Sanduariugu meha lawinwanda Samueli nadagimein ligía ñein lúmagiñe liñüraü. Tidoun meha sanduariu houdin gürigia áhuduragua lun Heowá. Hínsiñeti hamuga bun basubudiruni ka lan uagu lawinwanda Samueli ñein? Lun basubudiruni, furumiñe mosu wafurendeirun murusun tuagu Ana to lúguchu.

Sügüti meha saragu irumu ani siñati meha gasaani tan Ana, gama lumoun wéiriti meha busén tan gasaani tan. Ligía tafurieidunbei lun Heowá, tariñaga: “Lau fulesei, Heowá, íderaguabana”. Ábati füramase tan lun: “Ánhabu íchiga aban isaani nun, nóunahabei awinwanda tidan sanduariu lun lawadigimaridun ñein”. Óunaba lumuti Heowá tafurieidun Ana, ábati gasaani tan aban irahü. Aba tíchugun Samueli luagu. Dan le gúnfulihali Samueli ǘrüwa o gádürü irumu, aba tanügüni Ana eseriwida lun Bungiu tidan sanduariu, ítara liña tagunfuliruni le füramase tubéi.

Elí meha líribei fádiri le íñutimabei tidan sanduariu. Nadagimeintiña meha giñe bián wügüriña ñein, lirahüñü Elí. Tidan meha sanduariu houdin gürigia áhuduragua lun Heowá, ligíati mosu lubéi meha buidu lan hóuserun gürigia ha aganóubaña ñein. Gama lumoun, ariha lumutiña meha Samueli lisaanigu Elí adüga katei burí wuribati. Adügati funa san Samueli katei wuribati kei lisaanigu Elí? Ka basaminarubei?... Uá, sigiti Samueli adügei le labusenrubei Heowá, ítara kei meha harufudahani lagübürigu lun.

Ka hamuga meha lunbei ladügüni Elí houn bián lisaanigu?... Mosu hamuga meha lasagaruniña tídangiñe sanduariu lun masigi hamá nadagimein ñein. Gama lumoun, madügün lumuti Elí lira. Ligía lagañidunbei Heowá dandu luma kei hama bián lisaanigu, ábati desidírü lan labeichaguniña.

Aban weyu guñoun, dan le larumuguña lan Samueli, aba laganbun laguarún lun: “Samueli!”. Aba léibaagun le ñeinhin lubéi Elí, gama lumoun, aba lariñagun Elí lun: “Magúatina bun”. Ǘrüwañein wéiyaasu lasuseredun katei le. Dan le lǘrüwadunbei, aba lariñagun Elí lun: “Ánhabuya aganba laguarún bun, bóunabame: ‘Bayanuha, Heowá, naganbuñadibu’”. Danti le ladügünbalin  Samueli lira, aba lariñagun Heowá lun: “Bariñagame lun Elí nabeichaali lan hau sun liduheñu luagu katei wuribati le hadügübei”. Hanufudeti funa san Samueli líchuguni uganu le lun Elí? Ka basaminarubei?... Anha, hanufudeti yebe Samueli labahüdaguni katei le lun Elí. Íbini ítara, subudigüda lumuti uganu ligía lun ladüga gaganbadi lan lun Heowá. Gúnfuliti le lariñagubei Heowá: fiu dan lárigiñe, aba lounwen Elí hilagua hagía biángubei lisaanigu.

Buiti hénpulu le líchugubei Samueli woun. Súnwandan meha ladügüni le labusenrubei Heowá, íbini ariha lan amu gürigia adüga katei wuribati. Angia buguya? Gaganbadimémebadibu giñe san lun Heowá ítara kei meha ladügüni Samueli? Anhein badüga ítara, wéiribei lugundan Heowá hama bagübürigu bau.