Abahüdaguni 61

Ladügǘn urúeime

ÁBAYA lóuchun Saulu lárügüdüni Dawidi. Barüti 3.000 hádangiñe habuidun-agei lisudaranigu lun háluahani. Lasubudirunbalin Dawidi le, aba lóunahan aríaahatiña lun harihini halía lan lemeraagua Saulu áriebu ligía. Ábati lálügüdün biama hádangiñe luwügüriña: ‘Kaba ñǘdün numa tidan likianpun-agei Saulu?’

‘Auba ñüdün,’ liña Awisái le tiráü Seruya to litu Dawidi. Dan le aniha lan Saulu hama luwügüriña arumuga, aba lebelurun Dawidi luma Awisái tidoun kianpu-agei. Aba hanügüni larufunte luma lagei lidunari Saulu le lichügügiñebei. Kei harumuguña lubéi súngubei marihin hamutiña maganbun.

Arihabei Dawidi luma Awisái. Anurahaaña, ligibuaguñanu aban wübü guentó. Ábati lagúaragun Dawidi lun hábuti súdara ísüraelina: ‘Ábünerü, ka uagu móunigirun bubalin babureme, le urúei? Arihabá! Hagéi san larufunte luma lagei lidunari?’

Aba lagagudun Saulu. Ábati lasubudiruni lumalali Dawidi, aba lálügüdüni: ‘Dawidi, buguya san lira?’ Gayarati barihini Saulu luma Ábünerü ǘnabu.

‘Anha urúei, au,’ liña lóunabun Dawidi. Aba lálügüdahan Dawidi: ‘Ka san uagu báluga barügüdünina? Ka wuribati nadügübei? Anihán barufunte urúei. Ñǘbuinla aban hídangiñe anügei.’

‘Wuribati nadüga,’ liña Saulu. ‘Óuseraadina kei aban ibidiougua tau.’ Ábati lidin Dawidi, ánheinti Saulu aba lagiribudun lúbiñoun. Ábati lariñagun Dawidi lúniwagua: ‘Aban lídangiñe weyu le láfarubadina Saulu hilagubei. Mosu nanurahan hageiroun filistéana.’ Ligíati ladügübei. Eyeeda lumutiña Dawidi filistéana, aba lafiñeragüdüniña hámagiñe haali lan.

Fiú dan lárigiñe aba hawarirun filistéana ageindagua kóntüra Ísüraeli. Lidan wuribu, hilati Saulu luma Yónatan. Wéiriti lirun Dawidi lárigi katei le, aba labürüdün aban lubuidun uremu, ñein lubéi leremuha: ‘Hírutina bárigi níbiri Yónatan. Wéiriti meha bínsiñe nun!’

Lárigiñe le, aba lagiribudun Dawidi Ísüraelin, lidoun uburugu Ebürón. Ñein anihein aban wuribu hadan wügüriña ha anúadirubalin Isü-bosetü, le liráü Saulu, lun urúeime hama ha busénbaña lun Dawidiba lan urúei. Gama lumoun, gañein hamuti luwügüriña Dawidi wuribu. Larúeihanbei Dawidi 30 irumu lau. Arúeihati Ebürón luagu sedü irumu dimi. Ñein nasirua hamá fiú hádangiñe lirahüñü, Amünón, Abüsalón luma Adoníasi.

Lau lasügürün dan aba lidin Dawidi hama luwügüriña árügüda aban lubuidun uburugu, Herusalén. Hoabü, ábaya tiráü Seruya, to litu Dawidi, ligía abugurubalin wuribu. Ligía líchugunbalin Dawidi hábutime súdara, lun lafayeiruahame. Guentó lagumesera Dawidi arúeiha uburugu Herusalén.

1 Samueli 26:1-25; 27:1-7; 31:1-6; 2 Samueli 1:26; 3:1-21; 5:1-10; 1 Krónikasi 11:1-9.