LÍBURU to migifetimaboun tidan Bíbülia, saragu uremu sagüráuti tílabei, adügüwatu lidan milu irumu. Ha abürüdübalin uremu burí ligía, arufuda hamuti lueirin hafiñen lau lubuidun burí dimurei le hayusurubei. Abürüha hamuti saragu katei le hasandirubei gürigia kéiburi ugundani, igarigu, gateingiradi, asakürihani, alawahani luma íruni. Sun wügüriña hagía, hínsiñeti Bungiu houn ani sandiguatiña houngua yarafa lun. Ariha wamá fiú lídangiñe katei le uágubei ladimureha Sálumu.

Heowá garichabei lun larúeihani sun ubóu, yuuti giñe lun walawahani hudugua wagíame lun. Ariñagatu Bíbülia: “Heowá [...] bíribei, buguyarügüñein le Íñugutimabei ligibuagu sun ubóu” (Sálumu 83:18, Traducción del Nuevo Mundo). Gíbeti Sálumu alawahati Heowá ladüga ladügüni sielu, waruguma, ibagari ubouagu luma lubuidun hágubu gürigia (Sálumu 8, 19, 139, 148). Gíbeti íchuguti uéiriguni lun luagu lóunigiruniña ha eseriwidubaña lun lau úaraguni ani sefu laña (Sálumu 18, 97, 138). Anihein burí amu eremuhati lun, ladüga aban lan Bungiu richaguati le íderagubaliña ha asufurirubaña madurunga ani bei laña wuribatiña (Sálumu 11, 68, 146).

Íderagua lumutiña Heowá ha hínsiñehabubaña lun ru ligía dǘgüdaguaü houn. Gayarati wariñagun Sálumu lan 23 subudiwatimabei, ñein konpararü lumuti Dawidi Heowá luma aban hóuniri mudún le hínsiñehabuti le adundehabaliña lilügüniña mudún ani tóunigi laña. Haritaguagüda lumutiwa Sálumu 65:2 luagu ‘aganba lani Heowá afurieiduni’. Íbini ha adügübaña saragu katei wuribati lidan habagari daritiña gurasu lidan Sálumu 39 luma 51. Ñein, arufuda lumuti Dawidi asakürihaali lan tídangiñe sun lanigi luagu lanarime burí lifigoun ani chouru lumuti feruduna lubéi lan Bungiu. Lidan Sálumu 55:22 ruti dǘgüdaguaü woun lun wíchuguni wemenigin luagun Heowá ani ígira wagíame lun líderaguniwa lau waturóbulin.

Layusurubei Heowá Larúeihan Mesíasi lun lanügün aban iseri ubóu. Lidan Sálumu adimurehóuati saragu luagu Mesíasi, Urúei le füramase waalibei. Ariñagati Sálumu 2 lagumuchaguagüdübei lan Urúei le, sun néchani le ebedaaguti lun. Lidan Sálumu 72 arufudati lagumuchuba lan lau ilamaü, marichaü luma sun luwuyeri wuribani. Ariñagati Sálumu 46:9 layusurubei lan Bungiu Larúeihan lun lagumuchun lau wuribu luma tau sun árüma. Aliihatiwa giñe lidan Sálumu 37 úabaña lan gürigia wuribatiña lidan iseri ubóu ani hawinwanduba lan ha richabaña lun súnwandan lidan úarani luma darangilaü.

(Lídangiñeti Sálumu.)