Ka badügübei dan le basandirun anufudei?... Másiñati ñüdün ban lumoun búguchi o tumoun búguchu áluaha ídemuei. Gama lumoun, anihein giñe amu gürigia le gayarabei líderagunibu. Héretimati luéi furumiñeguarügü gürigia. Subuditi bun katei lan?... Ítara liña, gayarati líderagunibu Heowá. Gayarati bamuriahan ídemuei luma furumiñeguarügü oura. Ítara liña meha ladügüni aban nibureinti le uágubei tabahüdagua Bíbülia, gíriti Dawidi. Manufudeti meha ladüga afiñe lan luagu Heowá.

Lúmagiñe liñüraü Dawidi harufudaha lagübürigu lun luagu Heowá lun gayara lan línsiñedun lun. Ligía meha manufude lubéi ni íbini dan le ladunragun luma turobuli le adügüti lun lanufudedun furumiñeguarügü gürigia. Subudi lumuti meha lumada lan Heowá ani gayara lan líderaguni. Aban weyu, dan le lóunigiruñanu lubéi Dawidi lilügüniña mudún, ligía liabin aban liñún, aba lárügüdün aban hádangiñe! Subuditi bun ka lan ladügübei Dawidi? Aba léibaagun lárigi liñún, aba láfaruni hilagubei, genegeti láurügüñein lan lúhabu láfarei. Áfarati giñe Dawidi aban osu le ebelurubei haganaguóun mudún. Ka meha íderagubalin Dawidi lun manufude lan?... Binarün, Heowá íderagubalin.

Arufuda lumuti giñe Dawidi, lidan amu ókaasion, manufude lan. Hageindaguña meha ísüraelina hama filistéana. Wéiriti meha ligagubun aban hádangiñe súdara filistéana, gíriti Goliadi, aba meha hígandei ligía! Ábaha lerederun Goliadi adaagua bula hau lisudaranigu Ísüraeli luma lau Heowá. Lariñagatiha houn lisudaranigu Ísüraeli: “Ka ganigibei liabin ageindagua numa!”. Úati meha ganigiti lidin, hanufudetiña meha súngubei luéi. Dan laganbunbalin Dawidi le lariñagubei Goliadi, aba lariñagun lun: “Anati au nídiba ageindagua buma! Líderagubadina Heowá agañeirei wuribu!”. Ma inarüni ganigi lan meha Dawidi?... Ítara liña. Busentibu basubudiruni ka lan asuseredubei lárigiñe?

Aba lanügün Dawidi aban chilinchádi, budá ligía seingü dübü guyeti aba lidin ageindagua luma hígandei. Dan le larihinbalin Goliadi irahügili lan Dawidi, aba ladügün bula lau. Ábati lariñagun Dawidi lun: “Biábiña nuagun tau aban eféin, ánheinti au nídiña buagun lidan liri Heowá!”. Ábati léibaagun Dawidi lubaroun hígandei ligía. Aba líchugun aban  dübü tidoun chilinchádi, aba lachüürüni luagun. Aba lahitiruni labadinaguóun biángubei lagu, aba lábürühan hígandei múarugun, hilagubei! Dan le harihinbalin filistéana katei le, aba hasustaragun saragu darí lun háfuridun éibaagueina. Ábanrügü irahü kei Dawidi agañeinrubalin wuribu luma aban hígandei kei Goliadi! Ka funa san íderagubalin?... Heowá íderagubalin, ani héretimati Heowá luéi furumiñeguarügü hígandei!

Ka wafurendeirubei lídangiñe abahüdaguni luáguti Dawidi le?... Héretima lan Heowá luéi furumiñeguarügü gürigia. Ánhabu lubeiti asandira anufudei somu dan, haritaguabei le: Bumada Heowá ani gayarati líderagunibu lun manufude ban.