ARUFUDAHANI 03
Gayaraati san hafiñerun luagu le tariñagubei Lererun Bungiu?
Daritiwa saragu füramasei luma adundehani tidan Lererun Bungiu. Lau sun busén humá hasubudiruni le tarufudahabei, másiñati sandí humá machouruni. Gayaraati san lafiñerúniwa luagu adundehani luma füramasei le tídanbei líburu binaduharu to? Le san lúgubu gayara lan wafiñeruni le tariñagubei Lererun Bungiu luagu gayara lan gunda lan wabagari dandu uguñe weyu kei ámuñegü? Añahein saragu míñunu gürigia afiñetiña ítara liña lan. Agunbiraha wamutün arihei hungua.
1. Le san lúgubu susere lan le tabahüdagubei Lererun Bungiu?
Lererun guánarügü Bungiu ariñaguboun inarüni lan dimurei burí le tídanbei (Apurichihati 12:10). Inarünitiña gürigia luma sügǘ le tíridubei Bíbülia (aliiha huméi Lúkasi 1:3; 3:1, 2). Arufuda hamaali saragu sásaamu inarüni hamá saragu gürigia, fulasu, dan luma sügǘ súdiniti le tíridubei.
2. Ka uagu wafiñera tuagu Lererun Bungiu lau sun binaduharu lan?
Anihein dan tariñagun Bíbülia katei le meha ibidiñewabei dan le tabürüdǘnbei. Kéiburi dan tíridun katei le lánina siensia, lau sun múaran lan katei ligía luma le meha hafiñerubei gürigia lidan dan ligía. Ánheinti guentó, arufuda laali siensia inarüni lan le tariñagubei Lererun Bungiu. Ladüga lau “inarüni luma úarani” tabürüdǘwa (Sálumu 111:8).
3. Ka uagu wafiñera luagu le tariñagubei Lererun Bungiu luagu ámuñegü?
Anihein burí profesía a tidan Lererun Bungiu le asubudiragüdübalin “le lunbei lasuseredun [...] saragu dan lubaragiñe” (Isaíasi 46:10). Ariñaga tumuti meha kaba lan asusereda lidan binadu dan saragu dan lubaragiñe. Ayanuhaaru meha giñe luagu burí sügǘ le anügübei fulasu ubouagu uguñe weyu. Lidan arufudahani le, warihiba fiu profesía le agunfulirubei kei tariñaguni Lererun Bungiu ani taweiriduba wanigi.
SIGÍ HUMÁ AFURENDEIRA
Ariha waméi ida liña lan larufuduni siensia inarüni lan le tariñagubei Bíbülia, ariha wagíame fiu profesía tídangiñeti Bíbülia le wéiriti lubuidun.
4. Úarati le tariñagubei Lererun Bungiu luma le larufudubei siensia
Lidan meha binadu dan, saminatiña meha hiibe-agei gürigia anihein lan somu katei ágüdahei Ubóu. Ariha huméi BIDÉU.
Ariha huméi le abürüdǘbei tidan liliburun Hobu kéiburi 3,500 irumu guentó. Aliiha huméi Hobu 26:7, ábameti hayanuhan luagu álügüdahani le:
-
Ka uagu weiri tubéi wanigi lau tariñagun Lererun Bungiu dibigüda lani Bungiu Ubóu “ligibuagu ni kata”?
Bián-sánrügügili irumu ásügürüti guentó lúmagiñe lafuranguagüdüni siensia ka lan lémeribei huya, lau sun bürüwaali lan meha katei le tidan Lererun Bungiu saragu milu irumu lubaragiñe. Aliiha huméi Hobu 36:27, 28, ábameti hayanuhan luagu álügüdahani burí le:
-
Ka aweiridagüdübarun hanigi lídangiñe ligaburi tafuranguagüdüni Lererun Bungiu halíagiñe lan liabin huya?
-
Íderagua lumutün san bérusu burí le waliihabei lúntima hafiñerun tuagu Lererun Bungiu?
5. Ariñagatu Lererun Bungiu lasusereduba lan burí sügǘ súdiniti
Aliiha huméi Isaíasi 44:27-45:2, ábameti hayanuhan luagu álügüdahani le:
-
Bián-san irumu lubaragiñe lábürühan Babilónia, ka katei tariñagubei Lererun Bungiu lasusereduba lan?
Arufudati abahüdaguni luáguti binadu dan gañei lani aban lurúeite Pérüsia gíriti Siru hau sun lisudaranigu uburugu Babilónia lidan irumu 539 lb.l.K. b Furumiñe, aba hegeyeduni duna le geyegubei lau uburugu. Lárigiñe, aba hebelurun uburugun luéigiñe bena le igirúbei hunren, ábati hagañeiruni mageindagunga. Sügühali lóugiñe 2,500 irumu lúmagiñe lasuseredun le ani anihagua uburugu Babilónia günrinwaguañu. Guentó, ariha huméi le tariñagubei Lererun Bungiu lidan profesía.
Aliiha huméi Isaíasi 13:19, 20, ábameti hayanuhan luagu álügüdahani le:
-
Ida liña lagunfulirun profesía le?
Le erederubei lídangiñe uburugu Babilónia, ageiraü Irakü.
6. Ariñaga taali meha Bíbülia katei burí le warihibei asusereda guentó
“Lagumuhóun dan” liña tagúarun Lererun Bungiu lun dan le ídanbei wawinwanda (2 Timotéu 3:1). Ariha huméi le tariñagubei lasusereduba lan lidoun dan le.
Aliiha huméi Matéu 24:6, 7, ábameti hayanuhan luagu álügüdahani le:
-
Ka burí katei súdiniti tariñagubei Bíbülia lasusereduba lan lidoun burí lagumuhóun dan?
Aliiha huméi 2 Timotéu 3:1-5, ábameti hayanuhan luagu álügüdahani burí le:
-
Según le tariñagubei Bíbülia, kaba burí igaburi harufuda gürigia lidan lagumuhóun dan le?
-
Ka burí lídangiñe igaburi le iridúbei lidan bérusu le harihibei uguñe weyu?
LE HARIÑAGUBEI FIU GÜRIGIA: “Buin tiña Bíbülia lau úraga”.
-
Kátima katei achoururagüdübalin hun gayara lan hafiñerun tuagu Lererun Bungiu?
LE HAFURENDEIRUBEI
Arufudati siensia, le abahüdawagúbei luagu binadu dan luma burí profesía gayara lan wafiñerun tuagu Bíbülia.
Águyuguagüdüni
-
Aban san líburu lánina abahüdaguni inarüniti Bíbülia o aban líburu lánina úraga?
-
Ida liña larufuduni siensia inarüni lan le tariñagubei Bíbülia?
-
Afiñetün san ariñaga tani Bíbülia katei lubaragiñe lasuseredun? Ka uagu?
FURENDEI HUMÁ LANWOUN
Charatu san Bíbülia dan tayanuhan luagu katei lánina siensia?
“Úarati san le tarufudahabei Bíbülia luma le larufudubei siensia?” (Ariñahani lídangiñeti jw.org)
Ka arufudubalin wawinwanduña lan lidan “lagumuhóun dan”?
Furendei huméi ida liña lan lagunfulirun profesía le tídanbei Bíbülia luáguti Arúeihani le lani Güresia.
Ruti “uganu le habürühabei profetagu” dǘgüdaguaü woun (5:22)
Ariha huméi ida liña lan ladügün profesía le tídanbei Bíbülia lun lasansirun lisaminan aban gürigia tuagu.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
