1. Kaba wibiha ánhawa áhuduragua lun Bungiu kei aubei labusenra?

WÉIRITI wínsiñe lun Heowá Bungiu. Ligíati, kei samina lubéi luagun le buídubei woun, busenti ladundehaniwa. Ánhawa áhuduragua lun kei aubei labusenra, gúndaabadiwa ani líbürebadiwa luéi saragu turóbuli lánina ibagari. Labinirubadiwa ani líderagubadiwa giñe (Isaíasi 48:17). Gama lumoun anihein saragu san relihión. Íbini hariñagun arufudaha hamani inarüni luagu Bungiu, múarantiña luagu katei lan ni ka lan lagurabahabei wámagiñe.

2. Ida luba gayara lan hasubudiruni ida luba lan láhudurawagun lun Heowá, ani ka uma gayara lan konpararü wamani?

² Ida luba hasubudiruni ida luba lan láhudurawagun lun Heowá? Mama mosu haturíahani ni konpararü humani lafiñen sun relihión. Buídurügübei hafurendeiruni létima tarufudahabei Bíbülia luagu áhuduraguni le inarüniti. Konpararü waméi. Lidan saragu ageiraü, aban turóbuli sériuti seinsu mama inarüniti. Lun hamuga lichugún wadagimanu hun, lun hafanreinraguni seinsu le mama inarüniti lídangiñe le inarüniti. Ida luba hamuga san hadügüni? Mosu funa san hasubudiruni kada seinsu le mamabei inarüniti? Uá. Buídutimabei hasubudiruni ida liña lan seinsu le inarüniti? Danme le hasubudiruni buidu, ligíaba gayara lan hasubudiruni le mámabei inarüni. Ítarameme, lárigiñe hasubudiruni relihión le inarünibei ménrengubei hasubudiruni le mámabei inarüni.

3. Según lafuranguagüdüni Hesusu, ka lunbei wadügüni lun lagundaarun Bungiu wau?

 ³ Súdiniti adorarü wamani Heowá kei aubei labusenra. Gíbetiña gürigia saminatiña gunda lan Bungiu lau sun relihión, ani mama ligía tarufudahabei Bíbülia. Úati giñe buídurügü lan wariñagun kristiánugu wamá, ladüga ariñagati Hesusu: “Mama sun ha ariñagutiña nun: ‘Nabureme, Nabureme’, lun hebeluruba lan lidoun [A]rúeihani le siélubei [...]. Hárügübaña adügübalin lugundan Núguchi Bungiu le siélubei ebelura”. Ligíati, ánhein wafurendeira le lamuriahabei Bungiu wámagiñe adüga waméime ligíarügübei lagundaarun wau. Wati Hesusu houn ha madügünbalin lugundan Bungiu, “huguya le adaagubei wuribani!” (Matéu 7:21-23.) Ítara liña relihión mama inarüniti kei seinsu mama inarüniti: mebegiti ni kata. Ani létima wuribabei, adügati saragu dañu.

4. Ka lilabei bián üma le uágubei ladimureha Hesusu, ani haliñoun lanüga kada aban lídangiñe?

⁴ Ruti Heowá chansi houn sun gürigia lun habagaridun lun súnwandan. Gama lumoun, lun wawinwandun lun súnwandan lidan Paraísu, mosu wáhuduragun lun ani óusera wagíame kei aubei labusenra. Híruti, mabuseerun hamá saragu gürigia hadügüni, ligía lariñagunbei Hesusu: “Belú humá lídangiñe bena le bürüraübei. Ladüga bena luma üma le anügübei gürigia lidoun féridiguaü, tulé buriti, gabaranouga ligía ñein; ani saragu haña ebelurutiña lídangiñe. Ánheinti bena luma üma le anügübei gürigia lidoun ibagari le magumuchaditi, bürüraü liña, murugua, míbetiña adariruti” (Matéu 7:13, 14). Kei warihini, barüti relihión inarüniti lidoun ibagari, ani le mama inarüniti lidoun óunweni. Mabusenrunti Heowá lun leferidirun ni aban, ligía líchugunbei chansi houn sun gürigia lun hasubudiruni (2 Féduru 3:9). Le linarün katei, gayarati lanügüniwa ligaburi wáhuduragun lun Bungiu lidoun ibagari o lidoun óunweni.

