Subuditi san bun katoun lan irahü to lídanboun dibuhu?... Mariñagun tumuti Bíbülia ka lan tiri, gama lumoun, ariñagatu woun Hefüté lan meha líribei túguchi. Aba meha lagundaarun Heowá luma Hefüté le túguchi luagu aban katei le tadügübei. Hínsiñeti hamuga bun basigirun afurendeira luagu Hefüté luma tuagu lisaani?

Aban meha wügüri buiti Hefüté ani gíbeti meha dan lásügürün arufudaha tun lisaani luagu Heowá. Héreti meha ani gagumadihadi ligía. Ligíati hariñagunbei ísüraelina lun: “Adundehabáwa lidan wawuribuhan hama wáganiñu”.

Aba lamuriahan Hefüté luma Heowá lun líderaguni agañeirei wuribu. Ábati füramase lan lun: “Ánhana bíderagua agañeirei wuribu níchugubei furumiñeti o furumiñetu gürigia to áfuridutu íchigei buiti achülürüni nun  bun”. Ka mini lubéi le? Tawinwanduba lan gürigia tuguya lisanduariunrugu Bungiu, nadagimein tuguyame ñein lun sun tibagari. Aban meha fulasu le ñein lubéi houdin gürigia áhuduragua lun Bungiu sanduariu. Gañei lumuti san Hefüté wuribu? Anha, gañei lumuti. Kati furumiñetu gürigia áfuriduboun eresibirei?...

Lisaani! Tuguyarügüñoun meha lisaani Hefüté, gama lumoun mosu meha lóunahanu awinwanda tidan sanduariu. Ligía lírudagunbei saragu. Gama lumoun, adügaali meha aban füramasei lun Heowá. Haritagua bágili? Ligía tariñagunbei lisaani lun: “Núguchi, kei adügaadibu lubéi aban füramasei lun Heowá, lunti bagunfuliruni”.

Híruguatu meha giñe lisaani Hefüté furumiñe. Ka uagu? Ladüga danme tawinwandun tidan sanduariu, siñaalime tamarieidun ni gasaanigu tan. Gama lumoun, busentu meha tagunfuliruni füramasei le ladügübei túguchi. Busentu meha giñe lun lagundaarun Heowá tau. Súdinitimati meha lira tun sügǘ lau tamarieidun o gasaani tan. Ligíati tídinbei awinwanda tidan sanduariu lun sun tibagari.

Afiñetibu san adüga tan irahü to lun lagundaarun Heowá luma túguchi tau?... Ítara liña! Gayarati giñe ítara ban kei lisaani Hefüté. Anhein hínsiñe lubéi Heowá bun gaganbadi buguya lun, wéiribei lagundaarun bau. Ani gúndaabaña giñe bagübürigu.