Fánreinti 1

Ladügǘn sun katei darí Gunran

Halíagiñe san liabin sielu luma Ubóu? Ida liña san ladügǘn Weyu, Hati tuma waruguma, ítara kei bandi katei le Ubouagubei? Ru tumuti Bíbülia óunabagülei inarüniti dan le tariñagun Bungiu lan adügübalin sun katei. Ligía tagumeserunbei waliburun lau abahüdaguni tídangiñeti Bíbülia luáguti sun katei le adügǘbei.

Furendeitiwa ha lan furumiñetiñu gürigia ha ladügübaña Bungiu sífirigu hamá kei ligía. Ánheligu meha hagía. Ánheinti Ubóu adügüwati houn gürigia kei wagía. Ligía ladügünbalin Bungiu wügüri tuma würi, Adán tuma Ewa híribei, ábati líchuguniña lidan aban lubuidun fuluri-agei. Ani aba maganbadi hamá lun Bungiu ábati heferidiruni haricha lun hasigirun awínwanda.

Lúmagiñe ladügǘn Adán darí óunwenbu Gunran ñeinñein 1.656 irumu. Lidan dan ligía wínwantiñu saragu gürigia wuribatiñu. Yágüta sielu ñéinñanu meha gürigia marihúaditiñu ha sífiri, Satanási hama lánigu ánheligu wuribatiñu. Ubouagu, ñeinñein meha Kaín hama saragu amu gürigia wuribatiñu, haganagua ñéinñanu fiú wügüriña ámutiñu ladüga lanarime here. Añahein meha giñe gürigia buitiñu Ubouagu... Aweli, Enoku luma Noé. Lidan Fánreinti Númeru ABAN le, waliihaba hawagu sun gürigia ha luma burí katei le asuseredubei.