5. Ida luba wasubudiruni kátaña lan awinwandubalin relihión inarüniti?

⁵ Ida luba wadariruni “üma le anügübei lidoun ibagari”?  Indikarüti Hesusu ménrengubei lan hasubudirúniwa ha awínwandubani relihión inarüniti lau ligaburi hanügüni habagari. Ariñagati: “Gayaraabei hasubudiruniña luagu le hadügübei” ladüga sun “wewe le buiti, buiti lin” (Matéu 7:16, 17). Lidan amu dimurei, ha awinwandubalin relihión inarüniti arihúati dandu luagu hafiñen kei luagu le hadügübei. Íbini gafigoun hamá ani chara hagía, áfaaguatiña súngubei lun hadügüni lugundan Bungiu. Ariha wamá sisi makü le lunbei líderaguniwa asubudiraña.

6, 7. Ka hasaminarubei lubúeingu Bungiu tuagu Bíbülia, ani ida liña meha líchuguni Hesusu hénpulu?

⁶ Bíbülia lébunaboun sun le harufudahabei lubúeingu Bungiu. Lererun guánarügü Bungiu ariñaguboun: “Sun le bürüwañubei tidan Lererun Bungiu, Bungiu guánarügü íchugubalin haritagunrugun wügüriña lun habürüdüni, ani huutu lun tarufudahan, lun tadeinhan, adügatu lun hígiruni gürigia katei le mabuidunbei ani arufudahatu houn gürigia lidan richaguaü. Lun aranseñu hamá lubúeingu Bungiu lun hadügün sun luwuyeri wadagimanu buiti” (2 Timotéu 3:16, 17). Abürühati apostolu Pábulu houn líbirigu kristiánugu: “Dan meha le haganbunbalin luganute Bungiu le wapurichihabei hun, resibi humuti keisi luganute Bungiu, mama keisi uganu hámagiñeti wügüriña” (1 Tesalónikana 2:13). Ligíati, le arufudahóubei lidan relihión inarüniti luma le hadügübei mama échuni hani gürigia lébunabei, Bíbülia lébunaboun.

⁷ Ru lumuti Hesukrístu hénpulu, ladüga Lererun lan Bungiu lébunaboun sun le larufudahabei. Lidan aban furíei ariñagati lun Lúguchi le siélubei: “Bererun inarünibei” (Huan 17:17). Afiñeti meha Hesusu tuagu Lererun Bungiu, ani úarati meha sun le larufudahabei tuma. Súnwandanha lariñagun: “Tariñahare Lererun Bungiu”, lárigiñe ábaha liridun aban bérusu tídangiñe Bíbülia (Matéu 4:4, 7, 10). Ítarameme, uguñe weyu marufudahan hamuti lubúeingu Bungiu hasaminan guánarügü. Lubaragiñe lira, afiñetiña Lererun lan Bungiu Bíbülia ani yusu hamutu lébuname harufudahan.

8. Ka burí katei adügǘbei lidan láhudurawagun lun Heowá?

 ⁸ Gürigia ha awinwandubalin relihión inarüniti lúnrügüñein Heowá háhuduragua ani subudigüda hamuti liri. Arufudahati Hesusu: “Lúnrügüba Babureme Bungiu báhuduragua, lúnrügüba giñe beseriwida” (Matéu 4:10). Ligía lúnrügü lubéi Heowá háhuduragua lubúeingu. Lidan háhuduragun subudigüda hamuti liri luma ligaburi Bungiu le inarüniti houn amu gürigia. Ariñagatu Bíbulia: “Subudi haméi Heowá lan bíribei. Buguyarügüñein Íñutimabei ligibuagu sun ubóu” (Sálumu 83:18, RVA). Hafalaruñein lani Hesusu hénpulu lau híderaguniña gürigia asubudirei Bungiu. Ariñagati lun Lúguchi: “Subudigüda naali biri houn wügüriña ha bíchugubaña nun ubouagugiñe” (Huan 17:6, RVA). Ítarameme uguñe weyu arufudaha hamuti lubúeingu Bungiu ha inarünitiña liri, lisuini, luma ligaburi Heowá.

