larúeihan Salomón le adurarubei bián-wein irumu, ru lumuti óunabagülei.

Lubaragiñe lounwen Dawidi írida lumuti Salomón le liráü leweñeguame. Lidan aban uénedü ariñagati Bungiu lun Salomón líchugubei lan le labusenrun lun. Amuriahati urúei nibureingili le lichú aau luma subudi lun laguseragüdün lau irichaü. Hínsiñeti le lamuriahabei lun Heowá, aba lubéi líchuguni lun. Chouru lumuti giñe lun anhein lan gaganbadi, libihuba lan irisini, uéiriguni luma ibagari migifeti.

Seremei lichú lau Salomón, aba hanarime lan laganbahoun luagu. Lidan aban ókaasion, ageindaguatiña bián würiña luéigiñe aban irahü, biángubei ariñagatiña hasaani lan. Aba lariñagun Salomón lun ladüraawagun irahü lamidan lúmagua! Gúndaatu to furumiñetu, ánhounti to tibiaman aba tayumuragun lun híchuguni tun to aban. Ítara liña lasubudiruni Salomón to lan tibiaman lúguchuboun irahü. Dan le híchugunbei híbiri gürigia fe luagu le asuseredubei, aba gúnfuranda hamani lúmagiñeti lan Bungiu lichú lau Salomón.

Aban lídangiñe katei wéiritimati le ladügübei urúei le, tábunawagun aban óunwenbu ténpulu lun Heowá Herusalén, lun ñeinbei lan áhuduraguni le inarüniti lidan sun Ísüraeli. Dan le tóunwenbudun ténpulu, aba lafurieidun Salomón: “Anhein ñüraü lubéi sielu bun, lau lanarime lueirin, gúbudigiame ténpulu to, to nábunuboun bun!” (1 Urúeigu 8:27).

Subudiwati Salomón saragu darí lun laganbahoun luagu lidoun fulasu díseti kéiburi Sabá, lidan ageiraü Arawia. Adügatu lurúeite ageiraü le, aban wéiyaasu lun tarihini luéirigun luma lirisin Salomón luma lun tóuchaguni lichú lau. Aba taweiridun tanigi saragu darí talawahani Heowá ladüga lanúadirun aban urúei sábiuti. Lau abinirúni lúmagiñeti Bungiu, larúeihan Salomón darangilatimabei ani awanse ligía lidan binadu Ísüraeli.

Híruti mígirun lan Salomón lun ladundehani lichú lau Heowá sun dan. Maganbaditi Salomón lun leweridihan Bungiu, maríeiti hama saragu san würiña ani le wuribatimabei saragu lan hádangiñe huduguatiña houn búngiugu mama inarünitiña. Kei resultóu, aba adisedeina lan luéi Heowá, aba habimehani lun láhuduragun houn guáriua. Ligía lariñagunbei Bungiu lun heferidirubei lan lufamilia libe-agei arúeihani. Meferidirun lubalin súngubei, ladügarügü füramasei le ladügübei Bungiu lun Dawidi. Íbini lagarabaagun Salomón lun Heowá úaraguati Heowá lun lidaradun luma Dawidi.

(Lídangiñeti 1 Urúeigu kapítulu 1 darí 11, 2 Krónikasi 1 darí 9 luma 2 Lúrudu 17:17.)