ARUFUDAHANI 01
Ida luba tíderagunün Lererun Bungiu?
Saragu wádangiñe, adügatiwa álügüdahani luáguti ibagari, asufuriruni, óunweni luma luagu le lunbei lasuseredun ámuñegü. Nidiheritiwa giñe luagu katei le lánina ibagari, kéiburi luagu ida luba lan wagañeiruni le wemegeirubei lun wawinwandun o ida luba lan gunda wamá hama waduheñu. Rúhaña saragu gürigia fe óunaba tani Lererun Bungiu álügüdahani burí súdiniti le ani ru tan adundehani le huuti lidan ibagari. Anihein san somu hasubudirágun le uágubei hasaminara gayaraabei lan tíderaguni Lererun Bungiu?
1. Ka burí álügüdahani tóunabubei Lererun Bungiu?
Óunabatu Lererun Bungiu álügüdahani súdiniti kéiburi le: ida liña lagumeserun ibagari?, ka un wadügǘwa?, ka uagu hasufurira gürigia buítiña?, ka asuseredubei lárigiñe óunweni?, anhein busén habéi sun gürigia darangilaü, ka uagu anihein lubéi burí wuribu?, kaba asusereda lun Ubóu le ídanbei wawinwanda? Agunbiraha tumutiwa Lererun Bungiu áluahei lóunabagüle álügüdahani burí le tidan ani saragu míñunu gürigia ha adüga hamaalibei katei le, gúndaatiña lau óunabagülei le hadarirubei.
2. Ida liña tíderaguniwa Lererun Bungiu lun gunda lan wabagari?
Rutu Lererun Bungiu adundehani huuti woun. Arufudahatu houn iduheñu ida luba lan gunda lan habagari. Ariñaga tumuti woun ida luba lan wahandilihani idiheri luma ida luba lan gunda wamá lau wawadigimari. Éibume wawanserun lidan aturiahani le, hafurendeirubei le tariñagubei Lererun Bungiu luagu burí katei le luma luagu amu. Chóuruti harihibei lan hungua hu lan “sun le bürüwañubei tidan Lererun Bungiu” (2 Timotéu 3:16).
Magidarun tumuti líburu to tubara Lererun Bungiu, ídeharügütu lun wasubudirunu Bíbülia buidu. Ligíati, agunbiraha wamutün lun háluahani sun bérusu le áfuachubei tidan líburu to luma lun harihini ka lan lánibei luma le hafurendeirubei.
SIGÍ HUMÁ AFURENDEIRA
Ariha waméi ida liña lan tíderaguniña Lererun Bungiu amu gürigia, ka lan lunbei wadügüni lun línsiñedun taliihóun woun luma ka lan uagu buidu lubéi lun líderaguniwa amu gürigia lun gunfuranda wamanu.
3. Adundeha tumutiwa Lererun Bungiu
Ítara tiña Lererun Bungiu kei aban leiti héreti le gayaraabei larugoungadagüdüni wémeri. Gayaraati tahuudun woun lun wafurendeirun anúadira buidu luma lun wasubudiruni kaba lan asusereda ámuñegü.
Aliiha huméi Sálumu 119:105, ábameti hayanuhan luagu álügüdahani burí le:
-
Ka meha lasaminarubei le abürühabalin sálumu le tuagu Lererun Bungiu?
-
Agia huguya, ka hasaminarubei tuagu?
4. Óunaba tumuti Lererun Bungiu wálügüdahan
Rutu aban würi fe óunaba tani Lererun Bungiu álügüdahani le meha tadügübei túniwagua luagu saragu irumu. Ariha huméi BIDÉU, ábameti hayanuhan luagu álügüdahani burí le:
-
Ka meha álügüdahani tadügübei würi to warihiboun lidan bidéu?
-
Ida liña líderagunu taturiahanu Lererun Bungiu?
Agunbiraha tumutiwa Lererun Bungiu lun wadügün álügüdahani. Aliiha huméi Matéu 7:7, ábameti hayanuhan luagu álügüdahani le:
-
Ka hamuga álügüdahani habusenrubei lun tóunabuni Lererun Bungiu hun?
5. Gayaraati línsiñedun taliihóun Lererun Bungiu hun
Gíbetiña gürigia hínsiñeti houn haliihanu Lererun Bungiu ani sagatiña buiti tídangiñe. Ariha huméi BIDÉU, ábameti hayanuhan luagu álügüdahani burí le:
-
Ka hasaminarubei nibureintiña ha áfuachubaña lidan bidéu luagu furumiñeguarügü aliihani?
-
Íbini mínsiñe lan aliihani houn, ka uagu hínsiñe lubéi houn haliihanu Lererun Bungiu?
Rutu Lererun Bungiu adundehani woun le ruti gurasu luma emenigini. Aliiha huméi Rómana 15:4, ábameti hayanuhan luagu álügüdahani le:
-
Hínsiñeti hamuga san hun hasigirun afurendeira luagu gurasu luma emenigini le tíchugubei Lererun Bungiu?
6. Gayaraati híderaguniwa amu lun gunfuranda wamanu Lererun Bungiu
Bóugudin luéi haliihanu Lererun Bungiu hábuguarügü, ariha hamaali saragu hu lan haturiahanu lau hídehan amu gürigia. Aliiha huméi Adügaü 8:26-31, ábameti hayanuhan luagu álügüdahani le:
-
Kaba íderaguawa lun gunfuranda wamanu Lererun Bungiu? (Ariha huméi bérusu 30 luma 31).
Lun meha gayara lan gunfuranda lanu wügüri etiopíana Lererun Bungiu, mosu meha líderawagun. Ariha hamaali saragu gürigia uguñe weyu hu lan haturiahanu Lererun Bungiu lau lídehan amu gürigia.
LE HARIÑAGUBEI FIU GÜRIGIA: “Leferidiruñein gürigia lidaani dan le laliihanu Bíbülia”.
-
Agia huguya, ka hasaminarubei? Ka uagu?
LE HAFURENDEIRUBEI
Rutu Lererun Bungiu adundehani luáguti ibagari, óunabatu álügüdahani le súdiniti ani rutu gurasu luma emenigini.
Águyuguagüdüni
-
Ka luwuyeri adundehani wadarirubei tidan Lererun Bungiu?
-
Írida humá fiu lídangiñe álügüdahani le tóunabubei Lererun Bungiu.
-
Ka habusenrubei hafurendeiruni tídangiñe Lererun Bungiu?
FURENDEI HUMÁ LANWOUN
Furendei huméi ka lan uagu hu lubéi adundehani le tídanbei Lererun Bungiu uguñe weyu.
“Magumuchaguaditi lichú aau le tídanbei Bíbülia” (Garüdia Awisahatu, núm. 1 2018)
Ariha huméi ida liña lan tíderagun Lererun Bungiu aban wügüri le meha ageindagubei luma luriban katei le lasandirubei lúmagiñe liñüraü.
Ida liña nagumeserun aban iseri ibagari ani gúndaati (2:53)
Ariha huméi adundehani le tíchugubei Lererun Bungiu lun gunda lan habagari iduheñu.
“12 adundehani lun gunda hamá iduheñu” (Agaguduabá!, núm. 2 2018)
Ariha huméi ida liña lan tafuranguagüdün Lererun Bungiu aban saminaü charati luáguti kátima lan agumadihabei lidan ubóu le.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