9, 10. Ida liña harufudun kristiánugu inarünitiña ínsiñeni hámagua?

⁹ Inarüniti ínsiñeni le harufudubei lubúeingu Bungiu hámagua. Ariñagati Hesusu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Ítara liña meha hínsiñegua furumiñetiña kristiánugu hámagua. Ínsiñeni le hasandirubei lubúeingu Bungiu adügati lun lidan hamá aban meberesenga ka lan hánibei rasa o néchani, anhein gaseinsun o maseinsu habéi (aliiha huméi Kolosana 3:14). Ha lídanbaña relihión mama inarüniti marufudun hamuti ínsiñeni le hámagua. Lun hamuga sandí hamani, máfaraguntiña hamuga hámagua ladügarügü lídangiñe hamá amu néchani o rasa. Márügüdüntiña kristiánugu inarünitiña árüma lun hafaraguniña híbirigu lidan afiñeni ni amu gürigia. Arufudahatu Bíbülia: “Subudiwati kátaña lan lirahüñübaña Bungiu lumoun kátaña lan lirahüñübaña Mafia, lugundun furumiñeguarügü le madügünbalin le buídubei, o mínsiñehabu lan lun liduhe luéigiñe Hesukrístu, mama lánigu Bungiu. [...] Lun hínsiñegua wamá wámagua. Moun lumuti ítara wamá kei Kaín, le meha lánigubei Mafia, aba láfaruni lamulen” (1 Huan 3:10-12; 4:20, 21).

 ¹⁰ Furanguti mígirun lan ínsiñeni inarüniti le lun wáfarahan, ani mama ñein lébeda. Yusu hamuti giñe kristiánugu libe-agei hadaani, here, luma hamegegun lun híchugun dǘgüdaguaü luma ídemuei hóuniwagua (Ebüréu 10:24, 25). Rutiña gurasu hóuniwagua lidan lérengunga ani richaguatiña hámagua. Gaganbaditiña lun le tariñagubei Bíbülia lun hadügüni “le buídubei houn súngubei” (Galasiana 6:10).

11. Ka uagu súdini lubéi weresibiruni Hesukrístu kei le uéigiñebei lasalbarawa Bungiu?

¹¹ Resibi hamuti kristiánugu inarünitiña Hesukrístu kei le uéigiñebei lasalbarawa Bungiu. Arufudahatu Bíbülia: “Úati amu lun lasalbaruniwa luéidigia Hesukrístu, ladüga míchuti Bungiu amu iri ubouagu lun gayara lan wasalbarun luéigiñe” (Adügaü 4:12). Furendeitiwa lidan kapítulu 5, derege lani Hesusu libagari lun lasalbaruniña gürigia ha gaganbadibaña (Matéu 20:28). Ru laali giñe Heowá Hesusu Urúeime lidan Arúeihani le siélubei lun lagumadihani sun Ubóu. Ligíati agurabati Bungiu gaganbadi wamá lun Hesusu falá waméime le larufudahabei lun gayara lan wawinwandun lun súnwandan. Ariñagatu Bíbülia: “Le afiñebei luagu Liráü Bungiu, gabagariti le magumuchaditi; ánheinti le máhabei lafiñerun luagu Liráü Bungiu, mabagaribei libe ibagari ligía” (Huan 3:36).

