Dan le wapurichihan houn gürigia luagu Heowá, añahein hádangiñe aba hagañidun, añahein amu aba hadügün bula wau. Adügati katei le lun wasandiragun woungua wuriba, adián? Háfuga ariñagatiwa wóunguarügü: “Mapurichihandigiaadina luagu Heowá”. Susereñahaali san katei le bun?... Abahüdaguatu Bíbülia woun luagu aban wügüri le meha hínsiñehabubei lun Heowá, gama lumoun, ítagaraü yebe masigi lan apurichiha houn amu luagu. Heremíasi líribei wügüri ligía. Ariha waméi ka lan asuseredubei.

Dan le meha nibureingili Heremíasi, aba lariñagun Heowá lun mosu lan lasubudiragüdün aban uganu houn gürigia. Mosu meha lariñagun houn: “Hebé hadügün katei wuribati”. Kei aban lubéi meha katei hénrenguti lira, aba lanufudedagun Heremíasi. Ligía lariñagubei lun Heowá: “Ñǘraügidina ani ibidiñeti nun kaba lan nariñaga houn gürigia ha”. Gama lumoun, aba lariñagun Heowá lun: “Manufudedabá, níderagubadibu”.

 Ábati lagumeserun Heremíasi ariñaga houn ísüraelina: “Habeichúba sun huguya anhein masansirun humá higaburi”. Adügatiña funa san gasu lau?... Uá, saragu hádangiñe aba hadügün bula lau, híbiri aba hasafaragun saragu, añahein hádangiñe álugatiña íbini lun háfaruni hilagubei! Ida liña funa san lasandiragun Heremíasi lungua?... Aba lanufudedagun saragu darí lun lariñagun: “Mabusenrúnhadina napurichihan houn amu luagu Heowá”. Le funa san lúgubu rárama lani Heremíasi lapurichihan luagu Heowá?... Uá, madügün lumuti. Kei weiri lubéi meha línsiñe Heowá lun, meredeti lapurichihan luagu, ligíati lóunigirunbalin hawéi láganiñu.

Aban hénpulu, aba meha hádaruni fiu wügüriña wuribatiña Heremíasi lidoun aban fusu huliliti. Abulucheina liña meha Heremíasi lidan baribarabu le lídanbei fusu ligía, ani lanwoun lira, úati meha ni duna ni éigini luma. Busentiña meha wügüriña hagía lun lounwen Heremíasi! Séfuwati san Heremíasi? Anha, ladüga adügati Heowá lun lasagarúniwa ñéingiñe.

Ka gayarabei bafurendeiruni lídangiñe lani Heremíasi hénpulu?... Meredeti meha lapurichihan Heremíasi luagu Heowá lau sun meha anihein lan dan lasandirun anufudei. Gayarati giñe hadügün gürigia bula bau dan le bapurichihan luagu Heowá o gayarati hasafaragun buma. Ani másiñati ladügün katei le lun basandirun busiganu o anufudei. Gama lumoun, mararamabéi bapurichihan luagu Heowá. Haritaguabéi líderagubadibu lan Heowá súnwandan, ítara kei meha líderaguni Heremíasi.