HA AFIÑEBAÑA luagu arufudahani le gíribei Trinidad lidan chumagü, ariñagatiña luagu ǘrüwañanu lan gürigia lidan Bungiu: Úguchili, Irahü luma Sífiri Sandu ani aban lan habu ǘrüwagubei, gayara hamani sun katei ani magumeseha hamá. Ligíati, chouru lumuti arufudahani le luagu Bungiu lan Úguchili, Bungiu Irahü ani Bungiu lan giñe Sífiri Sandu, ani ábanrügüñein lan Bungiu.

Saragu gürigia ha afiñebaña luagu arufudahani le siñaguatiña houngua lun hafuranguagüdüni. Lau sun lira, háfuga afiñe hamá  luagu arufudahoua lan tidan Bíbülia. Gama lumoun, buiti lafuranguagüdǘniwa mafuachun lan dimurei Trinidad ni aban wéiyaasu tidan Bíbülia. Anihein funa san somu bérusu tidan Bíbülia le arufuduti anihein lan aban Trinidad? Lun lounabún álügüdahani le, ariha wamá aban bérusu le ayusurubei lun hálugun harufuduni tídangiñeti lan Bíbülia arufudahani le.

Lariñaga Huan 1:1: “Dan le lagumeserunbei sun katei, ligibugiñeñein meha Bungiu Dimurei ani Bungiu meha Dimurei” (La Nueva Bíblia Latinoamérica [NBL]). Lárigiñe, lídanmeme kapítulu le, ariñagati apostolu Huan furangu Hesusu lan “Dimureibei” (Huan 1:14). Kei ariñaga lubéi bérusu le Bungiu lan meha Dimurei, fiú aliihatiña gufunrandatiña ábanmeme lan Bungiu Irahü luma Úguchili.

Mabulieida waméi lidan lan meha güriegu labürüdüwa seksióun tídangiñeti Bíbülia le, ñéingiñe lásügürawagüda lidoun amu burí iñeñei. Íbini yusu hamani fiú aturiahatiña dimurei burí “Bungiu meha Dimurei” añahein fiú, amu hásügüragüdüni. Ka uagu? Ladüga dan le hakutihani güriegu le meha ayusurubei tidan Bíbülia aba harihini mosu lan hayusurun amu dimurei lun hásügüragüdüni dimurei lau úaraguni. Ariha wamá fiú hénpulu: “Aban meha bungiu Dimurei” (The New Testament in an Improved Version). “Lumañein meha Bungiu Dimurei ani ítara liña meha kei ligía” (The Translator’s New Testament). Kei tarufuduni Bíbülia burí to, mama ligíameme Bungiu luma Dimurei. * Arufudarügü lumuti bérusu le, íñutima lan lubara Dimurei haganagua sun lirahüñü Heowá, ligía lariñagunbei aban lan “bungiu”. Lidan bérusu le, dimurei “bungiu” bürüwati lau létüra ñǘraüti, mini lan le “gürigia gabafuti”.

Hibe-agei gürigia ibidiñeti güriegu le aubei tabürüdüwa Bíbülia houn. Ida lubati wachoururuni ka lan meha labusenrubei apostolu Huan lariñagun? Aban hénpulu, afuranguagüdüti aban máisturu somu puntu houn ha aturiahabaña luma. Lárigiñe, ámuñegueinarügü hasaminan aturiahatiña luagu le labusenrubei larufudahan  houn. Ida luba hachoururuni ka lan labusenrubei lariñagun? Mosu hamuriahan lanwoun ariñahani luma máisturu. Ítara luba gunfuranda hamani buidu le labusenrubei lariñagun. Ítarameme, lun gunfuranda wamani buidu le lariñagubei Huan 1:1, buítimati wakutihanu Liliburun Huan. Ñeinba wáluaha lanwoun dátosu luagu lubara Hesusu. Danme le wadariruni, ménrenguntimabei wasubudiruni kátima lan inarünibei.