12. Ka mini lubéi mama lan lánigu ubóu kristiánugu?

¹² Mama lánigu ubóu le lubúeingu Bungiu ha inarünitiña. Dan le rara lubéi Hesusu ligibugiñe Pilatu le gumadan rómana, ariñagati lun: “Mama lánina ubóu le [N]arúeihan” (Huan 18:36). Meberesenga ka lan hageirabei lani Hesusu disipulugu, lábugiñeñanu lagumadihan Arúeihani le siélubei. Ligía mádaragun habéi houngua lidoun polítika ni ageindaguni lánina ubóu le, mádaraguntiña houngua hama ha desidírübaña hebelurun lidoun polítika, labuduhoun hawagu o habuduhan. Gama lumoun, gaganbaditiña lun lúrudu. Ka uagu? Ladüga ariñagatu Bíbülia houn kristiánugu lun “gaganbadi hamá houn gumadimatiña” (Rómana 13:1). Anhein áluga aban óundaruni lánina polítika lafosuruniña lun hadügün somu katei le kóntürati lilurudun Bungiu falá hamuti hani  apostolugu hénpulu, ha ariñagubaña: “Lunti waganbuni Bungiu lun wadügüni le lariñagubei lubaragiñe le hariñagubei wügüriña” (Adügaü 5:29; Márükosu 12:17).

13. Ka hasubudirubei lani Hesusu disipulugu ha inarünitiña luagu Larúeihan Bungiu, ani ka hadügübei?

¹³ Apurichihatiña lani Hesusu disipulugu ha inarünitiña larúeihanrügüñein lan Bungiu emenigini inarüniti houn gürigia. Ariñagati Hesusu: “Lapurichihóuba uganu buiti le luáguti  [L]arúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14). Lubaragiñe hínchahaniña kristiánugu inarünitiña gürigia lun hafiñerun luagu haransehabei lan urúeigu ubouaguna haturóbulin, apurichihatiña luagu larúeihanrügüñein lan Bungiu le siélubei emenigini inarüniti houn gürigia (Sálumu 146:3). Arufudahati Hesusu, lun wamuriahan lidan wafurieidun liabin arúeihani úaraguati ligía dan lariñagun: “Ñǘbuinla [B]arúeihan; adügüwalá bugundan ya ubouagu kei ladügǘniwa sielu” (Matéu 6:10). Ariñagatu Bíbülia luagu Arúeihani le siélubei, “günringuarügü lubéi arúeihani ligía sun líbiri arúeihani [ha arúeihabaña guentó] sunsuinagubei, ábame ladurarun lun súnwandan” ladurarun lun súnwandan” (Danieli 2:44; Arufudúni 16:14; 19:19-21).

14. Según hisaminan ka sétanu adügübalin sun burí katei le arufudubalin ka lan relihión inarünibei?

¹⁴ Lau sun le furendei humaalibei, álügüdagua humá hungua: “Ka relihión ayusurubarun Bíbülia lébuname harufudahan ani subudigüda haméi Heowá lan líribei Bungiu? Ka sétanu hínsiñeguabaña houngua, afiñe hagía luagu Hesusu, dise hagía luéi ubóu le ani apurichihatiña larúeihanrügüñein lan Bungiu emenigini inarüniti houn gürigia? Kárügüñein sétanu adügei sun burí katei le?”. Furanguti larihíniwa hárügüñanu lan gefentiña luagu Heowá adügei (aliiha huméi Isaíasi 43:10-12).

15. Lárigiñe wafiñerun anihein lan Bungiu ka amu katei lagurabahabei wámagiñe?

¹⁵ Mabuídurügüti lafiñerúniwa luagu Bungiu. Ladüga ariñagatu Bíbülia íbini lan máfianu afiñetiña anihein lan Bungiu (Santiagu 2:19). Gama lumoun, furanguti madügün hamani lugundan Heowá, ani magundanti hau. Lun wagundaaragüdüni, mosu wafiñerun anihein lan Bungiu adüga waméime lugundan, furí wagíame lídangiñe relihión mama inarüniti lun wóundarun hama ha lídanbaña relihión inarüniti.

