“Lunti hamuga gayaraahali lan harufudahani Lererun Bungiu” (Ebü. 5:12). Ma lubuidun katei le, adián? Agunbiraha lumutiwa Heowá, Máisturu le buídutimabei lidan sun ubóu, lun warufudahani le furendei wamaalibei luagu houn amu. Aban lubuidun chansi warufudahani inarüni luagu Heowá —houn waduheñu, houn lílana damuriguaü o houn gürigia lidan apurichihani— ani aban giñe óunwenbu buligasion lira. Kati lunbei wadügüni lun buídutima lan warufudahan?

Darí wamuti óunabagülei lidan dimurei le labürüdübei apostolu Pábulu lun Timotéu: “Rúguaba bungua lun baliihanu Lererun Bungiu”. Ani lárigiñebei línchahani lun líchugun gurasu lau le larufudahabei, aba giñe lariñagun lun: “Anhein badüga ítara, basalbaruba, salba hagíame giñe ha aganbubalibu” (1 Tim. 4:13, 16). Kei esefuha lubéi uganu le wapurichihabei, wéiriti lisudinin wáfaagun lun buídutima lan waliihan luma warufudahan. Tidan garüdia to, hafurendeiruba ida luba lan hadügüni lira. Ariha wamá fiu katei tuagu:

Heowá Máisturubei le buídutimabei (Isa. 30:20). Lau tídehan garüdia to, hafurendeirubei ka lan gayaraabei hadügüni lun buídutima lan haliihan luma harufudahan ani moun lumuti habulieiduni lúmagiñeti lan Heowá uganu le wapurichihabei ani ligía lan achawahabaliña gürigia luouguoun (Huan 6:44). Ligíati, gabügürügualá hamuriahan sífiri sandu luma. Yusu humóun Lererun sagü gayara lan. Mamalá húniwagua háluaha uéiriguni, ru huméi sun uéiriguni lun Heowá. Ani adüga huméi sun hiyaraati lun weiri lan línsiñedun Heowá houn gürigia ha únbaña hayanuha.

Agunbiraha laadün Bungiu íchigei uganu súdinitimati le úagilibei amu libe lidan sun Ubóu. Chouru wamuti gayaraabei lan hadügüni, anhaün afiñera luagu “erei le líchugubei Bungiu” hun (1 Fe. 4:11).

Hupanaagu lidan wadagimanu lánina arufudahani le,

Sétanu le Arihibei lau Hawadigimari Gefentiña luagu Heowá lidan sun Ubóu