Keisi hénpulu, ariha waméi le labürühabei Huan lidan kapitulu 1, bérusu 18: “Úagili ni aban arihiti Bungiu [Suntigabafu]”. Gama lumoun, añahein meha gürigia ariha hamuti Hesusu, le Liráü Bungiu, ariñagati Huan: “Leti Dimureibei [Hesusu], saliguati wügürime, aba labagaridun waganagua. Ariha wamaali luéirigun” (Huan 1:14). Ida lubati lariñawagún lídanñein lan Bungiu suntigabafu Irahü? Ariñagati giñe Huan luagu “ligibugiñeñein lan Bungiu” Dimurei. Ida luba san ligibugiñeñein lan aban gürigia amu gürigia, ani ligíameme lan gürigia ligía? Lidan Huan 17:3 furanguti larufuduni Hesusu amu lan luéi Lúguchi le siélubei, le unbei lagúara “Bungiu ábanrügüti, le inarüniti”. Lubaragiñe lagumuchunu Huan Liliburun, ariñagati: “Labürüdǘnbei burí le, lun hafiñerun luagu Hesusu lan Krístubei, le Liráü Bungiu” (Huan 20:31). Ariha wamuti mariñagun lan bérusu le Hesusu lan Bungiubei, lariñaga Liráü lan Bungiu. Sun burí dátosu le tídanbei Liliburun Huan, arufuda lumuti ida luba lan gunfuranda wamani Huan 1:1. Aban “bungiu” Dimurei, o Hesusu, arufudati le aban lan gürigia le íñuti lubara, ani mítaran lan kei Bungiu suntigabafu.

Haritaguaya waméi lani máisturu hénpulu. Samina humá añaheingua lan aturiahatiña uagili gufunranda hamá lárigiñe haganbuni hamaisturun. Ka gayarabei hadügüni? Gayarati hamuriahan lanwoun dátosu luma amu máisturu. Anhein lariñaga ligíameme houn, chóurutima hañame hibe-agei aturiahatiña. Ligíameme asuseredubei anhein machoururun wabalin ka lan labusenrubei apostolu Huan lariñagun luagu lubara Hesusu lumoun Bungiu suntigabafu, gayarati háluahan lanwoun ariñahani luma amu abürühati Bíbülia. Kéiburi Matéu le abürüdübalin le lariñagubei Hesusu: “Ánheinti luagu weyu luma oura le lunbei nagiribudun ubouagun, ibidiñeti ni ka un, ni houn ánheligu ha siélubaña, ni nun, au le Liráü Bungiu; Búngiurügüñein Úguchili asubudirei” (Matéu 24:36). Ida  liña lachoururuni dimurei le luagu mama lan Bungiu suntigabafu Hesusu?

Ariñagati Hesusu gíbetimati lan katei lasubudirun Úguchili sügǘ lau Irahü. Lun hamugati lídanñein lan Bungiu suntigabafu Hesusu, subudi lumuti hamuga sun le lasubudirubei Lúguchi. Ítara liña, mama ligíameme Irahü luma Úguchili. Lau sun lira, ñeinbei ariñaguti: “Biamañein meha luwuyeri libagari Hesusu: Aban kei bungiu luma aban kei gürigia ani adimurehati ya kei gürigia”. Lun hamuga ítara liña lan, agiati sífiri sandu? Lun hamugati lídanñein lan giñe Bungiu Úguchili, ka uagu mariñagun lubéi Hesusu subudi lani giñe sífiri sandu ariñahani ligía?

Lidan hasigirun aturiahoun Bíbülia, hasubudiruba amu burí bérusu le adimurehati luagu katei le. Súngubei arufuda lumuti lau ichouruni inarüni luáguti Úguchili, Irahü luma sífiri sandu (Sálumu 90:2; Adügaü 7:55; Kolosana 1:15).