16. Ka lunbei wadügüni lun madan laniwa relihión mama inarüniti?

 ¹⁶ Arufudati apostolu Pábulu siñá lan gádan lániwa áhuduraguni mama inarüniti. Abürühati: “Furí huma lubeiti haganaguagiñe ha mafiñenbaña; dise humá hawéi, liña Habureme: Maguura humá ni kata wíyeti. Ábame neresibirunün” (2 Korintuna 6:17; Isaíasi 52:11). Ligíati, hadisedunbei kristiánugu inarünitiña luéi relihión mama inarüniti.

17, 18. Katoun san “Babilónia to Wéiriboun” ani ka uagu mosu lubéi ‘háfuridun Babilóniagiñe’ furesegueina?

¹⁷ Arufudahatu Bíbülia sun lan relihión le mámabei inarüniti tídanñein lan “Babilónia to Wéiriboun” (Arufudúni 17:5). * Iri le, haritaguagüda lumutiwa luagun binadu uburugu Babilónia, ñein lubéi lagumesera relihión mama inarüniti lárigiñe Guran. Besafu échuni luma arufudahani le komunbei lidan relihión mama inarüniti lüha meha lagumeserun Babilónia. Huduguatiña meha gürigia houn búngiugu ha ǘrüwaguatiña lidan aban, ani uguñe weyu, ligía arufudahani méinibei lidan libe-agei relihión, subudiwati lidan chumagü kei Trinidad. Gama lumoun, furanguti tarufudahani Bíbülia Heowárügüñein lan Bungiu inarüniti, ani Liráü lan Heowá Hesukrístu (Huan 17:3). Afiñetiña meha babilóniana gani lan gürigia aban uani móunwedaditu to asigiruboun awinwanda lárigiñe lounwen úgubu ani gayara lan tasufurirun máfiougati. Uguñe weyu, ligíameme larufudahabei libe-agei relihión.

¹⁸ Aba laburuchagun relihión le meha lídanbei binadu Babilónia lidan sun Ubóu. Ligíati subudiwa tubéi Babilónia to Wéiriboun kei óundaruni lánina sun relihión mama inarüniti le ubouagubei. Ariñagaali Bungiu sódinibei lan lagünrinchawagun óundaruni le. Gunfuranda humaali ka lan uéigiñe súdini lubéi wadisedun sunsuinagubei tuéi Babilónia to Wéiriboun? Busenti Heowá Bungiu lun madarasahan humá lun ‘háfuridun  Babilóniagiñe’, lau aniheingua lan dan (aliiha huméi Arufudúni 18:4, 8).

19. Kaba hagañeira anhaün eseriwida lun Heowá?

¹⁹ Danme desidírü humá hígiruni relihión mama inarüniti, háfuga hadiseduba fiú gürigia huéi. Gama lumoun, dan le heseriwidun lun Heowá úara hama Lumutuniña, gíbetimabei hagañeirun luéi le lunbei heferidiruni. Lasusereduba hun kei houn furumiñetiña lani Hesusu disipulugu, ha meha ígirubaña amu katei lun hafalaruni: hibihuba saragu íbirigu lidan afiñeni. Hebeluruba lidoun aban óunwenbu familia lídangiñetiña sun ubóu, saragu míñunu íbirigu kristiánugu inarünitiña ha lunbaña harufudun ínsiñeni inarüniti hun. Ani gemenigibadün lun hawinwandun lun súnwandan “danme iseri lan sun katei” (aliiha huméi Matéu 19:28, 29). Lau lásügürün dan, gürigia ha adisedubaña huéi gayarabei hafurendeiruni le tarufudahabei Bíbülia ani seriwi hagíame lun Heowá.

20. Kaba asusereda ámuñegü houn ha lídanbaña relihión inarüniti?

²⁰ Arufudahatu Bíbülia málühali lan Bungiu agumucha lau luriban ubóu le, ábame ladügün aban iseri ubóu le richaguati lábugiñe Larúeihan (2 Féduru 3:9, 13). Mame lubuidun iseri ubóu ligía! Ábanrügübei relihión lidan, aban áhuduraguni inarüniti. Afiñetün san lunti lan hóundarun lúmagiñe guentó hama lubúeingu Bungiu ha inarünitiña?