Hénrenguti funa san ladügǘniwa le hínsiñebei lun Heowá? Ka basaminarubei?... Saminatiña hiibe-agei gürigia luagu hanarime lan lénrengun. Gama lumoun, arufudahatu Bíbülia mítaran lan. Abahüdaguatu woun luagu aban irahü gíriti Hosíasi le meha áfaagubei saragu lun leseriwidun lun Heowá. Ani ibiha lumuti, seremei anúadira lániña lumadagu buidu. Furendei wamá murusun luagu Hosíasi luma hawagu lumadagu.

Amón, le meha lurúeitebei Hudá, lúguchibei Hosíasi. Aban meha gürigia wéiriti luriban Amón ani huduguati meha houn guáriua. Dan le lóunwenbei, aba larúeihan Hosíasi le liráü leweñegua. Subuditi bun átiri lan meha irumu lau Hosíasi dan le lagumeserunbei arúeiha Hudá? Wídürügügili meha irumu lau! Óuserati funa san Hosíasi wuriba kei meha lúguchi?... Uá, móuserunti kei ligía.

Busenti meha Hosíasi leseriwidun lun Heowá lúmagiñe liñüraü. Ligía láluahanbei umadagu buítiña ha hínsiñehabutiña lun Bungiu, íderagua hamutiti umadagu ha lun gaganbadi lan lun Heowá. Kátaña méhati lumadagubaña Hosíasi?

Sofoníasi meha aban hádangiñe. Aban meha lani Heowá profeta ligía. ani Mosu  meha lasubudiragüdüni uganu le houn lílana Hudá: “Wuribabei lidin hun anhaün asigira áhuduragua houn guáriua”. Adügati Hosíasi gasu lau le lariñagubei Sofoníasi. Ligíati lúnrügüñein lubéi Heowá láhuduragua, máhuduragunti houn guáriua.

Lumada meha giñe Hosíasi Heremíasi. Yarafaguati meha harumudiri biángubei hagía, ani dan meha le nibureingiña yarafaguati meha giñe hawinwandun. Dandu meha Heremíasi kei Hosíasi ídehatiña hámagua lun heseriwidun lun Heowá. Ma meha lubuidun hanaagun houngua, darí lun labürüdün Heremíasi aban uremu espechaliti le ídanbei lariñagei weiri lan lálugun lárigi Hosíasi lárigiñebei lounwen.

Buiti hénpulu le líchugubei Hosíasi woun, adián?... Busenti meha Hosíasi gaganbadi lan lun Bungiu lúmagiñe liñüraü. Lun libihini lira, mosu meha lanúadirun umadagu ha hínsiñehabutiña lun Heowá. Busentibu giñe beseriwidun lun Heowá, adián? Ligía súdini lubéi báluahan umadagu ha hínsiñehabutiña lun.