Abahüdaguni 40

Moisesi agayuaha luagu dübü

SÜGÜHA burí irumu... 10  irumu, 20 irumu, 30 irumu, 39 irumu! Ani añahagua ísüraelina lidan fulasu mageirawati. Lidan sun irumu burí ligía tóunigi lumutiña Heowá lumutuniña. Hóugüda lumutiña tau maná. Adundeha lumutiña wéyuagu tau aban dúeri, luma áriebu lau aban wagabu lauti watu. Ani mawesiruntu hadaüragun magarigadunti giñe hagudi.

Nihán furumiñeti hati lídan irumu 40 lúmagiñe háfuridun ísüraelina Ehiptugiñe. Chülüyaaña ísüraelina Kadesi. Ñéinñanu meha dan le hóunahounbei 12 aríaahatiña fulasu aríaahei ageiraü Kanán 40 irumu lubaragiñe. Aba tóunwen María to litu Moisesi Kadesi. Ani kei lidan furumiñeti ókaasion anihein turóbuli ñein.

Madaritiña gürigia duna. Aba hekeharun lun Moisesi: ‘Hilagubeihaadiwa hamuga meha. Kame san basagarawa Ehiptugiñe lun banügüniwa lidoun lagübüri fulasu le? Úati ni kata áhüchüti ya, úatu türigu, ni igu, ni beibei ni güranáda. Úagubeiti ni duna lun watun.’

Dan le lidinbei Moisesi luma Aarón afurieida tidan tabernákulu, aba lariñagun Heowá lun Moisesi: ‘Óundaraguabaña gürigia. Hagibugiñe súngubei badimurehame lun dübü le ñeinbei. Lésehaba duna lídangiñe lun hatun sun gürigia hau sun habiñanigu.’

Ábati lóundaraguniña Moisesi gürigia, aba lariñagun: ‘Aganba humá huguya ha mafiñebaña luagu Bungiu! Mosu san wasagarun duna hun lídangiñe dübü le au luma Aarón?’ Ábati lagayuahan Moisesi luagu dübü bián wéiyaasu lau luenwen, aba lésehan bandi duna lídangiñe. Anihein duna houn sun gürigia hama sun animaalugu ha ñeinbaña.

Gama lumoun aba lagañidun Heowá luma Moisesi luma Aarón. Subuditi bun ka lan uagu? Ladüga hariñagun luagu hagíaba lan asagara duna lídangiñe dübü. Ani le linarün aban katei Heowá adügübalin. Ani ladüga mariñagun hamani Moisesi luma Aarón inarüni luagu katei le, aba lariñagun Heowá houn: ‘Madügünbadün lun hebelurun numutuniñu lidoun fulasu le gíribei Kanán.’

Aba háfuridun ísüraelina Kadesigiñe lau loufudagun. Murusun dan lárigiñe aba hachülürün luagun wübü Oru. Ñein, ligibuagu wübü lounwe Aarón lau 123 irumu. Wéiriti hirun ísüraelina, ayahuaha hamuti Aarón luagu 30 weyu. Eleasárü le liráü Aarón ligíali fádiri le íñutimabei houn néchani ísüraelina.

1 Lúrudu 20:1-13, 22-29; 2 Lúrudu 29:5.